HOSEA 2
2
1Hei zaeng rui, he Jezreel nang chana swmei Isaraelmei ta “Ravguangc mei nunc,” khatni “Ringhpouc rui nzianmei nunc,” twna kaw o.
Chwnruangmei Gomer— Lwmnuh Makmei Isaraelmei
2Anac nuncle, nang pui hei anow sw taanc bam sini, ai hei kagaanv sw taan bam sini, nang pui ta sa o. Kamei mangcsangmeiluc swna lungcmaanv lungcmow bammei hei nthaekc khang sa o. 3Kamei nthaekc mak ge thei, ai rui kata puanc pat nungc tei kumcna tipaliuclou puni. Ai rui kata kangc khiaumei ramh thau makmei ramkaengv kumc tiswlou puni, kumna kamei ndaapc tarina theic puni. 4Ai rui kanac nunc ta nzianlou lak ge, kalam thu mangcsangmeiluc nac nunc the. 5Kamei rui sa e, “Ai rui ai nzianmeipu nunc daeng thangc tat ni kaniw akhang tu khang zangv khang tiilou e, kumna kanac nunc ti hei zak thay makna khatni zawsimei khou puanc patlou tuang e. Ramhhiw phey khatni linen phey Olive thauc khatni drakhadui tiilou e.”
6Kumna ai rui kata sauhraengh rui raeng binlou puni the khatni kachaeng raengh rui raeng thingclou puni the. 7Kamei rui kamei nzianmei nunc ta pakna lay nzwan tat puni the tiki kaniw ta nymtow pu lak khe. Kamei rui kaniw ta phu puni the tiki kaniw ta phutow pu lak khe. Khou kiu kamei rui, “Ai agaanv reymei daeng thangc guang dat ni the—ntaw khang suangc mi douc tei rui gay mbuna bam khwan e,” twna sa dat puni the.
8Kamei rui Baal ta kalum khou sinsw bammei nap-bi, drakhadui, Olive thauc, daandi, khatni kachaekc guay tei ai rui kakhang tiiloupui tuang e twmei kamei thay zat mak ge. 9Kumhpui zaeng rui atuang ai rui tiiloumei nap-bi khatni drakhadui tei kathai laamei ganv khou ai laa dat kan puni khatni kaphey kabaan khang tiiloumei ramhhiw phey khatni linen phey tei laa dat kan puni. 10Karamckhangc nunc mav khou ai rui kata tipaliuclou puni, kumna meic gaanv khat na rui sini kata abaanc khou rui kanlou dat ngam ni tuang hamh the. 11Katuang khumngai guay ti-nthaekc puni the—katuang tingkwm tuang khatni bw tuang ngai guay khatni katuang Sabbath ngai guay katuang ravriak tuang guang kariumei mung guay ti-nthaekc puni the. 12Kamei rui karamckhangc nunc tuang siamruai swlou tina tiiloumei tuang e twna kamei rui sa bammei katuang drakhaluai guay khatni tadut bang guay tei swmaan puni the. Ai rui katuang drakhalau khatni tingthailau guay ta nwmbangc tiguanhlou puni; nwmbangc khouringc nunc rui hei tei sw kasic key puni. 13Kamei rui ata amuclouna Baal khou agaw nteina khatni ntuh-ntah nu lana karamckhangc nunc ta phuna tat bammei zaeng khou tei rui ai rui kata dandi tii puni. Ringhpouc rui sa the.
Ringhpouc rui Kamei nunc ta Nzianmei
14Kumna ai rui kata syniang ramv thangc phungclouna, hei khou tei kata nzianmei lat rui kalung tikalaiclou dat puni. 15Katuang drakhalau guay tei ai rui kakhang tiilou dat puni khatni ryanramei nzaengc ta tei machunhmei chaengmun tiswlou puni. Kamei chabwan swna bammei douc, kamei Izip khou rui guangmei douc tei kumna kamei rui akhou mundaw dat puni.#Jos 7.24-26 16Khou kiu kamei rui ata kagaanv twna kaw dat puni—kamei rui ata katuang Baal twna kaw dat pw lak khe. 17Ai rui kata Baal zanc kamwang khou tisa dat lak khe.
18Mi ganv khou kiu amei nunc ta sw kasic mak khang ai rui nwmbangc khouringc khatni nruay thauruay guay lev latdyng sw puni the. Ai rui mi kandic khou rui rih na guay, buy-baeng guay khatni sauhpai guay laa ganc puni the, kumna amei nunc ta suc-rih maekna nchu-nzaenghna tilungclou puni the.
19He Isaraelmei, ai rui nang ta anow tisw puni;
ai hei nchumhmei khatni lwmnuhmei sw bam puni;
ai rui nang ta taek makna
nzianlou bam puni khatni nang ta
tingsaengzaeng atuang tiswlou puni.
20Ai atuang latdyng ngaek bam puni kumna nang ta atuang tisw puni,
nang rui ata Ringhpouc e twmei thay puni.
21Mi ganv khou kiu Isaraelmei amei nunc rui huayneymei ai rui dawlou puni.
22Ai rui kandih khou ting tiriu keylou puni,
kumna kandih rui nap-bi,
drakhathai khatni Olive thai tipat puni.
23Ai rui amei nunc ta mi kandic khou hei kasiamh thaulou dat puni kumna kaniw ta tilungcgay chingkhiuhlou puni.
“Nzianlou Makmei” twna kaw bammei nunc ta tei ai rui nzianlou puni “Amei nunc Hamh The,”
twna kaw bammei nunc ta tei
“nangniw Hei Amei nunc e,” twna ai rui sa puni,
kumna “Nang hei aniw Racguangc e,”
twna kaniw rui daw puni.#Rom 9.25; 1 Pi 2.10
Currently Selected:
HOSEA 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
