KEKULI 23

1Paul na hoho ghang nu khi, “Hi Israel nyithu, hi Anyiza tuwi kahang cüki ha ileben wi mangla kesütu kesa nmila methasi ben.” 2Keqhaikedi ntsa Ananiya na anyi pahan Paul kete wi ngan kebenthu na ma pang cen cülo khi. 3#Mat 23.27-28 Ciwi Paul na ma kiza, “No kemiki pi agacü nyen kethengwa! No ayenwa kenie wina ijühkaghakhi le ciwi donki ben, isala no mathu na ipang cen cülo kekhi wina ayenwa tsü pakhhi ben.”

4Anyi pahan Paul kete wi kebenthu na ma wi kiza, “No Anyiza wi Keqhaikedi ntsawa kimenni ben le!” 5#Bvü 22.28 Paul na luneng, “Hi Israel nyithu, hi ma Keqhaikedi ntsawa kesa nchü le! Ntsawajüh na ‘Nthu na nthu nyithu miwi kekhang kesenthu wi ajüh nkemehai nkhi lalo,’ khiben.” 6#Kek 26.5; Fil 3.5 Paul na anyi tsü khang jawi pahan na Sadukithu nu pahan na Farisithu kesa mukeya wi ma hoho wi magha nu khi, “Hi Israel nyithu, hi Farisi tsa nu hi la Farisi kesü. Hi anyi ha keshü wina hangneng-shagha ben kesa kenondi ghena he wi ijühkaghakhi ben le!”

7Ma ajüh ha khichi meyi Farisithu nu Sadukithu jawi kitagha shagha nu mathu ajüh kepapa sa. 8#Mat 22.23; Mrk 12.18; Luk 20.27 (Kepaghenanye Sadukithu na anyi ha keshü wina hangneng-shagha nben nu ciwi tangnyilothu nu aghamuthu la nmi; isala Farisithu na tsü kecheng qho nondiden.) 9Anyithu kejisha tsüna misi pfüpfü shagha, nu Farisithu jawi Ayenkesansithu pahan na shagha khang ntsa nu khi, “Ikhang na anyi hawa ha kesazzi mangla mu meya le! Ha aghamu nyelela tangnyilo kesü na ma kiza benla metsiben!”

10Ajüh keccücanliwa tsüna kivvü ntsa shagha kesalina benchüwa na mathu Paul zandhi-zanghe nashe kesa messiya. Tsalina ma süpahithu ya anyitenti jawi wa Paul zan sen wa aghikehiepen wi chilo khi.

11Tsü ghaja Apvüwa na gho Paul kete wi ngan nu ma wi khi, “Nmessi lalo! No he Jerusalem wi icüki pi khichidha, nu no wa Rom wila tsüti nsathu yishüben.”

Acho sa pi Paul Kahang Yale kesa

12Ghanenwa wi Judah nyithu na saghu nu acho kesü kidenya. Mathu na Paul npi pathikeya chu dsajjü ntenle kesa kishen. 13Ciwi meshu jügha gilli na acho ha kidenya. 14Tsaseng wi mathu na keqhaikedi ntsathu nu keshenpfüthu wi wa nu khi, “Ikhang na Paul npi pathikeya chu dsajjü ntenle khila kishendha. 15Tsalina no nu hoho na Paul cüki chütiyale kesa ghe sala ma ssinu he wi gholo kesa ajüh pi Rom benchüwa kizalo. Isanu ma he wi npi kegho tuwi na ikhang ma pathiaben .”

16Isala Paul tssüggüwa tsa na acho ha chüya nu wala aghikehiepen wi du nu khi pi Paul kiza. 17Tsaseng wi Paul na kedi kesü cichi nu khi pi ma kiza, “Pvüza hawa ha ajüh pahan pi Rom benchüwa kekiza ben na ma ssi wa ma wi chicülo.” 18Kediwa na anyi tsü ssinu Rom benchüwa wi wa nu khi, “Atssüzüwa Paul na hi cichi nu pvüza hawa ha no wi ajüh pahan pi kekiza ben na ssinu no wi walo kiza.”

19Rom benchüwa na anyi tsü kwen zan sen wa ma kepa sa nu ma wi keü, “No mangwa pi hi kiza le ben nu?”

20Ma khi, “Judah nyi kekhang kesenthu na dhitsü wi Paul cüki chütiyale kesa ghe sala ma ssinu hoho tuwi gholo kesa no wi khie tenle centheng. 21Isala mathu jüh nkina lalo, kepaghenanye anyi jügha gilli na kuthi nu ma hieben. Mathu tsüdila Paul npi pathikeya chu mangla dsajjü ntenle khila kishendha. Mathu khili tsüti sale njüh khukechi hie ben.”

22Benchüwa na khi, “No ajüh hapi hi kizadha le kesa pi thola nkiza lalo.” Isanu ma pvüzawa tsü kesun pi bvü thsüa.

Paul Kesun pi Ahng Felix wi Kechi

23Tsaseng wi benchüwa na ma kekhu wi kedi keni cichi nu kiza, “Süpahi meza keni, gorukessithu achentagü, nu apie kesenthu meza keni gweghe shita amighe tugu wi Kaesarea wi wale kesa ghena kiden yalo. 24Goru pahan pi Paul ghena khuchi nu ma yala yazishu wala Ahng Felix cuya thsülo.” 25Tsaseng wi benchüwa na lesü hati zhüpi cüchi:

26“Klaudia Lusia na zhü pi ajenkebenwa ahng Felix cüben: Shalom saben. 27Judah nyithu na anyi ha ghanya nu ma pathiale saben. Hi chükeya ma Rom nyi kesü kesalina hi süpahithu ssi wa ma khushiya. 28Hi mathu mangkesa na ma kimenni ben khe chüyale kesalina ma ssinu mathu hoho wi wa. 29Ciwi hi ma keshü-u nyelela pi atssüzü kesa-u sazzi ketheng mangla mu meya, mathu na ma kimenni kebenwa na mathu Yenwa tsü ghena. 30Hi Judah nyithu na ma pathiale acho kiden benle kesa chükeya wi ma kesun pi no wi chiale kesa südheya. Nu ma nanmeghü kebenthu na ntuwi wala ma kekimenni jüh khilo kesa kizadha.”

31Tsalina süpahithu na ajüh tsü kekina wina mathu aghaja na Paul ssi wa Antipatri cuya. 32Dhitsüwa süpahi alenketsenthu na kheneng sen nu aghikehiepen wi ghoa, nu gorukessithu na ma ssi wa thsüa. 33Mathu na ma ssinu Kaesarea wi wa, nu lesü kezhü tsü nu Paul pi ahngwa kwen wi chi cüa. 34Ahng na lesü kezhü tsü si nu ma Paul na ayyi khiewa kahang nyi nu kesa keü. Ma Paul na Silisia wina ghole kesa chükeya wi 35ma khi, “Hi no nankemeghüthu na gho ccüla njüh kinaden.” Tsaseng wi ma Paul ssi wa ahng jjen aghikehiepen wi chilo kesa ahza khuchia.

Currently Selected:

KEKULI 23: RENGNBSI

Highlight

Copy