KEKULI 25

Paul na Rom Kadimiwa wi Kekhie

1Festa na ghola ma yyi kecu ghanan kecheng seng wi Kaesarea wina Jerusalem wi wa, 2ciwi keqhaikedi ntsathu nu Judah nyithu na Paul keshun jüh sen nu ma tuwi gho. Mathu na Festa wi 3mathu kenenwa sa nu Paul pi Jerusalem wi gho neng thsülo khie, kepaghenanye mathu alenca wi Paul pathiale sa. 4Festa na luneng, “Paul pi Kaesarea wi atssüzü sa theng, nu hi la wan ciwi wa nengden. 5Tsalina nthu ccülikesathu ya hi gweghe Kaesarea wi wa nu ma sazzi theng lethu ma kimenni thsülo.”

6Festa na ghanan tazen nyelela tagha mathu gweghe ben theng nu tsaseng wi Kaesarea wi wa. Dhitsüwa wi ma ajüh kaghakhipen wi donkiya nu Paul ssinu gholo khichi. 7Paul na kegho seng wi Judah nyi Jerusalem wina keghothu na gho ma vüya nu ajüh nkemehai kejon khi pi ma kimenni, isala tsüthu tsüna ntsakhiwa le sa meya. 8Isala Paul na ma ketanla ma sheipi nu khi, “Hi Judah nyithu Yenwa, Kekinyijjenwa, nyelela Rom Kadimiwa keshun kekuli mangla sazzi ntheng.”

9Isala Festa na Judah nyi kenen pvüya mvu kesalina ma Paul wi keü, “No Jerusalem wi wala hi njüh hathu ha kaghaten thsü mvu ben kwe?”

10Paul na khi, “Hi Rom Kadimiwa jüh kekaghatenpen tu wi ngan ben, isathu khiewa wa ijüh kaghaten nu? Hi Judah nyithu tuwi mangla sazzi ntheng kesa no mehaitsü chüben. 11Keujüla hi ayen pahan pakhhi theng nu hi keshü qo kekuli sa theng lethu, hi nshüle kesa ghena alen bha nkesa. Isala keujüla mathu hi keshun jüh kekhi witsü atsentsa nmi lethu, thola hi pi mathu kwen wi chikeya nmi. Hi pi Rom Kadimiwa tuwi wa thsülo khieben.”

12Tsaseng wi Festa na ma kesansithu ccüneng nu luneng, “No Rom Kadimiwa tuwi wale kekhie ti no Rom Kadimiwa tuwi wayaben.”

Paul na Agrippa nu Bernis Manyi Tuwi Kewa

13Ghanan pahan seng wi Kadimi Agrippa nu Bernis manyi na Kaesarea wi anonkeghe sala Festa hhainan gho. 14Manyi ciwi ghanan keni kecheng keben seng wi Festa na Paul cüki khi pi Kadimiwa kiza, “He wi anyi kesü Felix na pi atssüzü sa theng, 15nu hi Jerusalem wi kewa wi Judah nyi keqhaikedithu nu keshenpfüthu na gho ma keshun jüh khi nu ma pi shü thsülo khie. 16Isala hi mathu wi kiza, Rom yen wina anyi kesütanla nyu ma shun kebenwa na ma nankemeghüthu metu nu ma ketanla ma sheikepi kekhi matsü pi npi kecü chu teshi chicü nten. 17Mathu tsüdi he wi saghuya nu hi matsü ndedila dhitsüwa ajüh kekaghatenpen wi donkiya nu anyi tsüwa tsü ssi gholo khi chia. 18Ma keshunthu na shaghala hi mathu nondi keben ti ma nkemehai cüki mangla khi meyala. 19Mathu na ma ssinu ajüh keccücanli kesa tsüdila mathu keccüna nu meshu kesü Jisu shü kesawa tsü, isala Paul na ma hangben le khi keten tsü cüki. 20Hi hathu ghena mathu jühkaghakhi meyala, tsalina hi Paul wi ma Jerusalem wi wala hathu ghena ma jühkaghakhi mvu benlenu keü. 21Isala Paul na kekhi na, ma pi aghikehiepen wi chi theng lanu Rom Kadimiwa yala ma jühkaghakhi thsülo khie. Tsalina hi ma kesun pi Rom Kadimiwa wi npi kechi chu ma pi aghikehiepen wi chi theng lalo kesa ahza khi chia.”

22Agrippa na Festa wi khi, “Hi la anyi hawa jüh kinachi mvu ben le!”

Festa na luneng, “No dhitsü wi ma jüh zayaben.”

23Dhitsüwa wi Agrippa nu Bernis manyi na ammi sala süpahi kedithu nu anyunuti tsüwa wi accülikesathu ssinu ajüh kekaghakhipen wi du. Festa na Paul ssi gholo kesa ahza khuchi. 24Festa na khi, “Kadimiwa Agrippa nu he wi ithu gweghe kebenthu tsüdi: Judah nyithu he wi kebenthu nu Jerusalem wi kebenthu tsüdila anyi hawa keshun jüh khi sengho hi cuden. Mathu jisha nu ma pi kahang thsü-u nyele khi. 25Isala hi ma keshü qo sazzi ketheng mangla mu meya. Nu ma ketanla ma Rom Kadimiwa tuwi wale kekhie ghena hi ma kesun pi ciwi chile kesa südheya. 26Isala hi ma cüki mangla chüti kesa zhü pi Rom Kadimiwa cükeya nmi. Tsalina hi ma ssinu nthu tuwi nu Kadimiwa Agrippa tuwi gho ben le! — isanu ma ghankenan seng wi hi ma cüki pahan zhüyale kesalina. 27Kepaghenanye ituwi tsü atssüzü kesa ma keshun cüki mehaitsü zhütha nchila kesun kechi jjügi mangla nmi.”

Currently Selected:

KEKULI 25: RENGNBSI

Highlight

Copy