2 KORINMEI 8
8
Khristian Ramtii
1Chanathiu, Makidoniamei tuang phwamling guay khou Ravguangc rui tiilou bammei zauzian tei nangniw ni thaymei ta laa nii e.#Rom 15.26 2Kaniw khou nchanvmei ranv sihna guangna kaniw ryanramei mpeyna ariw kan e; tiki kaniw khou neihlamei heidikamv daicna nai e; twmei kaniw kanganv tangcna lungcsi khwan sini tiipatmei khou thu kaniw baanc daic e. 3Ai mi hei nthanna sa ngam e twmei thu, kaniw ngammei kasang tiimei na hamhna kaniw tii ngammei suangc sini mbuna tii e. Kaniw tii niina, 4Judia khou bammei Ravguangc mei nunc khang nkhavloumei khou tei kaniw ni lay kazauh ni twna kaniw rui aniw khou sa tuang de. 5Mi hei aniw ningmei paengc thangc de! Kaniw hei rey liangmei khou kaniw ta Ravguangc khou tiilou the; mi tangv Ravguangc rui ningmei thei layna kaniw ta aniw khou ni tiilou the. 6Kumna mi taanv hei kahouhloumei Tita ta mi nkunna nzianmei taanv hei nangniw ta taanv nkhav suaklou khang aniw rui salou kan the. 7Ramh lam guayna khou: lwmmei khou, latsav khou, thaymei khou, nkhavlou niimei khou khatni aniw ta nzianmei khou#aniw ta nzianmei khou; hamh e thei aniw rui nzianmei khou. nangniw mbu de. Hei tei kumcna mi nzianmei taanv khou hei ni nangniw lung daiclou o.
8Ai nangniw khou latdanv swna sa tu hamh e. Tiki meic baihmei nunc ni mi kumcna nkhavlou niina bam e twmei lyanlouna, nangniw tuang kalingmei nzianmei tei thay niina sa bam tuang e. 9Aniu Poubauhmei Jisu Khrista zauzian tei nangniw thay e; kamei lungcgay khwan sini, nangniw khang rui kamei lungcsimei swlou khwan e. Hei tei karam lungsi paan rui nangniw lungcgaymei sw khang e.
10Mi lam khou hei ai rui nangniw khou sa niimei thu, ntheikwm nangniw kahouh kanmei tei ntaw thu luailoumei gay the. Mi taanv tei taanc niimei lungning ning pat reymei ni, taanc thau reymei ni nangniw de. 11Kum thena nangniw mi taanv tei luailou tho. Nangniw rui taanclou niina kahouhmei tei tiguang nthuihlou khang, nangniw ngammei thei layna, tii patna taanc suaklou tho. 12Nangniw rui tii niina tii ti thei, nangniw rui tii khang naina tiimei tei laalou puni; maekmei tei tii o tw tuang hamh e.
13-14Ai rui nangniw khou puatcrith tiphungclouna meic gaanv khat puat sw nthaanlou me tw tuang hamh e. Ntaw thu nangniw khang thu nai geihpui zaeng rui, maekmei nunc khang tei nkhavloumei gay e twpui tuang de. Nangniw ni maek datpui ganv khou, kaniw khang nai geic dat re thei, kaniw ni nangniw ta nkhavlou dat puni. Mi kumna sakzakna lungh khang the. 15Nthanmei latrik rui samei kumcna, “Laalou geihmei tei ni nai geih mak ge; laalou raumei tei ni nai rau mak ge.”#Tat 16.18
Tita khatni Kapammei nunc
16Aniw rui nangniw khang kadanmei lungning kahak hei Tita khou ni tiiloumei khang rui Ravguangc ta thuancku e. 17Kata aniw rui swlou o twna samei tei neihlana piuloumei na hamhna, kamei rui kahaw ranvna kamei nangniw daeng thangc tat kan tuang the. 18Gaychamv dinhmei khou kata phwamling guay rui thuancna bammei chana gaanv khat ta ni kamei lev tat nchamc khang ndiulou kan e. 19Mi ruc khou tei rui, kamei hei aniw rui nkhavlou nii changhmei lev kazauhna Poubauhmei hym khang mi nzianmei taanv taanc bammei dwan khou hei aniw lev tat nchamcna nkhavlou khang phwamling guay rui kapah patna ndiuloumeipu ni e.
20Mi lungning daicna tiipatmei syandui tamzanhmei khou hei, meic nunc rui khanc lanclou mak khang twmei aniw kadanna sw bam e. 21Aniw rui ningmei thu Poubauhmei mikzaw khou na hamhna, meic nunc mikzaw khou ni nchumhmei taanh khang twmei hei e.#Lkd 3.4 22Mi kumcna aniu chana kati hei kaniw thei ndiulou kan the. Aniw kata kaganv mpeyna zauc the kumna kakhou nkhavlou nii changhmei nai e. Kamei ntaw nangniw ta lwm lapui zaeng rui nkhavlou nii katyn the. 23Tita lam khou thu, kamei hei ai lev taanv taanc nchamcmei khatni nangniw ta nkhavloumei khou ata nkhavloumeipu e. Kamei lev tat nchamc kanmei chana nunc lam khou ni, kaniw hei phwamling tuang latdiu tatmei nunc e, Khrista hym tidaihmei nunc e. 24Aniw rui nangniw lam khou gaengh sw bammei hei kachangc dyng e twmei phwamling guay rui ni thay kan khang kaniw ta nangniw rui nzianmei tei lyanlou tio.
Currently Selected:
2 KORINMEI 8: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
