IBRIMEI 8
8
Jisu Aniu tuang Tingkuc
1Ntaw aniu rui sa bammei kiu thu, tingkauh khou Ravguangc tuang tik hym daihmei guangcbamvpaeng tuang baanzat khou dungc bammei tingkuc aniu khang nai the twmei hei e.#Kal 110.1 2Maansei rui hamhna Poubauhmei rui katinghloumei kalingmei kalummei pheykai khou naimei Nthan Liangmei Bamv khou kamei Tingkuh sw bam e.
3Tingkuh kathuic ti hei puatkat kat khang khatni Ravguangc khang khaeng khang suanglou tuang e. Hei zaeng rui aniu tuang Tingkuc hei ni khaengna kat khang kage nai e. 4Kamei kandih khou bam khwan e thei, kamei amuh sw ni tu hamh e. Kalam thu Riakdanv thei layna taanc bammei amuc nunc nai de. 5Kaniw sw bammei hei tingkauh thangc tuang maengc e. Kalam thu Mousi kamei Pheykai katinghthau ni khou tei, “Nang khou chyngbut khou lyanlou kanmei kahak tei kumcna taanc o,” twna salou khwan e.#Tat 25.40 6Tiki ntaw thu, kaniw tuang khang suangc gay ranvmei amuh taanv Jisu khou tiilou the. Kamei rui Ravguangc lev kamei nunc kak khou swloumei latdyng hei ni gay ranvmei e. Kalam thu mi khou hei gay ranvmei laatow nimei tuang latryan nai the.
7Reymei latdyng tei nthuih khwan e thei, kaneimei latdyng kage nai dat lak ni tuang e. 8Ravguangc rui kaniw tuang khuay kalauh patna sa e:
“Isaraelmei nunc khatni Judamei nunc lev ai latdyng thanh sw dat puni twna Poubauhmei rui sa e.
9Hei tei ai rui kaniw baanc zayna
Izip khou rui nduangh pat khou,
kaniw pupouc nunc khou swlou kanmei tei lev nchamc ni tu hamh e.
Ai rui kaniw khou swlou kanmei latdyng tei kaniw ngaek mak khe;
mi zaeng rui ai kaniw ta ganclou the.
10Ai rui Isaraelmei nunc khou swlou nimei latdyng kiu mi hei e twna
Poubauhmei rui mi kumna sa e:
Ai rui atuang riakdanv guay
kaniw lungning khou lou puni
khatni kaniw lungthw khou hylou puni.
Ai rui kaniw Racguangc sw puni,
khatni kaniw amei nunc sw puni.
11Kaniw makaamv khat khat ta
ncham dat ni tu hamh the,
khatni ‘Poubauhmei ta thay o,’
twna ni sa dat ni tu hamh the.
Kalam thu kaniw meic nthyammei khou rui saengc daihmei nganv,
meic guayna ata thay puni.
12Ai rui kaniw paap guay kuaklou puni kumna kaniw khuay ningtow dat lak khe.”#Jer 31.31-34
13Mi kumna latdyng thanh lam khou samei hei rui kamei rui reymei latdyng ta tei karaan tiswlou the. Karaan tei thu maan kan ni the.
Currently Selected:
IBRIMEI 8: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
