KOLOSSIAMEI 2
2
1Nangniw khang, Laudikiamei nunc khang khatni ata zawthay zawhow makmei baihmei guay khang ni adih ranvna karamc bam cho twmei nangniw thay kanmei ta laa nii e. 2Mi kiu meic guay ta katiuthaulou khang khatni nzianmei rui bang kariulouna kamanv kungc kanmei lwmsimei nai dat makmei tei meic guay khou nai khang, mi kumna meic thay makmei Ravguangc tuang raeng,#meic thay makmei Ravguangc tuang raeng, Khrista ta thay khang e; baanhhy baibal asaekc khou Ravguangc tuang meic thay makmei raeng; baihmei asaekc khou Khrista pu Ravguangc tuang meic thay makmei raeng; baihmei asaekc khou Ravguangc khatni Pu, khatni Khrista tuang meic thay makmei raeng twna hylou e. Khrista ta thay khang e. 3Ningting khatni thaymei tuang lanv hei kakhou nai e.
4Meic nunc tuang lat sa thaymei tei rui nangniw ta guat mak khang ai mi hei sa tuang e. 5Ai nangniw pang khou apumc kahak bam mak sini, abumaengc bamna, nangniw maniatna Khrista khou lwmmei khou chalingc dingna ntipna ding bammei ta howna ai neihla e.
Khrista khou Nthuihmei Ringcpaan
6Nangniw Khrista Jisu ta kaipouc swna laaloupui thei layna, kakhou lungc bam o. 7Nangniw khou nchamlou kanmei tei kumcna, nangniw maan kakhou zangc nthuk key o, nangniw panty kakhou kasiamh thau o, khatni lwmmei khou ntip bam o. Thuanckumei rui padikna bam o.
8Khrista khou rui hamhna, maansei tuang rac kadai keymei pary khou rui khatni mbaanv sinmei bumaengc nunc khou rui guangmei tuang gaeng makmei meicguatmei maansei tuang ningting tei rui nangniw ta bangh tisw dat mak khang ramhthay o. 9Maansei swmei Khrista khou Ravguangc lwnlung kapwm nai e. 10Kumna Khrista khou nangniw khang nthuihmei ringcpaan tiilou the. Kamei hei bumaengh tuang dihsinmei khatni ngamvsinmei kaguay tuang kapy e.
11Khrista khou nangniw hei gihruamhmei nunc the. Hei tei maansei baanc rui ruamhmei tuang hamh e; Khrista rui paapc tuang lwnlung tei luak gancloumei tuang gihruamhmei e. 12Nangniw duilup khou tei Khrista thei tarou khou lay mbeihlou the, khatni Khrista ta tiringcthauloumeipu Ravguangc tuang pumtan khou lwmloupui paan rui nangniw ta Khrista thei tiringcthaulou dat the.#Rom 6.4 13Nangniw gihruamh makmei khatni twanlyampui mei swna theicna bam khwanmei nangniw ta, ntaw thu Ravguangc rui Khrista thei tiringcthaulou dat the. Ravguangc rui aniu paap guay kuaklou the;#Eph 2.1-5 14aniu tuang pow guay hykaduailoumei, khatni mi lam khou hyloumei latzan latdanv guay tei kazauhna kamei rui thut maanlou kan the, khatni hei tei kros khou hianbinlouna laa ganclou kan the.#Eph 2.15 15Khrista rui kros khou bumaengh tuang dihsinmei nunc khatni ngamv sinmei nunc tuang pumtan guay tei luak ganc lana#dihsinmei nunc khatni ngamv sinmei nunc tuang pumtan guay tei luak ganc lana; hamh e thei bumaengh tuang dihsinmei nunc khatni ngamv sinmei pumtan khou rui Khrista rui kata tiduak lana. rihngamna kaniw ta kathei khou tilwan pat kanmei tei meic guay khou lyanlou kan the.
16Hei zaeng rui, tu zangvmei lam khou, nthanmei tingmik lam khou, Bwthanh Ngai lam khou, khatni Sabbathneic lam khou meic gaanv khat na rui sini nangniw ruc khou latzan sw dat mak kan di tho.#Rom 14.1-6 17Mi guay hei thu thei thangc guang punimei maengc de; kaling kiu thu Khrista hei the. 18Kaniw tuang ndawman khou phaydyng swna, kaniw ta tikauhlouna, kandih chwn khou rui kalam cha makna gaenghswna, ramhkhe swna liw keymei khatni kauh baanchara nunc ta kalummei hei sw nina de twna katiu bampui mei nunc tei rui nangniw ta nkhuaimei tiswlou mak khang sw o. 19Mi kumhpui mei tei kapy Khrista khou alamv bam makpui mei e. Kalam thu kapumc kapwm tei kapy khou karyan karuc khatni thuriang rui duanc alamvlouna Ravguangc rui kahawpui thei layna daicthau bam tuang e.#Eph 4.16
Khrista lev Theic Nchamc Ringc Nchamcmei
20Nangniw Khrista lev theic nchamc the kumna mi mbaanv sinmei bumaengc guay khou rui theic the. Kum e thei nangniw tabui swna mi mbaanv tuang kumcna lungc bam tu cho? 21“Mi hei sin riu”, “hei tei mbap riu”, “hei tei kahi riu”, twmei riak guay hei tabui swna ngaek bam tu cho? 22Mi guay hei kaganv akhat khou tat bam khwanmei, maan kanmei, maansei rui kasiamhmei riak khatni latdyn e. 23Mi kumhmei riak guay hei kauh baanchara nunc ta kalum nina de twna sa khang, kachangc hamhmei liw keymei khang, khatni meic pumc ta rai khang thu ningting kumcna ninglou e; tiki meic pumc rui kahawmei ta sinriap khang thu hei tei rui gaeng tuang maek ge.
Currently Selected:
KOLOSSIAMEI 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
