IBRIMEI 10
10
1Jihudimei tuang Riakdanv hei guang punimei kalingmei tuang maengc tei e; kalingmei thu hamh e. Hei zaeng rui kanganv maekna tingkwm pum khaeng kaluaih kaluaih bammei tei rui Ravguangc daeng khou guangmei nunc ta tei ti-nthuihlou ngam mak ge. 2Ravguangc ta kalum bammei nunc ta tei khaenglou guaimei rui sw nthanlou khwan e thei, kaniw khou paapc nai e twmei kaniw ning dat bam lak ni tuang e, kumna khaeng kaluaih dat dat bam lak ni tuang e. 3Tiki tingkwm pum khaeng bammei hei rui kaniw paap nai bam e twmei tining tow bam e. 4Kalam thu guaituamchic khatni lauziu zei rui paapc laa ganclou ngam mak ge.
5Hei zaeng rui Khrista kamei mbaanv khou guang ni khou, kamei rui sa e:
“Puatkat katmei khatni khaengmei ta nang kahaw mak ge,
tiki nang rui akhang meic pumc tiilou the.
6Kiruai kapumc pwm nteina khaengmei khatni
paapc khang khaeng bammei guay tei rui nang ta tipian ngam mak ge.
7Kum thena ai rui sa the,
‘Zauclo, Riakdanv zy khou
alam khou hylou bammei tei kumcna,
nang ningmei taanclou khang ai guang the.’ ”#Kal 40.6-8
8Mi guay hei Riakdanv thei layna kat bam tuang khwan sini, “Khaengmei khatni katmei, mai nteina katmei khatni paapc khang katmei, mi guay hei nang kahaw mak ge, khatni hei tei rui nang ta tipian ngam mak ge,” twna reymei khou tei sa kan the. 9Kumna, “Zauclo, nang ningmei taanclou khang ai guang the,” twna kamei rui sa the. Kumna kamei rui karaanmei khaengmei riak guay tei ganc lana Khrista ta khaengloumei rui mi guay phaan tei lynlou the. 10Ravguangc rui ningmei tei Jisu Khrista rui taanclouna, luan guayna kapumc kahak paapc khang khaengloumei tei rui aniu ta paapc khou rui sw nthanlou the.
11Amuh guay tei kaniw thouc taancna, dingna tingmik pum kazaat akhat na kaluaih phikna, paapc kuaklou ngam lakmei ramkhaeng tei khaeng bam e.#Tat 29.38 12Tiki Khrista thu tingsaeng khang khaenglou guai tang lana Ravguangc tuang baanzat thangc dungckey kan the. 13Kumna katuang zauczihmei ta kaphaypav bangc khou tiniibinlou mak saanv kamei mi khou tei nkhwan bam e.#Kal 110.1 14Kalam thu sw nthanlou kanmei nunc ta tei, khaenglou guaimei tei rui tingsaeng khang sw nthuihlou the.
15Bumaengh Nthanmei rui ni aniu khou sa e:
16“Thei thangc ai rui kaniw khou swlou nimei latdyng kiu mi hei e,
twna Poubauhmei rui mi kumna sa e:
Ai rui atuang latdanv guay
kaniw lung khou lou puni,
khatni kaniw lungning khou hylou puni.”#Jer 31.33
17“Kaniw paap guay khatni
kaniw tuang simei taanv guay
ai ningtow dat lak khe.”#Jer 31.34
twna kamei rui sa e. 18Kumna mi guay hei kuaklou kan thena, paapc kuaklou khang khaeng dat bam khang kage maek khe.
