2 KORINMEI 6
6
1Kum thena, Ravguangc zauzian tei nsa swmaan mak khang, kamei lev taanv taanc nchamcmei nunc swna aniw rui nangniw khou zaenghuay e. 2Ravguangc rui sa e:
“Ai rui nangniw ta laalou nipui ganv khou tei,
Ai nangniw lat chulou the.
Nangniw ta kanlou nipui tingmik khou tei,
Ai nangniw ta nkhavlou kan the.”
Zauclo! Laalou nipui ganv kiu ntaw hei the; kanlou nipui tingmik kiu aseic hei the!#Isa 49.8
3Thowkumhmei aniw tuang taanv khou rui phaysuy kan pu ramc e twna, aniw taanv khou hei khanc lanclou nuhmei tuang nai mak khang karamc bam e. 4Mi phaan tei, ryanramei, suc nucmei khatni kunghmei azuh ariwpui ganv khou, aniw Ravguangc siamruaimei nunc swna khaengvna lungc lyanlou e. 5Aniw ta bai the, kangkai khou bangclou the, meic kangdai rui kwam the, aniw taanv ranvna taanc the, zip makna khatni tu zangv makna lunghpui ganv nai the.#Lat 16.23 6Aniw tuang Nthanmei panty, kabahthaymei, khaengvmei, khatni nzianthaymei rui aniw hei Ravguangc siamruaimei e twmei lyanlou kan the. Mi hei Bumaengh Nthanmei paan rui, nzianmei paan rui, 7kachangcmei latchamv dinc ndauhmei paan rui, khatni Ravguangc pumtan paan rui e. Adow khang khatni akhangv khang ravchaptatmei hei baansyn e. 8Aniw ta chakhwang swlou e, malana ni swlou e; aniw ta swzaklou e, thuanckuloumei ni nai e. Aniw ta lat saraamhmei nunc ta kumcna ni swlou e; kum sini aniw latling sa bam tuang de. 9Aniw ta meic rui thaylou makmei nunc kumcna swlou e, tiki meic guayna rui thay bam de; theic kan nimei nunc kumcna ning e, tiki nangniw how the—aniw ringc bam e. Riaplou khwan sini aniw theih mak ge; 10aniw lung tiryanralou khwan sini aniw neihla tanh tan bam e; aniw hei lungcsi tu kumc khwan sini, meic mpeyna ta tilungcgaylou e; aniw tuang ramhkhat na sini maek tu kumc khwan sini, aniw khang katana nai e.
11Korinmei nunc lev, aniw rui sa nimei tei nangniw khou daeklou makna salou kan the; aniw lung kapwm rui nangniw ta nzian e. 12Aniw rui nangniw ta nzian makpui tuang hamh e; nangniw rui aniw ta nzian makpui tuang de. 13Ai rui nangniw ta anac nunc ta kumcna sa tuang e: niw rui nangniw ta nzianmei kumcna nangniw ni aniw ta nzian o. Nangniw lung laanc daic patlou o.
Ravmaengc Kalummei khou rui Ramhthay khang
14Lwm makmei nunc lev nangniw boudu nchamc nuh mak ge. Akumhna ravchaptatmei lev ravchaptat makmei kariu nuh nina cho? Akumhna zinghmei lev gaanhmei bam kariu nuh nina cho? 15Akumhna Khrista lev ravsic kariu nuh nina cho? Akumhna lwmmei lev lwm makmei kariu nuh nina cho? 16Akumhna Ravguangc tuang ravkai lev ravmaengc tuang ravkai kariu nuh nina cho? Aniu hei Ravguangc tuang ravkai e! Kalam thu Ravguangc rui sa e:
“Ai meic nunc pang khou lungc bam puni,
kumna tat nchamc bam puni;
Ai rui kaniw tuang Racguangc sw puni,
kumna kaniw amei nunc sw puni.”#Lev 26.12; Eze 37.27; 1 Ko 3.16; 6.19
17Kumna Poubauhmei rui sa e:
“Nangniw kaniw ta mpatlou nina e kumna kaniw khou rui baic taph tap nina e.
Nthan makmei ta kahi lak nina e,
kum pwkhou ai nangniw ta laalou puni.#Isa 52.11
18Ai rui nangniw pu sw puni,
kumna nangniw anac mpouh aluh sw puni,
twna Ngamparimei Poubauhmei rui sa e.”#2 Sa 7.14; 1 Ki 17.13; Isa 43.6; Jer 31.9
Currently Selected:
2 KORINMEI 6: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
