BVÜKESHHU 11

Mosa na Atssütsewa keshü Khishikechi

1Tsaseng wi Apvüwa na Mosa wi kiza, “Hi hewi kemeten kesütan kesun pi Ejipt kadimiwa nu ma nyithu miwi chi tendha. Tsaseng wina ma nthu ya bvü thsüaben. Ma he wina nthu jügüshiaben. 2Khili Israel nyithu wi kiza nu mathu ya mathu jenphonthu wi suna nu rükatssü nu alon menkedhu khieya thsülo.” 3Apvüwa na Ejipt nyithu sapi Israel nyithu nyuwakü thsüben. Ntsakhiwa, kadimi kekhu wi kedithu nu anyithu tsüdila Mosa na anyi kekhang kedi kesüle saben.

4Mosa tsaseng wi kadimiwa kiza, “Apvüwa na khiben, ‘Ghajanon wi hi Ejipt nyi jawi waden, 5nu Ejipt wi atsa tssütsethu tsüdila shüaben, tsüna kadimiwa tsa kadipen ghongya ketenwa na wa asusü keten nza nssümaghale tsa kecu. Asahang zza tssütsewa la tsüdi shüaben. 6Ejipt tsüdi wi kiqai hhai na pong shaben, tsüna kheni la tsüti npi sa nu haseng wila sa nben. 7Isala Israel nyithu jawi tsü affü nu mathu sahangthu lela khou nben. Tsaseng wi ccüna no hi Apvüwa, Ejipt nyithu nu Israel nyithu sapi kepapa sa kecüwa le kesa chüyaben.’ ” 8Mosa na hati khi nu asakhen sa, “Nkekhu wi kedithu tsüdi gho ituwi kukedu ben, nu mathu hewi inyithu tsüdi ssiya nu bvülo khieben. Tsaseng he wina bvüaben!” Isanu Mosa ma leben minu nu kadimiwa teshia.

9Apvüwa na Mosa wi kiza, “Hi Ejipt wi amankesa kejonla sale kesalina kadimiwa na njüh hhagheki benben.” 10Mosa nu Aaron manyi na kadimiwa tuwi amankesa hathu ha tsüdi kulichi, isala Apvüwa na ma sapi leben dhu thsüa, nu ma Israel nyithu yala diyyiwa tsü nteshi thsü la.

Currently Selected:

BVÜKESHHU 11: RENGNBSI

Highlight

Copy