BVÜKESHHU 15
15
Mosa na Zakeci Khwi
1 #
Ccü 15.3. Tsaseng wi Mosa nu Israel nyithu na akhwi ha pi Apvüwa saki:
“Hi akhwi pi Apvüwa sakiden,
kepaghenanye ma anyankethang sa khangyadha;
ma goruthu nu ma kessithu pi
atssükedone wi cüchidha.
2 #
Zak 118.14; Isa 12.2. Apvüwa na hi kekhwe kezüwa; ma hi hangsha kecüwa.
Ma iNyiza, nu hi ma sengden, iba Nyiza,
nu hi ma kadi cüki khipi akhwi saden.
3Apvüwa na aghikekhangwa, Apvüwa tsü ma nyan.
4“Ma Ejipt süpahizi nu gorugarithu pi atssükedone wi cüchia,
kedi kemehai ntsathu na Kenmie Tssükedone wi meyanthia.
5Tssükedone kedhu na mathu meyanbhonya;
mathu na alon ti atssü non wi dua.
6“Apvüwa, nkwen ajewa tsüna kemessi kekhang ntsa;
tsüna aghinyi pacha-paghe den.
7No ajenkeben kekhang wina no nankemeghüthu pasha;
nleben minu nu mathu pi amatsi ti mecang.
8No tssükedone mo neng pi misikhhali kaghashun thsü;
tsüna ajjen-keshon ti meshonqhe ngan wa;
tssükedone kedhu ntsawa tsüna ayyitsen sa.
9Aghinyiwa na khi, ‘Hi mathu jügü wa mathu ghan yaden;
hi mathu keben gishü nu hi keyamvu tsüdi khuyaden;
hi njünnu khushiya nu mathu keben tsüdi khuyaden.’
10Isala Apvüwa, nhathakissa kechi wi Ejipt nyi meyanthia;
mathu na shisha ti atssü kedhu non wi dua.
11“Apvüwa, acenpvü jawi thowa na no ti kesa ben nu?
Thowa kemetha wi amankesa no ti ben nu?
Thowa na no amankesa keti kekuli ti saya mehai nu?
12No nkwen ajewa chang chi nu ayyi na ithu nankemeghüthu meyia.
13Jühtsentsa sa nu no khishi kechi tsü nie,
no khushiya kesa n-nyithu ssisen;
no kezü wina mathu lentsütson sen nu no kemetha yyi wi wa.
14Mizatentithu na tsü zaya nu messi pi kedheggü;
Hathakina na Filistinthu miwi gho.
15Edom wi alikesathu na qhethiketen sa;
Moab nyi kekhangthu na kedheggü wa;
Kanaan nyithu na mathu kempvüza nmila.
16Gükeccü nu kemessi na mathu miwi gho.
O Apvüwa, mathu no kekhang mu,
nu n-nyithu no nssümagha wi khushiya kesathu,
tsüna npi kebvü chu mathu mangla sa meyala messi wa.
17No mathu ssi shhugho mathu pi n-yikha wi ben thsü,
Apvüwa, no nghena kessi ketheng apenwa,
no kekinyijjen sa kethengwa wi tsü.
18Apvüwa, no anuphanla kadimiwa saden.”
Miriam Khwi
19Israel nyithu na ayyi keqha wina atssükedone wi shhuya. Isala Ejipt nyi gorugari, mathu goru nu kessithu na atssükedone non wi dukeya wi Apvüwa na atssükedone ssi neng gho mathu meyanbhon ya.
20Atusenjüh-kechüwa Miriam, Aaron tssüggüwa na ma chünong khuya nu nza tsüdi ma sennie, achünong khou nu nashü. 21Miriam na mathu ghena akhwisa;
“Akhwi pi Apvüwa sakilo,
kepaghenanye ma anyankethang sa khangyadha;
ma goru nu mathu kessithu pi
atssü kedhu wi cüchia.”
Atssü Kekha
22Tsaseng wi Mosa na Kenmie Tssükedone wi Israel nyithu ssisen Shur yyikeshü wi wa. Mathu ghanan kecheng ayyikeshü pvüdhi lela ciwi atssü nmu. 23Mathu na Mara#15.23: Mara: Anyan hawa ha Ibri jüh wina “kekha” kesa apen kesü wi ghoya, isala ciwi atssü na kha ntsa kesalina mathu na tsü jjü meyala. Tsalina apen tsüpi Mara cia. 24Anyithu na Mosa wi leben-nkaghajüh khi, “Ikhang na mangwa jjü ten nu?” 25Mosa na ma leben chi ntsa nu Apvüwa wi khie, nu Apvüwa na achan kesü pi ma ccüca, ma tsüpi atssü wi cüchi; nu atssü na jjü mehai shhughoa.
Ciwi Apvüwa na mathu nie nu hanglo kesa ayenthu pi cü, nu mathu kemehai keteshi la ghan-nan. 26Ma khi, “Keujüla hi mangwa mehaile khi khe tsü kesa wi ijühkina, nu iyenkhukechithu tsü nie lethu hi kesakinaa sen nu Ejipt nyithu miwi kegho tsü kesüla pi nthu metenmesha nben. Hi Apvüwa, nthu sapi mehai kecüwa.”
27Tsaseng wi mathu na Elim wi ghoya, ciwi atssü kepvüpen taghakeni nu palm ton achentagü na ben; mathu wa atssü kete wi kemnanpen sanu ben.
Currently Selected:
BVÜKESHHU 15: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
