TSIPWESWÜ 19
19
Methu Kenhon gü kero Jonbü
1Npugü le Mosa lo Aaron au ka johoshü, 2tejvu hidan pe Israel nyu tsüshü lotse. Methu kenhon a-ge tetsin kendi lo khipe thatho thyümvu shü kethyü nme senryü Mosa lo Aaron au tsüshülo, 3lo au le khipe püshükeda gü Eleazar tsü shüti. Tsü sen kensenbin tegwe ki chwi gü a mhundyü ka dushvu loti. 4Tson-o Eleazar le a-zi peha khipe a-zenkero no ntsen-o gwentsenyü ge kejen pe Phika gü kipon shüti. 5Püshükeda gü mhundyü ka senru gü, a-gi, a-thyü, a-zi, lo a-ri apentha ro lati. 6Tson-o püshükeda gü le sedar sen peha, hyssop lo ron kenhon nme shwe pe mah günyu shüti. 7Tsüsika, a-le a-phinya thula lo zülu lao kensenbin nyu yü logwa; ai a-le nshünmvu bin-o ngwün gü titi. 8Methu ro kethyü gü ko a-phinya thula lo zü jape a-ge shüla mvuloshvu; ai a-ko nshün mvu bin-o n gwün gü titi. 9Tson-o kenshün nyu nme le methu gü kero jonbü khükequen pe kensenbin tegwe ki bin kenshün nme ka shü lati, pe tsüka shü njüo Israel nyu süda no nshünkemvu sentin kela zü ndanron kethyü ka senti. Kemu sentinla nrün genyu rora hi thyüshü. 10Jonbü gü khü kequen kethyü güle a-phinya thula mvu loshvu tson-e nshünmvu bin-o ngwün gü titi. Hile Israel nyu lo tesin hagun dan nyu yhun kebin nyu genyue kethonthen tejvu nme thyüti.
Kesimi Kesü Kethyü
11Ligü higü kesimi kesü yatselo jon tsenyü nshünmvu bin ti. 12A-le thyükenshün kethyü genyu jon shen nyü lo jon tsenyü nyü zü gü pe a npvü a-thyü kenshün la mvu loshvu; tsonlo a-le nshün lati. Ai a-le jonshen lo jontsenyü nyü a-thyü kenshün mvula yatselo, a-le nshün lo kemvui. 13Lihigü simi kesüo a-npvü a-thyü kenshün la kemvu gü le nshünmvu bin ti, thyünshün kethyü zügü pe a-gwen kemvu genyu. A-le Npugü Phika gü nrhubin, lo a-lope Sunggigü temi nme tse rüchün sinmvu lati.
14Temi nme le phika nme nyu si yatselo, a-kesi gwenkho ka tsünyu kebin nyu nmvue ligü higü tsünyu yü keryü nyu le jon tsenyü nshün mvu binti. 15Phika tsünyu laki lo la a-kesen kendi aphu nshünmvu lati. 16Temi peha le tegwenki mele dushvu kenjü, nmvue a-npvü kesi nmvue temi ru nmvue sika kesü yatselo jon tsenyü nshün mvu binti.
17Nshün kemvu sentinla nrün genyu methu kenhon kemu sentin la titse ro kethyü jonbü peha khipe la nme ka shüo zü kenshün ja pe shülo. 18A-keri le temi kenshün nyu nme no hyssop chwe me pe zü günyu ntsen lo njüo kejen pe phika gü, tsünyu kebin kanyü lo temi dan aphu geshü. Kenyhun gü le kenshün nyu peha no zü gü kejen pe temi ru, nmvue simi nmvue sika kesü kela gü geshü. 19Jon shen lo jontsenyü nyü kenshün nyu no zü gü kejen pe nshün kemvu gü geshü. Jon tsenyü nyü a-le temi gü thyü nshün ti, tsügü le a npvü a-phinya thula lo zü jape a-ge shüo, yhüko keche tsüle nshün lati.
20Ligü higü nshünmvu lao a npvü a-thyü kenshün la kemvu gü le nshünmvu binti, thyünshün kethyü zü gü pe a-gwen kemvu genyu. A-le Npugü phika gü nrhubin, lo a-lope Sunggigü temi nme letse rüchün sinmvu lati. 21Ryükejü gwenkho aphu nyu hagun le tejvü higü thenti. Thyükenshün nrün genyu zü kejen keshü gü kono a-phinya thula mvu loshvu; zü gü kesü keshünyu ligü higü nshün mvu bin-o ngwün gü titi. 22Tha lihie temi nshün kemvu gü le kesü kela tsüle nshünmvu so, lo ligü higü tsü kesü kethyü gü le nshünmvu bin-o ngwün gü titi.
Currently Selected:
TSIPWESWÜ 19: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
