TSIPWESWÜ 28
28
Thyü sun Kehü Kerüshvu
(Chw 29:38-46)
1Npugü le Mosa ka johoshü 2a-no Israel nyu senthyü shüo Sunggigü le a-kenyü kehü ketyüketsü kerüshvu dan gwenkho to ka pe a-tsü nrün genyu.
3Pe Npugü tsü nrün ketyüketsü kerüshvu le hidan hi: Khenyütsen rope kerüshvu, a-ge tetsin kendi tanyü chenme nyu kenyhun. 4Lonyü tanyü nme lo ngwün gü tenyü nme, 5shye pe kerüshvu genyu tho kilogram nme pe oliv ter kegwatsin liter nme kerhüo rüshvuti. 6Hile Sinai kazüthun ge rüshvu teri shüo khenyütsen rope rüshvu kehü a-rün Npugü le a-kenyü nrün ketyüketsü kerüshvu gü. 7Lo tanyü keri gü kesin-o vainzu pe kerüshvu genyu kershvubin ka vainzu liter nme pe jashü mvu loshvu. 8Ngwün gü tanyü kenyhun gü pe vainzu kesin-o lonyü gü hontse rüshvu ti. Tsüko Npugü no a-rün kenyü nrün ketyüketsü kerüshvu nme.
Sabbath Nyü Kerüshvu
9Sabbath jon nyü tanyü a-ge tetsin nme kendi chenme nyu tse kenyhun, shyepe kerüshvu genyu tho kilogram kenyhun pe oliv ter kerhün lo vain zu tse pe rüshvu ti. 10Khenyütsen vain zu kesin-o rüshvu kehü nyeki Sabbath tsenyü rope kerüshvu higü thyüti.
Shye jon Kerinyü Kerüshvu
11Shye tsen jonkeri ka rope kerüshvu thyü pe Npugü tsüti: Methu tsebwe kenyhun, tanyü tse nme, tanyü tse chenme nyu tsenyü, tsü aphu tetsin kendi mvu loshvu. 12Lo shye pe kerüshvu le oliv terzü pe kerhün-o methu tse nme genyu tho kilogram kenshen lo tanyü tse nme genyu kilogram kenyhun; 13lo tanyü nyu nme genyu kilogram nme. Rope kerüshvu hidan hile, a-rün no Npugü kenyü kethyü ketyüketsü pe kerüshvu. 14Lo vainzu pe kerüshvu le, mathu tse genyu liter kenyhun, tanyü tse genyu leter nmeo peha lo tanyü nyu genyu liter nme tseti. Hile chen ka shye jon keri aphu ka rope kerüshvu jvu le. 15Khenyütsen vainzu pe sin-o rope kerüshvu thyü kehü nyeki tenyü tse nme pe kemu genyu kerüshvu thyüti.
Kebushükemvu Tensü Nga Ka Kerüshvu
(Lev 23:5-14)
16Shye keri gü jonryü pezi nyü Npugü kerühvu ka Nkenkela Nga nda soti. 17Jonryü pvün nyü binzen lo-o jontsenyü nga ti, lo tsü jaka kebushükemvu tensü nti tyüti. 18Nga jonkeri nyü kequen-o rüshvuti, lo thatho nme thyü loho. 19Tsünyü a-ge tetsin nme kendi methu tsebwe kenyhun, tanyü tse nme lo tanyü tse chenme nyu tsenyü tse pe ketyüketsü pe kerüshvu hontse rope Npugü ki shüti. 20Lo Shyeni pe kerüshvu oliv ter pe kerhün kethyü tho methutse nme genyu kilogram kenshen, tanyü tse genyu kilogram kenyhun, 21lo tanyü nyu nme genyu kilogram nme pe shüti. 22Lo tenyü tse nme kope kemu genyu kerüshvu thyüti, hihontseo temi dan thyü nshün kelo rora thyüti. 23Lonyütsen rope kerüshvu thyü kehü nyeki hidan hi thyüti. 24Jon tsenyü hihontse, a-rün Npugü le a-kenyü nrün ketyüketsü pe kerüshvu thyüti. Khenyütsen rope kerüshvu lo vainzu pe kerüshvu nyeki kerüshvu hi gü thyü sinti. 25Jon tsenyü nyü kequen-o rüshvuti lo thatho nme thyü loho.
Logvü Nga Ka Kerüshvu
(Lev 23:15-22)
26Logvü nga jon kerinyü hagun le chenshün pe Npugü tsü kethyü ka kequen-o rüshvu ti, lo thatho nme thyü loho. 27Lo a-ge tetsin nme kendi methu tsebwe kenyhun, tanyü tse nme lo chen me nyu tanyü tse tsenyü tse pe a-rün Npugü no a-kenyü nrün rope kerüshvu thyüti. 28Shyeni pe kerüshvu, oliv ter lo kerhün kethyü tho methu tse nme genyu kilogram kenshen, tanyü tse genyu kilogram kenyhun 29lo tanyü nyu nmeme genyu kilogram nme tse pe rüshvuti. 30Lo tenyü tse nme kope kemu genyu kerüshvu thyüti, hihontse temi dan thyü nshünkelo rora thyüti. 31Khenyü tsen rope kerüshvu lo shyeni pe kerüshvu thyü kehü nyeki hidan lo vainzu pe kerüshvu thyüti.
Currently Selected:
TSIPWESWÜ 28: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
