LEVITHOUC 2
2
Ntyan Katmei
1Thow pwni Ringhpouc khang ntyan kat pwkhou, kamei rui hei tei ntyan buay swlouna kat nina e. Kamei rui mi khou tei Olive thauc lev agaw lou kazauh nina e. 2Kamei rui hei tei Aron kaikhwangmei amuh nunc khou phungc guang nina e. Thouh sw bammei amuh tei rui ntyan buay khatni thauh tei baankiu akhat laana agaw kapwm tei lev ravchapaeng khou tei ntei nina e. Hei tei Ringhpouc khang katlou the twmei hei tei rui lyanmei tuang e. Mi rym tei rui Ringhpouc ta tipian e. 3Kumna nsaekcloumei ntyan buay guay tei thu amuh nunc tuang dam e; hei tei Ringhpouc khang katloumei tuang swpui zaeng rui nthanmei e.
4Maimangh khou rawmei ntyan kat nii e thei, khay loumakmei ntyan nina e. Hei tei Olive thauc kaniloumei nsumei ntyan sw nuh e hamh e thei mpumei ntyan Olive thauc teyloumei nina e.
5Laikuak khou kabicmei ntyan kat nii e thei hei tei Olive thauc kanimei, kum e tiki khay loumakmei ntyan nina e. 6Hei tei kat ni khou by puatna Olive thauc liclouna kat nina e.
7Khaenglai khou suanghmei ntyan kat nii e thei, hei tei Olive thauc kaniloumei ntyan buay rui sw nina e. 8Hei tei Ringhpouc khang puatkat swna phungc guangna amuh khou tei tiilou ti tho, kumna amuh tei rui ravchapaeng khou tei laaguanglou puni the. 9Mi kapwm tei Ringhpouc khang katlou the twmei lyanmei swna amuh tei rui hei tei asaekc laana Ringhpouc khang katlou puni, kumna kamei rui hei tei ravchapaeng khou tei raw puni. Mi hei rawna khaengmei e, mi rym tei rui Ringhpouc ta tipian e. 10Nsaekcloumei guay tei Aron khatni kanac nunc khang e, hei tei nthanmei e, kalam thu Ringhpouc khang mai rawna katloumei khou rui laa patmei tuang e.
11 Ringhpouc khang katloumei ntyan akhat na sini khay kazauh nuh mak ge; Ringhpouc khang tii nimei ntyan khou tei khay khatni nkhuaihdui kazauh nuh mak ge. 12Nangniw tingkwm khou tay reymei napthai tei Ringhpouc khang katlou nina e, kum e tiki hei tei thu ravchapaeng khou rawna kat nina hamh e. 13Ntyan katmei kathuic khou tei ntey kazauh nina e, kalam thu ntey hei Ravguangc lev nangniw kak khou latdyng swloumei lyanmei tuang e. (nangniw tuang puatkat kaguayna khou tei ntey lou nina e.) 14Tayreymei nap tuang puatkat Ringhpouc khang phungc guang e thei kanuaih tangkeyna sw nthanna khatni mai khou saana kat ro. 15Khoutei Olive thauc khatni agaw lou kazauh nina e. 16Amuh tei rui katloumei nap khatni Olive thauc asaekc tei, khatni agaw kapwm tei rawna katmei puatkat swna kat nina e.
Currently Selected:
LEVITHOUC 2: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
