BVÜKESHHU 7
7
1Apvüwa na khi, “Hi no sapi kadimiwa Nyiza ti nu Aaron pi nghena atusenjüh-kechü ti nu ma wi ajühkhi thsüden. 2Hi no kekiza tsüdila khipi Aaron kizalo, nu ma kadimiwa wi Israel nyithu ya ma diyyiwa wina shhu thsülo kizaben. 3#Kek 7.36. Isala hi kadimiwa leben sapi dhu thsüaben, nu hi Ejipt wi amankesa kejon kuliben lela ma nshinyi jühkina nben. 4Tsaseng wi hi kemeten kedhu sengho Ejipt wi chi nu ayyi ciwi na inyi Israel nyithu ssishhu aben. 5Hi ikwen zanki pi Ejipt nyithu shun nu mathu diyyiwa wina Israel nyithu ssishhu lethu ciwi ccüna Ejipt nyithu na hi Apvüwa le kesa chüyaben.” 6Mosa nu Aaron manyi na Apvüwa na mangwa salo khi khe tsü kuli. 7Manyi ajüh pi kadimiwa wi kekhi tsü wi tsü Mosa na amapi achentazen nu Aaron na amapi achentazen nu kecheng saben.
Aaron Khhatssü
8Apvüwa na Mosa nu Aaron manyi wi khi, 9“Keujüla kadimiwa na nshinyi na chütha benle kesa amankesa kesü kuli chilothu Aaron na ma khhatssü pi kadimiwa tuwi cüchilo kizalo, isathu tsüna amaghang kesü ceng shaben.” 10Tsalina Mosa nu Aaron manyi na kadimiwa tuwi wa nu Apvüwa na manyi kekiza ti sa. Aaron na ma khhatssü pi kadimiwa nu ma kekhu wi kedithu tuwi cüchi nu tsüna amaghang kesü ceng shagha. 11Tsaseng wi kadimiwa na ma nyi kemetsathu nu demathu cighu chi, nu Ejipt nyi demathu na tsü makesü sachi. 12Mathu na mathu khhatssü pi cüchi nu tsüthu na amaghangthu ceng shagha. Isala Aaron khhatssü na mathu ji mejia. 13Apvüwa na khi ketheng ti cela kadimiwa na ma lebendhu ben wa, nu ma Mosa nu Aaron manyi jüh nkina.
Ejipt wi Adhaghathu na Kegho
Ajjü
14Tsaseng wi Apvüwa na Mosa wi kiza, “Kadimiwa na ma leben dhu ntsa nu anyithu yala nbvü thsüle hhaghe ben. 15Tsalina aghanen ma Nil Ghaku wi wa lethu wa ciwi ma metulo. Nkhhatssü amaghang ceng kesawa tsü khuya nu wa aghüsa wi ma hieben lalo. 16Kadimiwa wi kizalo, ‘Apvüwa, Ibri nyi Nyizawa na hi kesun pi no kiza thsüben, ma nyithu ya bvü thsülo nu mathu wa ayyikeshü wi ma kinyiya thsüle kesalina. Isala no khili kecu tsü nkina. 17#Ccü 16.4. Njenkebenwa, Apvüwa na khiben ma mangwa sa chile ben khe no ciwi na ma thowa khe chüyaben. Ghangchilo, hi ikhhatssü pi aghaku tssü kihhechiten nu tsüna ajjü ceng wa shaben. 18Anga na shü nu bighe pi Nil Ghaku na hansa ntsawa sapi Ejipt nyithu na ciwi atssü jjü meyala shaben.’ ”
19Apvüwa na Mosa wi kiza, “Aaron ya ma khhatssü sen wa Ejipt wi aghaku, atssü lenkehhi, nu acüceng tsüdi miwi chilo kizalo. Atssü na ajjü ceng, nu ayyi tsüdi wi achankhu nu ayyikhu wi lela ajjü saaben.”
20Tsaseng wi Mosa nu Aaron manyi na Apvüwa kekhi ti sa. Kadimiwa nu ma kekhu wi kedithu tuwi na Aaron na ma khhatssü zanki pi Nil Ghaku kihhechi, nu atssü mabenla ajjü ceng wa. 21Aghaku wi angathu na shü, nu tsüna bighe pi hansa kesalina Ejipt nyithu na ciwi atssü jjü meyala. Ejipt yyi tsüdi wi ajjü ketan sa. 22Kadimi nyi demathu la gho mathu kedema wina tsü makesü sachi. Kadimiwa na khili kecu wila ma leben dhu ben, nu Apvüwa na kekhi ti ma Mosa nu Aaron manyi jühkekhi tsü hhaghe. 23Kadimiwa na ha lela n-ghangchila kheneng ma kadipen wi wha. 24Ejipt nyithu tsüdila Nil Ghaku ghüsa wi atssükhang chhü, kepaghenanye mathu na aghaku tssü tsü jjü meyala kesalina.
25Apvüwa na Nil Ghaku tssü kihhekechi ghanan tagü wadha.
Currently Selected:
BVÜKESHHU 7: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
