TATPATMEI 31
31
Ringhpouc tuang Pheykai Kasiamh Nimei nunc
(Tat 35.30—36.1)
1 Ringhpouc rui Mousi khou sa the, 2“Uri nac mpouh Hur tou, Bezalel ta Juda kaikhwang khou rui ai rui kadahna 3kakhou atuang bumaengc tipadiklou kan the. Kabah thaymei, thyamra thaymei khatni baanh thaymei ai rui kakhou tiilou kan the — 4kachaekc, daandi khatni tanzinc khou kathiak kathiak taanc thay khang, 5ntauh kaphangvna kasiamh khang, thing khou hianna kasiamh khang, khatni baanh thaymei taanv guayna khou taanh khang kakhou tiilou kan the. 6Zauclo kamei lev taanc nchamc khang, Dan kaikhwang khou rui Ahisamak nac mpouh Oholiab ta ni ai rui kadahlou kan the. Baihmei baanh thaymei guay khou tei ni taanc ngammei ngamv daihmei tiilou kan the; taanclou diu khang ai rui latdanv tiiloumei taanv guay tei twmei thu: 7atuang kalummei pheykai, Latdyng Khuk khatni Latdyng Khuk gwm, pheykai khou lou nimei guay, 8tupaeng khatni mi khou tei lou nimei guay, nthanmei kachaekc tuang thauhmaihyang khatni mi khou tei lou nimeina guay, agaw ntei nimei ravchapaeng, 9rawna khaeng nimei ravchapaeng khatni mi khou tei gut nimeina guay, duikhiu kaikhuang khatni mi tuang bamv, 10amuh taanv sin khou piu khang Aron lev kanac mpouh nunc khang chingkhiuhmei amuh pheybaan, 11tey nimei thauc, khatni Nthanmei bamv khang namhgaymei agaw. Mi guay hei taanc pwkhou ai rui nang khou saloumei kahak tei taanc nina e.”
Sabbath, Zaengthaek Tingmik
12Mi tangv tei Ringhpouc rui Mousi khou sa the, 13“Sabbath, atuang zaengthaek tingmik tei ngaek nina e, kalam thu ai hei nangniw ta nthanmei tiswloumei Ringhpouc kiu e twmei nangniw thay bam diu khang rui mi hei rui nangniw lev akak khou guang nimei kin guay khou madanhmei tuang sw puni the twna Isaraelmei nunc khou sa o. 14Zaengthaek tingmik tei nangniw ngaek nina e, kalam thu mi hei nangniw khang nthanmei tingmik ge. Thowkumhmei rui mi tingmik hei ngaek makna taanvtaanc bam e thei, kata tei swluai nina e. 15Nangniw tuang taanv taanh khang zaeng charuk nai the, tiki chaneimei tingmik hei thu akhou katgutloumei nthukmei zaengthaek tingmik ge. Mi tingmik nungc tei taanvtaanhpui mei ta thu swluai nina e.#Tat 20.8-11; 23.12; 34.21; 35.2; Lev 23.3; Ria 5.12-14 16Hei zaeng rui Isaraelmei nunc rui mi tingmik hei tingsaengzaeng latdyng tuang madanhmei swna ngaek nina e. 17Mi hei Isaraelmei lev akak khou tingsaeng nai bam nimei tuang the. Kalam thu Ringhpouc, ai rui zaeng charuk lungc khou tingpuk lev kandih hei damc the, kumna chaneimei nungc ai taanvtaanh maknga nthaekc the.”#Tat 20.11
18 Ringhpouc rui Sinai Chyng khou Mousi khou kachuc tangna Ravguangc kabaanc kahak rui hyloumei latdanv taucpaek kanei tei kakhou tiilou the.
Currently Selected:
TATPATMEI 31: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
