1 KORINMEI 10

Ravmaengc Kalummei khou rui Tat Pat ro

1Achanathiu, Mousi thei lay tatmei aniu pupouc nunc tei akumh kan tu cho twmei nangniw thaymei ta ai laa nii e. Kaniw ta muangh rui gumliamlou khwan e, khatni kaniw meic guayna duipui chung khou tat kaan khwan e.#Tat 13.21-22; 14.22-29 2Kaniw guayna ta muangh lungc khou khatni duipui lungc khou Mousi mei nunc swna duiluplou khwan e. 3Kaniw meic guayna tingkauh tuang taektw tu nchamc khwan e,#Tat 16.35 4khatni tingkauh tuang dui zangv nchamc khwan e. Kaniw ta nduangh tat bammei bumaengh taudaic khou rui puakpatmei kaniw zangv khwan e. Mi taudaic kiu Khrista hei e.#Tat 17.6; Sin 20.11 5Kum khwan sini kaniw meic geihmei ta Ravguangc rui pian mak khwan e; kumna kaniw tei tazikramv khou theic zin theic zalou khwan e.#Sin 14.29-30

6Mi guay hei kaniw kumcna simei ta kahaw mak khang ramhthay khang hylou tuang e.#Sin 11.4 7Kaniw gaanvsaekc rui ravmaengc kalum kanmei kumcna nangniw sw mak khang e. Nthanmei latrik khou hyloumei kumcna, “Meic nunc tei dungc keyna tu the khatni zangv the, kumna boulahna alaamh the.”#Tat 32.6 8Kaniw boulahmei taanv taancna zaeng neih khat na khou meic ching nchuihna kathumh theic kanmei tei kumcna aniu lungcmaanv lungcmowmei taanv taanc lak nina e.#Sin 25.1-8 9Kaniw gaanvsaekc rui Poubauhmei#Baanhhy baibal asaekc khou Khrista twna hylou e. ta nchanv tina, kaniw ta nrui rui swluai kanmei tei kumcna aniu sw lak nina e.#Sin 21.5-6 10Kaniw gaanvsaekc rui Poubauhmei ruc khou tanglum tanglai bam tina, swluaimei Baanchara rui kaniw ta swluai kanmei tei kumcna aniu sw lak nina e.#Sin 16.41-49

11Mi guay hei meic nunc pingthay khang lyanlou tuang e, kumna mi guay hei nkhamhmei ganv guang nimei khou lungc bammei aniu ramhthay khang hylou tuang e.

12Hei zaeng rui, thow pw ni kamei ding bam de twna ningpui mei tei bow mak khang ramhthay o. 13Nangniw khou nchanvmei guang bammei guay tei meic baihmei khou ni guang bammei zaat rana de. Ravguangc thu kalat suaimeipu hamh e. Kumna nang ding ngam lak nimei tuang nchanvmei nang khou guang khang nuhlou ni tu hamh e. Nang ta nchanvpui ganv khou, khaengv ngam khang ni kamei rui nang khang pumtan tiilou puni, kumna duak nipui chaeng tiilou puni.

14Hei zaeng rui nzianmeithiu, ravmaengc kalummei khou rui ducna bam o. 15Ai rui nangniw ta kabahthaymei nunc de twna mi hei sa tuang e. Ai rui samei hei nangniw kakhanh o. 16Ravguangc ta thuanckuna zangvmei maniat taektw buangc ta tei makumh o: Hei tei aniu zangvmei tei, aniu Khrista tuang zei khou lay kazauhmei tuang hamh nah cho? Aniu ntyan twmei tei aniu kapumc khou lay kazauhmei tuang hamh nah cho?#Met 26.26-28; Mrk 14.22-24; Luk 22.19-20 17Aniu hei meic mpeyna bam sini, ntyan dwm tei akhat namei kumcna, aniu hei pumh akhat na di the. Kalam thu ntyan dwm akhat na khou rui aniu tu nchamc the.

18Isaraelmei nunc ta tei kakhanh zauc o. Ravkhaengmei zanc tei tumei guay tei ravkhaengmei khou tei lay kazauhmei nunc the.#Lev 7.6 19Mi hei samei rui ravmaengc khatni mi khang tei khaengloumei ravcha tei ramhkhat re twna sa tu cho? 20Kiuc hamh e! Ravningmakmei nunc rui khaengloumei tei ravsic khang e, Ravguangc khang hamh e twna ai sa tuang e. Nangniw rasic lev kadam laa nchamc bammei ta ai laa nii mak ge.#Ria 32.17 21Nangniw Poubauhmei tuang buangc ni zangv, ravsic tuang buangc ni zangv tw bam nuh mak ge. Nangniw Poubauhmei kuakpaeng khou ni tu, ravsic kuakpaeng khou ni tu tw bam nuh mak ge. 22Aniu Poubauhmei lung tipuamh khang sw kho nah cho? Aniu kata ngam diw nah cho?#Ria 32.21

23“Aniu ramh guayna sw nuh de,” twna kaniw rui sa e. Hei tei ni nchumh de; tiki ramh guayna gaymei rana hamh e. “Aniu ramh guayna sw nuh de,” tiki ramh guayna gaengmei rana hamh e.#1 Ko 6.12 24Gaanv khat na sini kakhang kakhang na zauc lak nina de; meic baihmei khang ni zauc nina de.

25Kaithyan khou zuanc bammei zanc guay tei akumhmei zanc cho twmei thanv makna tu o. Mi kumna thanv bam e thei, nang lungning sw mphuam puni. 26Kalam thu, “Mi kandic khatni mi khou naimei guay hei Poubauhmei tuang e,” twna hylouna nai e.#Kal 24.1

27Khristian hamhmei gaanv khat rui nangniw ta nap kaw pwkhou, nangniw lungning sw mphuam mak khang tabui kumhmei zanc cho twmei thanv makna tu o. 28Tiki hei tei, “ravkhaengmei zanc e,” twna sa pu e thei, mi pu khang tei rui khatni kalungning sw mphuam mak khang rui hei tei tu riu. 29Nang lungning khang ta hamh e, mi pu tuang lungning khang tei sa tuang e.

“Meickai zaeng rui, tabui swna ai sw nuhmei tei sw mak bam nina cho? 30Ai Ravguangc ta thuanckuna tu e thei, tabui swna ai thuanckuna tu bammei taektw khang tei rui ata khanc bam nina cho?” twna thowkumhmei rui sa nuh e.

31Gay the, nangniw rui swmei guay, tumei pw ni, zangvmei pw ni Ravguangc hym khang sw o. 32Jihudimei nunc ta ni, Zentelmei ta ni, Ravguangc tuang phwamlingmei nunc ta ni tiphaysuy mak khang sw o. 33Ai swmei kumcna nangniw ni sw o: i sw bammei guay hei akhang na zauh makna, meic guayna khang zaucna, kaniw ta ni kanlou nuh khang rui twna meic guayna ta tipian khang karamc e.

Currently Selected:

1 KORINMEI 10: RONGBSI

Highlight

Copy