HABAKUK 3
3
Habakuk rui Huayneymei
1Mi hei muhzwng Habakuk rui huayneymei ravsuai e:
2He Ringhpouc,
nang rui taanc kanmei taanv tei ai chu the,
kumna ai pingmei rui padik ge.
Ntaw aniw ganv khou ni taanclou dat ro nang rui taanc kanmei taanvdaih guay tei.
Zauc nzianlou o, nang lunghpuamc khwan sini.
3Ravguangc Edom thangc rui guang the;
nthanmei Ravguangc Paran tuang
chyng khou rui guang the.
Kahym tingpuk padik the;
kata thuanhmei kandih padik the.
4Kariw tei neihpatmei kumc the;
kabaancpav khou rui kariu tipat the;
kangamv nkamhlou bammei baanhpav khou rui.
5Ravpyan kahu khou guang the;
theihmei kathei lay guang the.
6Kamei ding pwkhou, kandih kanukc ge;
kamei zaucpat pwkhou zaatc nunc kadunh e.
Tingsaeng chyngbut guay bak the;
tingsaengzaeng luanghbut guay pangv kan the,
reynungc kamei rui tatloumei chyngbut guay tei.
7Kushanmei nunc ping bammei ta ai how the
Midianmei nunc kadunh bammei ta how the.
8He Ringhpouc, nang lunghpuamc bammei hei
duithuak guay ti hei cho?
Nang reic thau bammei hei duipui ta cho?
Nang muangh ruc khou tuangc tat re;
pwanzingh muangc tei nang tuang taulai e,
nang rui nang mei nunc khang
rihngammei phungc guang nungc tei.
9Nang rui nang tuang sauhpai satpat the,
pailu kapai khou nruanlou the.
Nang tuang tingpalikmei rui kandih ta swbak the.
10Chyngbut guay rui nang ta how pwkhou, kadunh the;
tingpuk thangc rui dui bun key the.
Kandih bangc khou dui rui kamuatc the,
kathuat kauhna kamuatc thau the.
11Nang tuang samc patmei pailu guay riw khou tei,
khatni nang tuang karangmei buy-baeng riw khou tei bw neih ding rimh rim kan the.
12Nang lungpuamcna kandih ta niibinna pat the;
nang lungpuamcna zaatc nunc ruc khou kuat pat the.
13Nang tatpat khwan the nang mei nunc ta kanlou khang,
nang tuang kapahloumei guangc ta kanlou khang.
Nang rui meicsimei nunc tuang py ta niakpiak key the kumna katuang pumtan ta swmutsutlou the.
14Aniu ta swphaklou khang kamei
pwanzingh kumcna guang pwkhou,
lungcsimei nunc ta nkamhna rairiumei nunc rui neihlamei kumc neihla bam khou nang tuang pailu rui katuang rihpy ta hui nzutphutlou the.
15Nang tuang takuanh nunc rui duipui khou gut kuat pwkhou daihmei duipui tei kaphuan kuat pat the.
16Mi guay hei ai chu the,
kumna ai kadunh the;
pingmei rui akhactang kadunh the.
Arou guay hei mut ngam tu kumc the,
atan kadunh the.
Kum e tiki aniu ta adowmei nunc ta Ravguangc rui dandi tii nimei ta ai khaengv thayna nkhwan bam ni the.
17Tadut bang guay nthai mak pwsini khatni drakhaluai khou kathai nthai mak pwsini,
Olive thai nthai mak pwsini
laupuk khou lautay khang mak pwsini,
lauziu kuanc khou lauziu maek pwsini,
khatni guaihkai guay karaeng pwsini,
18Ai neihla zaenggayna bam ni,
kalam thu Ringhpouc Ravguangc hei ata kanloumeipu e.
19 Ringhpouc rui akhang pumtan tiilou e.
Kamei rui ata chalung tan ta kumc ti-makhianglou e,
kamei rui ata luanghbut ruc khou suai ngaam makna titatlou the.#2 Sa 22.34; Kal 18.33
Currently Selected:
HABAKUK 3: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
