MATHI 28

Hangneng-keshagha

(Mrk 16.1-10; Luk 24.1-12; Jhn 20.1-10)

1Sabbath tsathang cen nu dhitsüwa Apvüwa tsathang wi ghanen mitu Magdalen Maria nu Maria kepawa manyi na ashüjjenwa tsü ghangchi nanle wa. 2Ciwi zulila ameghükuju ntsa sa, Apvüwa nyilo kesü tang wina dugho ashüjjen lon tsü kulupheghe nu ciwi donkiya. 3Ma tsi na atsancwe ti nu ma thsümeni na aghola ti mekidhi kesa. 4Aghikehiethu na messi pi kedheggü nu keshü kamang ti sa. 5Tangnyilowa na nza keni wi kiza, “Nshinyi nmessila. Nshinyi na Jisu nyu ma pi kross miwi jen kesawa bha keten tsü hi chüben. 6Ma he wi nmile; ma kekhi tsüti ma hangneng-shaghadha. Ghola he wi ma pi kechi pen wi ghangchi nanlo. 7Wan wa nu ma sansikeyathu wi, ‘Ma keshü wina hangneng- shaghadha, nu ma khili nthu tuwi na Galilee wi wa tendha; nthu na ciwi ma muya ben le!’ tsüti kizalo. Hi nthu kekiza tsü meshenyalo.”

8Tsalina manyi na kaghajila ashüjjen tsü teshi, messi isala anonghe ntsa sa, nu sansikeyathu wi kizale bvüa. 9Zulila Jisu na gho manyi metu nu khi, “Kecca na nshinyi ssiben keyawa salo.” Manyi shagha ma ccü ghansen nu kinyi. 10Jisu na manyi wi kiza, “Nmessi lalo, wala icünyuthu wi mathu Galilee wi walo ciwi hi muya ben na kizalo.”

Aghikehiethu na Kekhi

11Nzathu na kebvü seng wi süpahi ashüjjen ghikehiethu pahan na anyunutiwa wi whala khati sa khe tsüdi khi pi keqhaikedi ntsathu kiza. 12Keqhaikedi ntsathu nu keshenpfüthu na mathu cho kidenya; mathu na apisa kejon pi süpahithu cü 13nu khi, “Nthu na ma sansikeyathu na aghaja wi nthu jen keben wi ghola ma kamang ghanfüya le khilo. 14Nu keujüla Ahng na ajüh ha zaya lethu, ikhang na nthu kesami nmile kesa ma juyaben, nu nthu na tsü ghena mangla lebengüccü nben.

15Aghikehiethu na apisa tsü khuya nu wala mathu salo kekiza tsüti sa. Tsalina ha cüki ha nansü kecu Judah nyithu jawi tsüti khiden.

Jisu na Ma Sansikeyathu ya Ma Mukeya Thsü

(Mrk 16.14-18; Luk 24.36-49; Jhn 20.19-23; Kek 1.6-8)

16 # Mat 26.32; Mrk 14.28 Sansikeyathu Taghakhen na Jisu mathu kekiza ti Galilee wi ayikha wi wa. 17Ciwi mathu na ma metuya nu ma kinyi, isala mathu pahan na kesütu. 18Jisu na tetsaki gho nu mathu wi khi, “Tang wi nu ayyi wi la kekhang tsüdi pi hi cüdha. 19Tsalina ayyi nyi tsüdi wi wa mathu pi hi sansikeyathu saya thsülo; Abawa, Atsawa, nu Kemetha Ghamu nyan wina mathu pi baptaiz sa cülo, 20nu hi pi nthu kekiza tsüdi pi mathu sansi nu nieya thsülo. Hi keshüthangla wa kahang sakhen kecu wi lela nthu ssi benden.”

Currently Selected:

MATHI 28: RENGNBSI

Highlight

Copy