ROMNYI 10
10
1Ipvüshangthu, hi ileben tsüdi pi inyithu yala hangshaya thsü mvu nu Anyiza wi mathu ghena kekhie sale! 2Mathu na Anyiza wi lebenchi ntsa saden; isala mathu lebenkechi tsüna palakechü atsentsawa miwi nyele kesa hi nthu wi khiya mehai. 3Kepaghenanye mathu na Anyiza na anyi pi ma tuwi meshonya keten lenwa tsü nchü, nu mathu ketanla mathu kemeshen wina saden; tsalina mathu na mathu pi Anyiza na anyi pi ma tuwi meshonya keten lenwa wi tsü chi nten. 4Kepaghenanye Khrista na Ayenwa tsü sa pi asakhen sadha, isanu anyi thowa na nondiya khe Anyiza tuwi meshonya thsüle kesalina.
Hangshakeya Tsüna Tsüdi Ghena
5 #
Lev 18.5
Ha Mosa na Ayenwa tsü kenie wina Anyiza tuwi meshon yaben kesa cüki zhü kechi: “Anyi thowa na Ayenwa na khi kechithu tsü nieten khe hang yaben.” 6#Aye 30.12-14 Isala Ntsawajüh na kenondi wina Anyiza tuwi meshonkeya cüki khi kebenwa tsüna ha; “No ketanla, ‘thowa na tang wi ki ben nu?’ tsüti nkeüla.” (tsüna Khrista ssi dugho le kesa). 7“Nyelela, ‘thowa na ayyi cakhu wi du ben nu?’ isa nkeüla.” (tsüna keshü wina Khrista ssi keshhugho). 8Tsüna hati khiben, “Anyiza ketsijüh tsüna no tetsaki ben, npang wi nu nleben wi ben” —tsüna kenondi jüh ithu pi kekhi tsü. 9Keujüla no npang pi Jisu tsüna Apvüwa le khishi nu nleben wi Anyiza na keshü wi ma sa pi hang cüle kesa nondiya lethu, no hangsha yaben. 10Kepaghenanye ithu na aleben pi nondi nu Anyiza tuwi meshon yaden, nu apang pi khishü nu hangsha yaden. 11#Isa 28.16Ntsawajüh na khiben, “Anyi kesü le kesü lela ma nondi ketenwa kejügheya thsü nben.” 12Hawa wi ha anyi tsüdila saghuben, kepaghenanye ciwi Judah nyithu nu Judah nyi nkenyethu kepapa kesa mangla nmi. Anyiza na tsüdi miwi Apvüwa, nu ma keben kemihhi pi ma wi khie ketenthu tsüdi cü ntsa saden. 13#Jol 2.32 Ntsawajüh wi khi keben ti, “Anyi kesü le kesü lela Apvüwa wi kekiqa khie ketenwa hangsha yaben.”
14Isala keujüla mathu na n-nondi lethu, khati nu ma wi kekiqa khieya mehai nu? Nu keujüla mathu na ketsijühwa tsü za meya lethu, mathu na khati nu nondiya mehai nu? Nu keujüla ketsijüh tsü pi nkhichi lethu, mathu na khati nu tsü zaya mehai nu? 15#Isa 52.7 Nu keujüla nyilothu kesunshi nchi lethu, khati nu ketsijüh pi khichiya mehai nu? Ntsawajüh na khi keben ti, “Jühtheü Kemehaiwa sen kegho nyilothu ccü na khatila atsimehai nu!” 16#Isa 53.1 Isala tsüdila Jühtheü Kemehaiwa tsü ya meya. Isa na ma ketanla khitheng, “Apvüwa, thowa na ithu ketsijüh ha nondiya nu?” 17Tsalina ketsijüh kekina wina kenondi ghoden, nu Khrista jüh pi kesansi wina ketsijüh ghoden.
18 #
Zak 19.4
Isala hi keüben: ntsakhiwa mathu na ketsijüh tsü za meya kwe? Mathu na tsü zayadha— kepaghenanye Ntsawajüh na khiben;
“Mathu khwejü hhaiwa tsüna ayyi tsüdi wi wadha;
mathu jühthu na ayyi ccügwenthu cudha.”
19 #
Aye 32.21
Kheneng hi keüben: Israel nyithu na chüshi meyala kwe? Mosa na ma ketanla atuwa sa tsü luneng;
“Hi imizzatenti ntsawa nkenye kesü tsü senya
nu inyithu sa pi anyonghopvü thsüaden;
nu hi kejüphon mizzatenti kesü ghena
inyithu sa pi aghepvü thsüaden.”
20 #
Isa 65.1 Nu Isa na tsü miwi kapvüshüsha nu khi,
“Anyi hi bha nketenthu na hi muya,
hi anyi hi keü nketenthu tuwi gho.”
21 #
Isa 65.2 Isala ma Israel ghena khichi, “Ghanan thangthang hi ikwen chang pi ajüh nkeya nu nyu shun keten nyithu ssiyale sa.”
Currently Selected:
ROMNYI 10: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
