TATPATMEI 13

Nareimei Katmei

1 Ringhpouc rui Mousi khou sa the, 2“Puanc reymei nggaanvmei guay hei akhang katlou nina e. Maansei khou nareimei nggaanvmei khatni khouringh khou puanc reymei kachic guay tei atuang e.”#Sin 3.13; Luk 2.23

Khay Loumakmei Ntyan Ngai

3Mousi rui meic nunc khou tei sa the, “Nangniw rui bangh swna lungc bammei Izip kandic khou rui tatpatmei tingmik ta ningtow o. Ringhpouc rui katuang tanhmei ngamv paan rui nangniw ta kanpatloumei tingmik kiu aseic hei the. Mi nungc hei khay loumei ntyan tu lak nina e. 4Tingkwm khou reymei Abib bw tuang aseic tingmik hei nangniw Izip mpatlou the. 5Kanaanmei, Hittimei, Amormei, Hivimei, khatni Jebusimei tuang kandic tei nangniw khang tii puni twna Ringhpouc rui nangniw pupouc nunc khou nrianhloumei tuang di the. Mi nkhuaihdui khatni guaihnoudui luanghmei kandic khou kiu guang lungc pwkhou, tingkwm khou reymei bw khou tei ngay nina e. 6Zaeng chanei khay loumakmei ntyan tu nina e kumna zaeng chaneimei nungc Ringhpouc ta chamhpouhmei tuang ngai sw nina e. 7Zaeng chanei tei khay loumei ntyan tu nuh mak ge; nangniw pang khou, nangniw kai khou khatni nangniw tuang ramv bamv kathuic khou khay ni, khay loumei ntyan ni lou nuh mak ge. 8Mi tuang ngai hei ngaypui nungc kiu, nangniw rui Izip khou rui tatpat ni khou Ringhpouc rui taancloumei taanv zaeng khou tei rui mi ngai hei ngay bam tuang e twna nangniw nac nunc khou raclou nina e. 9Nangniw baanc khatni nangniw sanpiang khou ramhkhat ntaloumei tei rui tiningtow bammei kumcna mi ngay hei rui nangniw ta tiningtow bam khang e. Ringhpouc tuang Riakdanv tei kathai-kariangna racna bam khang hei tei rui nangniw ta tiningtow bam puni, kalam thu Ringhpouc kamei rui kangamv paan rui nangniw ta Izip khou rui phungc patlou the. 10Mi ngai hei tingkwm pum kaganv khou ngay tanh tan bam nina e.

Nareimei Ravguangc khang Katmei

11“Nangniw khou khatni nangniw pupouc nunc khou nrianhloumei Kanaan kandic tei Ringhpouc rui nangniw khang tiilou puni. Kamei rui hei tei tiilou pwkhou 12nareimei nggaanvmei guay tei nangniw rui Ringhpouc khang katlou nina e. Nangniw khouringc puanc reymei kachic guay tei ni Ringhpouc tuang e,#Tat 34.19,20; Luk 2.23 13kum e tiki kuanniam puanc reymei chic phaan tei lauziunac tii lyn nina e. Nangniw rui kuanniam tei laa dat nii mak ge thei, kaguang swbau nina e. Nangniw nac mpouh nareimei guayna tei thu nangniw rui thuak dat nina e. 14Nangniw nac nunc rui mi hei tabui tuang kabac cho twna thanv pw e thei kumna daw khang e, ‘Ringhpouc, kamei kangamv sinswna aniu rui bangh sw bammei bamv Izip khou rui kanpatlou the. 15Mi khou tei Izipmei guangc rui kalung tancna aniu ta titat mak pwkhou Izipmei tuang nareimei nggaanvmei guay ta Ringhpouc rui swluai the. Khouringh puanc reymei kachic guay ta nganvna swluai the. Hei zaeng rui puanc reymei khouringh kachic guay tei Ringhpouc khang kat bam tuang e, khatni mpouh nareimei guay ta thuak dat bam tuang e. 16Mi hei nangniw baanc khou hamh e thei sanpiang khou ramhkhat ntalouna tiningtow bammei tuang e; Ringhpouc kamei rui katuang daihmei pumtan paan rui aniu ta Izip khou rui zaypatlou e twmei mi hei rui tiningtow bam khang e.’ ”

Muanghtiangc lev Maitiangc

17Izipmei guangc rui Isaraelmei ta titatmei ganv khou tei, Ravguangc rui kaniw ta tei Philistinmei duipui tin khou tatloumei chaeng tei dui liangmei chaeng bam sini titat mak khwan e. Ravguangc rui kumna kakhanh e “Kaniw rui rih sw pw nimei ta tei how lana kaniw lung laicna Izip kandic thangc tat dat nuh e.” 18Mi phaan tei tazikramv kaanna Ntou duipui biak thangc tatmei nkuaymei chaeng tei kamei rui kaniw ta nduangh tat the. Isaraelmei nunc tei rih adow khang rihpwan piu khwan e.

19Josep rui Isaraelmei ta swlou o twna latryan tiswloumei theilayna, Mousi rui Josep rou phungc tat the. Josep rui kumna sa khwan e, “Ravguangc rui nangniw ta kanlou puinungc kiu, mi bamv khou rui nangniw arou phungc tat ro.”#Tha 50.25; Jos 24.32

20Isaraelmei nunc tei Sukkot khou rui tat thauna tazikramv tin khou Etham khou zypui swlou the. 21Kaniw ta chaengzaylou khang kalaanv Ringhpouc kaniw hu khou muanghtiangc swna, tat the khatni zingbangc kaniw hu khou maitiangc swna tatna kaniw ta tigaanclou the, kumna kaniw zingbangc kalaanv tat khwan e. 22Isaraelmei nunc hu khou tei kalaanv muanghtiangc khatni zingbangc maitiangc nai tanh tan khwan e.

Currently Selected:

TATPATMEI 13: RONGBSI

Highlight

Copy