SHICÜSI 6
6
Nazirit Nyi Kesa Ghena Ayenthu
1Apvüwa na Mosa kiza 2nu kecükegwe hathu pi Israel nyithu cü thsü. Npvüza le nza kesüle kesü lela Nazirit nyi kesü sale kishen nu ma ketanla ma kahang kepa sapi Apvüwa wi chi lethu, 3#Luk 1.15. ma kisengtssü kekhang nu azü jjü nben. Ma kemeshentsse pi kesa tssü katsüha le nyelela ma bi kahangle keqen sa lela dsajjü nben. 4Ma Nazirit nyi sa keben chu kemeshentsse ton wina bün keya ma non, ma kwen lela dsa nben.
5Ma Nazirit nyi sale kekishen wi keben chu, ma lissen nyelela ma pang kenye cah nben. Ma kishen nu kahang kepa sapi Apvüwa cü ketheng kekhu wi bendha, nu ma lissen nu ma pang kenye ncahla shigü ben thsüben. 6-7Ma lissen tsüna ma kahang kepa sapi Apvüwa kecü zensu, tsalina ma keshü kamang kete wi wa nu ma ketanla ma nakhi nben, tsüna ma ba, ma jja, ma cünyuwa, nu ma tssüggüwa keshü sa lela. 8Ma Nazirit nyi sa keben chu ma satemetha pi Apvüwa wi chidha.
9Keujüla ma nyu kete wi keben anyi pahan na zuli shü nu ma Nazirit nyi lissen kemetha tsü nakhi lethu, ma ghanan tagü benla nu ma lissen nu ma pang kenye cahben; isalethu ma keccüna wi metha shaben. 10Tazen ghanan wi ma nkhetsü nyelela duktur keni sen nu Apvüwa ketenpen Nithsüjjen kedulen wi keqhaikediwa wi ghoben. 11Keqhaikediwa na tsü kesü pi kesami ghena kekinyi nu kepawa pi mecang pi kekinyi sa nu ma keshü kamang kete wi kewa ghena ma satekemetha keccüna tsü sa chiben. Tsü ghanan wi anyi tsüna ma lissen satemetha neng chiben, 12nu ma Nazirit nyi kesa matsü la satemetha neng pi Apvüwa cüben. Kheni wakesa matsü tsü nsidha, kepaghenanye ma lissen kemethawa tsü nakhi kesalina. Kedhineng kekinyi ghena ma khaghaneni zza amapi kesü ji kesü sen ghoben.
13 #
Kek 21.23,24. Khathansha wi Nazirit nyi kesü ma kekishen matsü tsü cen khe ma keccüna kesü saben. Ma Nithsüjjen kedulen wi wa 14nu asahang nyu ghojünkeya mangla nkemi kecheng pi Apvüwa cüben: khaghaneni zza amapi kesü ji asüpon kesü mecang pi kekinyi, khaghaneni zza amapi kesü ji aghala kesü pi kesami ghena kekinyi, nu aneni süpon kesü pi kecca ghena kekinyi ghena. 15Ma amesa azimi nkechi ashijü kesü la khuchiben: awheng pi oliv deli kesaghu amesa shamulu kegü, nu adeli pi kenyen ghapasi, nu tsümiwi asu nu kisengtssü pi kekinyi saben.
16Keqhaikediwa na ha tsüdi pi Apvüwa cü nu kesami ghena kekinyi nu mecang pi kekinyi sa chiben. 17Ma aneni süpon tsüpi ahhansha sa nu pi Apvüwa wi kecca ghena kekinyi sa chi, nu amesa ashijü kesü tsü la saghu khupi cüben; ma asu nu kisengtssü pi kekinyi tsü la sa chiben. 18Nazirit nyiwa na Nithsüjjen kedulen wi ma li whi nu assen tsüpi kecca ghena kekinyi mecang keben anni miwi tsü chiaben.
19Tsaseng wi aneni süpon hah tsüpi wenya lethu, keqhaikediwa na tsü khuya nu pi ashijü wi amesa shamulu kesü nu ghapasi kesü saghu pi Nazirit nyiwa kwen wi chiaben. 20Tsashi keqhaikediwa na tsüthu pi aju kemehai ntsa sapi Apvüwa cüben; ayenwa wina aneni süpon nnukhu-kisü nu ma ccü tsüna keqhaikediwa ji, tsüthu tsüna keqhaikediwa ghena khukechi kemetha. Tsaseng wi ccüna Nazirit nyiwa na kisengtssü jjüya mehai.
21Hathu ha Nazirit nyi ghena ayenthu; isala Nazirit nyi kesü ma kekishen wina nkhuchithu keyishü miwi kekinyi sale ajühkhuchithu ma jühkhukechi nieti nu sacen nchithu yishü.
Keqhaikedi Na Sawegükechi
22Apvüwa na Mosa kiza 23nu sawegü pi Israel nyithu kecü wi ajüh hathu ha senlo Aaron nu ma tsathu kiza thsü:
24Apvüwa na sawegü pi nthu cü nu nthu noncca keyawa salo;
25Apvüwa ya nthu nantizen nu nthu tuwi ccatssü keyawa sa;
26Apvüwa na nthu ghang pi ma leben ghashu,
nu kecca pi nthu kecüwa salo;
27Apvüwa na khi, “Mathu inyan wina sawegü pi Israel nyithu cü lethu, hi sawegü pi mathu cüben.”
Currently Selected:
SHICÜSI 6: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
