LEVIYEN 16
16
Ahhanshakesa Tsathang
1Aaron tsa keni na anni nkemetha pi Apvüwa kecü ghena pathi kesa seng wi Apvüwa na Mosa kiza. 2#Ibr 6.19.Ma khi “Nbiwa Aaron wi ma matsü sati kesa wi ketan Kemetha ntsawa Pen keshonthsü seng wi tsü walo kizalo, kepaghenanye ciwi Cenkethenjüh Khitson keshan miwi akulukeshü wina nyu ya hi muya thsü. Keujüla ma tsü nkina lethu ma pathiaben. 3#Ibr 9.7. Ma kesami ghena kekinyi ji amesü zza süpon kesü nu mecang pi kekinyi ghena khaghaneni süpon kesü tsüti sengho ccüla Kemetha ntsawa Pen witsü duya mehai.”
4Tsaseng wi Apvüwa na kecükegwe hathu khuchi. Aaron na Kemetha ntsawa Pen wi npi kedu wi ma atssükizü nu keqhaikedi thsümeni hathu ha pvüyaben: linen gwomejuwa kaghazu nu patono kenkhangwa, ageshi keqhan, nu alikemejuthsü.
5Israel nyithu na kesami ghena kekinyi ji aneni süpon keni nu mecang pi kekinyi ghena khaghaneni süpon kesü tsüti pi Aaron cüben. 6Ma amesü süpon kesü pi ma nu ma theghi kesami sen bvü thsüale kesalina ahhansha sa chiben. 7Tsaseng wi ma aneni keni tsü sen nu Apvüwa ketenpen Nithsüjjen kedulen wi tsü wa. 8Ciwi ma alon keni, kesü “Apvüwa ghena” nu kepawa “Azazel#16.8: Azazel: Ibri jüh wi ha ma jjügi nchü; ha ayyikeshü tsaghang nyan saben laben ghena”, pi akezen wwi ben. 9Aaron na akezen wwi nu Apvüwa ghena kessikeyawa aneni tsüpi kesami ghena kekinyi hhansha saben. 10Azazel ghena kessikeyawa aneni tsü ma kahang pi Apvüwa cü nu anyithu kesami sen bvü thsüale kesalina pi yyikeshü wi Azazel wi kesun chilo.
11Aaron na ma nu ma theghi ghena amesü süpon pi kesami ghena kekinyi hhansha sa kechi wi 12ma kekinyipen wi anni khu wi annimihi keben nu hankedemvu kemehai awha keni khuya nu sen nu Kemetha ntsawa Pen wi ghoben. 13Ciwi Apvüwa tuwi ma hankedemvu pi anni wi chi, nu hankedemvu nikhu ya Cenkethenjüh Khitson keshan tsü shübhon thsü, nu ma tsü mu nu nshüle kesalina. 14Ma amesü jjü tsü pahan khuya nu ma kwenzza pi tenchi pi ma keshan atuwa mi tsü keghü chi nu tsaseng wi pi Cenkethenjüh Khitson tuwi tagü tughu keghü chiben.
15 #
Ibr 9.12. Tsaseng wi ma anyithu ghena kesami ghena kekinyi neni tsü pathi, ma jjü sen nu Kemetha ntsawa Pen wi gho, nu ma kishi amesü jjü pi kesa ti tsüpi ma keshan miwi nu tsaseng wi Cenkethenjüh Khitson tuwi keghü chiben. 16Ma hati nu Israel nyithu na mathu nkemetha nu kesami wina Kemetha ntsawa Pen wi tsü satekemetha keccüna tsü sa chiben. Ma Nithsüjjen wi ha nsathu yishü, kepaghenanye tsüna keccüna wi nmethala kemnanpen non wi tsü ben, 17Aaron na Kemetha ntsawa Pen wi satekemetha keccüna sale du nu npi keshhugho chu anyi thola Nithsüjjen wi tsü nbenla. Ma khathansha wi ma ketanla ma ghena, ma theghi nu anyithu ghena keccüna tsü saya khe, 18ma mecang pi kekinyi ghena kekinyipen wi wa tsü sametha nsathu yishü. Ma amesü süpon jjü nu aneni jjü pahan khuya nu sen wa kekinyipen ghacüthu miwi chi. 19Ma kwenzza pi ajjü tenya nu pi kekinyipen miwi tagü tughu keghü chiben. Hati nu ma Israel nyithu kesami wina tsü sametha pi metha thsüaben.