Aniu Ravguangc Daeng Tuanc Guang Di kho
19Hei zaeng rui, chanathiu, aniu Nthan Liangmei Bamv khou gut khang Jisu zei paan rui khamv namv tuang nai dat mak khe. 20Kamei rui aniu khang chaeng thanh, ringhpui chaeng laanclou the—kapumc kahak rui khamthinghphey tei laanclou the. 21Ravguangc kai khou aniu khang taanvsw bammei amuh daihmei nai the. 22Hei zaeng rui, paapc nai e twna khoukhaekna bammei lungning tei kazinh nthanlouna khatni aniu pumc nthanmei dui rui low nthan lana, lungning nthanna khatni lwm tiph tipna aniu Ravguangc daeng khou guang di kho.#Lev 8.30; Eze 36.25 23Aniu pat pat gut gut tuang sw makna, aniw rigwnmei tei ntipna sin di kho. Kalam thu latryan swloumeipu hei kalat suaimeipu hamh e. 24Nzian thay khang khatni gaytaanv taanc thay khang khat khat ta akumhna katiu thau kho cho twmei kakhanh kho. 25Meic gaanvsaekc kaniw chav sw bammei tei kumcna, aniu guang kariumei khou ntaamv ri kho. Poubauhmei tuang Tingmik ana guang the twmei nangniw howpui thei layna aniu khat khat ta katiu thau mbu hay hay bam di kho.
26Kalam thu nchumhmei tei thay tang lana aniu thayna thayna paapc taanc bam e thei, aniu paap khaeng kuak dat khang ramh baihmei maek khe. 27Mi kumhmei nunc tei thu guang nimei latzan khatni Ravguangc ta nuh makmei nunc ta swmaan nimei mai ta tei pingna nkhwan bam khang na di the.#Isa 26.11 28Mousi tuang Riakdanv twan lyampui mei ta tei thu, gaanv nei gaanv thumh mwang khou rui hei tei kiuc di the twmei nthan e thei, zauzian nai dat makna swluai tu di the.#Ria 17.6; 19.15 29Kum e thei, Ravguangc Nac Mpouh ta ni binpui mei, kata sw nthanloumei latryan tuang zei ta ramh sak makna swpui mei, zauzian tuang Bumaengc ta swzakpui mei ta tei thu akumh puni tha? Karuc khou keylou nimei dandi tei adih nthuk puni cho kakhanh zauc o.#Tat 24.8 30“Ai rui khwm khangc puni, ai rui lauguat khangc puni,” twna khatni, “Poubauhmei rui kamei nunc ta latzan sw puni,” twna samei hei thow cho twmei aniu thay e.#Ria 32.35,36 31Ringhmei Racguangc baanc khou keyloumei hei meic pingpui tuang e.
32Nangniw tuang tat kanmei ganv tei makumh zauc o. Nangniw ta tigaancloumei tangv tei nangniw ryanramei mpeyna ariw khwan sini ding ngamna ding khwan e. 33Kaluan luan nangniw ta charuangc khou sakasicna swzaklou khwan e khatni sw kasicna swlou khwan e. Nangniw kaluan luan mi kumna swloumei nunc tei lev khaengv nchamc khwan e. 34Nangniw kangkai khou bammei nunc lev ryanramei dam laa nchamc khwan e, khatni nangniw tuang guay asut ngam kan tisini, maan dat lakmei gay ranvmei nangniw khang nai de twmei thayna nangniw neihlana khaengvlou khwan e. 35Hei zaeng rui, nangniw lwmmei tei ganc dat ri tho; mi khang tei swan daicna nai the. 36Ravguangc rui ningmei taanh khang khatni kamei rui nrianhloumei tei laa khang nangniw khaengvthay khang kage nai e. 37Nthanmei latrik rui sa e:
“Guang nimeipu tei asaanh mak khou guang puni;
kamei nyan ni tu hamh e.
38Atuang ravchaptatmei nunc tei lwmmei paan rui ringc puni,
tiki thei hanc kanpui mei ta tei ai karuc khou pianlou ni tu hamh e.”#Hab 2.3-4
39Tiki aniu thu thei hancna maan kanmei nunc tei hamh e; lwmna ringhmei nunc tei de.
Currently Selected:
IBRIMEI 10: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
