MATHI 22
22
Senhü Keho Jokejvü
1Lo tsüsika Jisu le jokejvü dan me pe tsüdan ka zoni. 2“Tsangge keda le Rajanyu nme le a-nyu no tenulo-o me zen-o ho kethyü a-keme. 3Tsükatsü a-le gonyu dan me nipe no senhü keho nyu ryülo tseo ko pe bin kenjü dan koshü; ai anyugun le ryü nyü mvula. 4Tsontsin a-le go kecha dan me nishüo anyugun ka, hagun gungü ko pe bin kenjü ju ka, ‘Hire, ale keho gü ndo penlo laso; athu tse, lo a senru aphou kegwa dan boshvu njü so; tson-o tha aphu ndo penlo laso; tsügenyu hagun senhü keho nyu ryülo gwünlo, tsonshü gwün nye,’ tsonshü. 5Ai anyugun le jo tsü rüchün kenshenlo njüo anyugun npvü anyugun kendo ki tin küla, temi nme le a-low kitsüla, kechanyu nme le a-npvü a-hathyü gunla. 6Lo a-sen ju le a-gonyu dan tenlo njüo anyugun dushvula. 7Tsontsin Raja gü tsüle a-nyun ntalo njüo me dukeshvu tsüdan nkela, lo anyugun rünyi-e rola. 8Lo tsüsika a-le a-gonyu dan me ka, ‘Senhü keho ndo pe bin laso; ai kope bin kenjü dan le ryülo kümvu laso. 9Tsügenyu hagun tsoncho nyu gungü temi hyukelo aphu no senhü keho hinyu ryülo tse zoshü nye.’ 10Tsontsin a-gonyu dan le gungü tsoncho tsonda nyu kegwa keshvu hyukelo aphu ko zen ryüo kequenlo; tson-o senhü keho tsünyu temi le ryüo sülo.
11“Ai Raja gü le me ko zen gunryü kebin tsüdan nri titse chwiryü ntsin, yügü senho keho tsünyu keho phinya senkemvunyu nme hyulo. 12Tson-o a-ka, ‘Apvügü, senhü keho nyu phinya sen mvutse nyuthyüo yüryü bin nla?’ Tsontsin temi tsügü le jozolo nrün ndila. 13Lo tsükatsü Raja gü le a-gonyu dan ka, ‘Hagun a-pha a-ben phinlo njüo ten pe tegwen kezün ki shüla nye; tson-o no tsünyu chü lo a-hü keta tse bin ti.’ ” 14“Tsühontse ko kelo nyu we chonsa ai kejükelonyu we rho.”
Khajana Keshvu Rüla Ketsokethyü
(Mk 12:13-17; Lk 20:20-26)
15Tsüsika Farisinyu ju le gungü a-jo kezo nyu a-ten kelo rüchün-o kenthon. 16Tson-o anyugun le anyugun sikethen nyu nipe Herodianyu sin-o nipe a-ki shüo a-ka, “Senkethyü gü, nle joketsin zo hünyo, lo nle temi nme-e nshvu hü kemvu agun le shabin nyo; kechamvule nle nkenyünyu sha kecha thyü hü kemvu genyu. 17Tsügenyu nkerüchün gü pe agun ka zoshülo; Kaisar khajana pe ketsü le a-zü le mvula.”
18Ai Jisu le anyugun nyun serikemvu shalo njüo, “Hagun kerokon kehü ju, hagun le nyuthyüo asemen hü nla? 19Khajana pisa pe ahishülo.”
Tsontsin anyugun le nme pe a-hishü, 20tsüka Jisu le anyugunka, “Hile segü men la, lo segü zan le bin nla?”
21Tsükatsü anyugun le a-ka, “Hile Kaisar men le,” tsonshü.
Tsüselo a-le anyugun ka, “Tsonlo Kaisar hon pe Kaisar tsüla, lo Sunggigü hon pe Sunggigü tsüla lo,” tsonla.