Nyu Kesami Kepvüwa Neni
20Khathansha wi Aaron na keccüna sa nu Kemetha ntsawa Pen, Apvüwa ketenpen Nithsüjjen, nu kekinyipen, sametha khe ma Azazel ghena kessikeya aneni kahangwa tsüpi Apvüwa cüben. 21Ma akwen keni qho pi aneni li miwi chi nu Israel nyithu nkemehai, kesami, nyu kematang kekuli tsüdila khishi, nu tsüthu pi aneni li miwi chiben. Tsaseng wi anyi kesü kessi ketheng tsü yala aneni tsü jügü pi ayyikeshü wi bvü thsüa. 22Aneni tsüna mathu kesami tsüdi pvü nu anyi hang nketen yyi wi bvüaben.
23 #
Ezk 44.19. Tsaseng wi Aaron na Nithsüjjen wi du nu ma Kemetha ntsawa Pen wi npi kedu wi pvükeya keqhaikedi thsümeniwa tsü khushi pi ciwi chi. 24Ma kemetha pen wi atssükizü nu ma thsümeni pvüya nsathu yishü. Tsaseng wi ccüna ma wala ma ketanla ma ghena nu anyithu kesami khupiale kesalina mecang pi kekinyi sa chiben. 25Ma kesami ghena kekinyi sa kethu tsüpi kekinyipen miwi mecang ben. 26Anyi kesü aneni jügü pi ayyikeshü wi Azazel wi wa thsü kesawa na ma kemnanpen wi npi kedu neng wina ma thsümeni ghasü nu atssükizü nsathu yishü. 27#Ibr 13.11. Kesami ghena kekinyi wi kesen amesü süpon nu aneni manyi jjü pi kesami sen bvü thsüale kesalina sen nu Kemetha ntsawa Pen wi keghowa sa tsü pvü wa kemnanpen na ameiwa mecang ben. Ma hyu, ma sa, ma kughung tsüdi pi mecang shaben. 28Anyi tsüthu pi kemecangwa na ma kemnanpen wi npi kegho neng wina ma thsümeni ghasü nu atssükizü nsathu yishü.
Ahhanshakesa Tsathang Tsü Kenie
29 #
Lev 23.26-32; Scs 29.7-11. Ayen hathu hana matsü ghaketen tsüdi wila nieben. Asha tagüwa ghanan taghawa wi tsü Israel nyithu nu asang mathu gweghe hang ketenthu na zi nu kekuli katsüha lela nsala. 30Tsü ghanan wi mathu kesami tsüdi satekemetha keccüna saben, isa nu mathu na keccüna wi metha shaben. 31Tsü tsathang tsüna kemetha tsathang, tsü ghanan wi mathu na zi nu kekuli mangla sa nben. Ayen hathu hana matsü ghaketen tsüdi wila nieben. 32Ma ba kuti sa thsüle mehaitsü khuthipi satemetha pi keqhaikedi sa thsü kethengwa na satekemetha keccüna tsü saben. Ma keqhaikedi thsümeni pvüya 33nu Kemetha ntsawa Pen, Apvüwa ketenpen Nithsüjjen, kekinyipen, keqhaikedithu, nu azitenti tsüdi satekemetha keccüna tsü saben. 34Ayen hathu hana matsü ghaketen tsüdi wila nieben. Israel nyithu na mathu kesami tsüdi wi satekemetha keccüna ha amapi kesü wi kuti saben.
Tsalina Mosa na Apvüwa kekhi ti sa.
Currently Selected:
LEVIYEN 16: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
