TSIPWESWÜ 4
4
Levi tsipwe Kohath Kaminyu Tho
1Npugü le Mosa ka zoshü 2Levi tsipwe Kohath pfüphun kako lo kamimi thyüo temi swü, 3lo Npugü kehü Phika günyu tha thyülokegwa pechenyu chen shenryü kagü henpvün keti jaka nyu aphu zan thu lolo tse shü. 4Anyugun tho le thatho kenshün tsin dan.
5Johidanhi Npugü le pe Mosa tsüshü. Kensenbin kela kethyü ka, Aaron lo anyudan le Phika günyu yüo, Kejozenkelo Khinpha gü mhundyü nyu süden kebin phigü khishe pe Khinpha gü hen lati. 6Lo thyügi kegwa pe tsü jelao phi kenzi pe a-so hen la njüo kepenvü pe a-hensin rhishü lati.
7Anyugun le phi kenzi pe tensü pe Npugü kerüshvu miz gü hen lao khundan, tharünkegwa keshü khundan, kerüshvu khundan lo vainzu pe kerüshvu honpen dan aphu pe a-ge shü lati. Miz gü ge tensü no bin zin ti. 8Anyugun le phi kenhon pe hi aphu so hen lao thyügi kegwa pe tsü jela lo kepenvü pe a-hensin rhishü lati.
9Anyugun le phi kenzi pe makenbenbin lo makhin dan, ketsevü, kepenkhun, lo olivterzkeshü hon dan aphu hen lati. 10Anyugun le thyügi kegwa pe tsü lo tsükanyü aphu jelao pe kepenbin nme ge shü lati.
11Tsüsika anyugun le phi kenzi pe suna pe kethyü kershvubin gü hen lo-o thyügi kegwa pe jela njüo kepenvü pe a-hensin rhishü lati. 12Anyugun le kenshün bin nyu kesen lalü aphu pe phikenzi ka jwe pe thyügi kegwa pe jela njüo pe kepenbin nme ge shü lati. 13Anyugun le kershvubin gü nyu jonbü khü lao phi kemeren pe a-so hen lati. 14Kershvubin nyu kera ka sen kehü: maketsevü, hükesü, kekhüvü, khunda dan lo kanyükecha aphu pe tsüge shü lati, Anyugun le thyügi kegwa pe je lao kepenvü pe a-hensin rhishü lati. 15Kensenbin kela kethyü ka, Aaron lo anyudan le kenshün hon dan lo tsünyu kanyü dan je kü la lo Kohath pfüphun nyu no ryüo tsü pen ti. Kohath pfüphun nyu no kenshün hon dan kesü nya, anyugun sila loshvu.
Lihi kae phika gü sentin kethyü tha hidan hile, Kohath pfüphun le thyüti.
16Aaron Püshükeda gü nyugü, Eleazar le Phika gü apentha makhin genyu ter, tharünkegwa, shyepe kerüshvu, yünkehü ter lo thyükenshün pe Npugü tsü kela phika günyu kebin aphu shwi ti.
17Npugü le Mosa lo Aaron au ka zoshü 18“Kohath nyu pfüphun nyu no 19Kenshün hon dan kho nni ryüo sila nya. Hihontse mvu nrün genyu Aaron lo anyudan no yügü anyugun nmeme tho lo no nyu pen tiyo zoshü mvu loshvu. 20Ai Kohath nyu le Phika gü nyu yügü Püshükeda dan le kenshün hon dan sentin nrün genyu nda nron kebin hyushü lo anyugun le si lati.”
Levi Tsipwe Gershon Kaminyu Tho
21Npugü le Mosa ka zoshü 22Levinyu Gershon pfüphun kako lo kaminyu temi swülo, 23lo Npugü kehü Phika günyu thathyü lo kegwa pechenyu chen shenryü ka gü henpvün keti jaka nyu aphu zan thu lolo tse zoshü. 24Tha hidan kepen le anyugun jün: 25Phika gü, kanyu zin kehü, ka tegwezin kehü, katsun ki kehen thyügi kegwa gü, khenpvü kesunphi, 26Phika lo kershvubin kamhun kesunphi lo rondan, kamhun khenpvü kesunphi dan lo tha hidan pe shü kethyü ka kesen kanyü aphu. Tha hidan hi genyu mvulo keshvu aphu anyugun le thyüti. 27Mosa lo Aaron au le Aaron lo anyudan le pe Gershon nyu no thyü lo pvü lo tse keshü dan shwiti. 28Phika nyu thatho hidan hile Gershon pfüphun le ketsen ti. Anyugun le Püshükeda gü Aaron nyu gü Ithamar hensin nyu hidan thyüti.
Levi Tsipwe Merari Kaminyu Tho
29Npugü le Mosa ka zoshü Levinyu Merari pfüphun kako lo kaminyu temi swülo, 30lo Npugü kehü phika günyu thathyülo kegwa pechenyu chen shenryü ka gü henpvün keti jaka aphu zan thu lolo tse zoshü. 31Phika gü karun, kapha, kachon lo kachon phasin, 32lo kachon, kachon phasin, ketsevü lo phika gü kamhun kehun ron dan lo tsü tunso kehü kanyü aphu kepen tsü le anyugun tho. Temi nme le kanyü zan nmeme kepen tsü le a-tho. 33Hidan hile Phika gü lotho nyu Merari pfüphun jün: anyugun le Püshükeda gü Aaron nyugü Ithamar hensin nyu tha hidan pen ti.
Levinyu Temi Keswü
34-48Npugü le jozokeshü hontse Mosa, Aaron lo anyugun dan nyu sharhi dan le Levi pfüphun kenshen, Kohath, Gershon, lo Merari dan swülo. Anyugun le tsipwe kochwikeryü lo kami thyüo Npugü kehü Phika günyu thathyülo kegwa pechenyu chen shenryü ka gü henpvün keti janyu aphu zan thukelo le hihontse:
| Pfüphun | Temi |
|---|---|
| Kohath | 2,750 |
| Gershon | 2,630 |
| Merari | 3,200 |
| Kerhün: | 8,580 |
49Npugü le Mosa ka johokeshü hontse temi nmeme zan thu lo; lo Npugü le Mosa ka johokeshü nyu nmeme lotho nmvue a-le pen nrün a-jün tho pe tsüshü.
Currently Selected:
TSIPWESWÜ 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