22Tsüselo anyugun le jo tsü sha pe anyugun dun thyülo njüo a-khelao tinla.
Rhüni Keso Rüla Ketsokethyü
(Mk 12:18-27; Lk 20:27-40)
23Tsünyü tsü rhüni keso ndi tse kehü Sadukinyu dan le ryüo a-ketso. 24Senkethyü gü, Mosa le agun ka, “Temi nme le anyenyu ndio sila yatselo a-sikezen gü no a-tsagü tsipwen yhun shülo, tson hü. 25Lo nduka agun dan nyu tsa sikezen gü kethyü mi tsenyü le bin hü; lo tsüka keritsingü le tenulo-o a-tsipwen nme ndio silao a-nu khe pe a-sikezen gü tsüla. 26Lo kenyhun güe lo kenshen güe tson gungü tsenyü tila. 27Lo tsühontse anyugun aphu sila, lo tenugi ko sila. 28Tsügenyu rhünni keso ki tenunyu tsügi le anyugun digü nu thyü mon? Tsüdan aphu a-lo kü kethyü genyu.”
29Ai Jisu le anyugun ka, “Hagun le ketsin lesü lo Sunggigü joe shamvuo thyüzü kehü gwünzin le. 30Kechamvule rhünni keso ki tsüle tenu-e lolo ho lo kalue loho, tson-o tsangge lokethyünyu hontse bin tinla hünyo. 31Lo rhünni keso rüla Sunggigü le, ‘Ale Abraham Sunggigü, lo Isak Sunggigü, lo Jokob Sunggigü le,’ tson zope bin kenjü hagun le swü mvu ole? 32Sunggigü le kesinyu rüla kipon mvule rhünlo nrün nyu rüla kipon le.”
33Tsontsin temi dan le jo tsü shalo njüo a-jo genyu anyugun dun thyüla.
Johokeshü Keda Tsingü
(Mk 12:28-34; Lk 10:25-28)
34Tson-o Farisinyu le Jisu le Sadukinyu jo nnyi kemhenla kethyü shalo njüo gungü kequenlo. 35Lo anyugun dan nyu tejvü keshanyu nme le a-semen titseo a-ka tha nme ketso so. 36“Senkethyü gü, tejvü nyu jo digü le jo keda tsingü la?”
37Tsontsin Jisu ale tsügü ka, “ Nle nnyun aphu, lo nkeyhun aphu, lo nkerüchün aphu sen-o n Npugü Sunggigü so, lo rühvulo nye.” 38Jo tsügü tsü le jo keda tsin le. 39Lo tsühontse tsügü sikae, “Nle nkazonkazin so pe nnpvü nkeso hontselo chi,” tson keshü gü tsü. 40Tejvü gü aphu lo sidyükeshanyu jo aphu jo tsühvu tsü pe a-jobin thyü kü.
David Nyugü Rüla Ketsokeshü
(Mk 12:35-37; Lk 20:41-44)
41Lo Farisinyu le ryüo kequen ketseka Jisu le anyugun ka, tha nme ketsoshü. 42“Khrista rüla hagun le nyu rüchün hü nla? A-le segü nyu la?”
Tsontsin anyugun le a-ka, “David nyugü le.”
43Lo Jisu le anyugun ka, “Tsonlo David le nyuthyüo Kapu no a-tson tsin-o a-ka, ‘Npugü’ tse a-ko hü nla? David le zo,
44‘Npugü le a Npugü ka:
Ale n shwikerüchün nyu khipe npha
hensin nyu shüla kemvuthen,
Nle aben njüzin binlo ta’ tson hü nla?
45David le a-ka, ‘Npugü’ tse ko yatselo a-nyu thyü logwa ti ole?”
46Tsontsin temi nme-e a-ka thame zolo nrün ndila; tsüntimvule tsünyü gerho nyu temi nme-e a-ka tha ketso sin nshvula.
Currently Selected:
MATHI 22: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
