LEVINYU 25
25
Chen Tsenyü Gü
(Tej 15:1-11)
1Npugü le Sinai kazüthun ge Mosa ka 2tejvu hidan pe Israel nyu tsüshü lotse zoshü. Hagun le Npugü le pe hagun ketsü kazü günyu yülolo, chen tsenyütsen hagun le lotsü mvuo Npugü rühvuti. 3Chen tsero hagun le hagun low nyu ntsishü, hagun vain low ketsükela lo hagun rasha fü kequen loti. 4Ai chen tsenyü gü le kazü no rüyü shükelo, thyükenshün pe Npugü tsü kela chen. Hagun low nyu ntsishü nmvue hagun vain low ketsü kela nya. 5Ntsi shümvuo a-npfü yhun chwikeryü low tsü gvü nmvue ketsükela kemvu vain sha lükequen nya; tsüle kazü gü no rüyü shükelo chen. 6Tsü chen low tsümvu lae kazü tsüle ketyüketsü pe hagun, hagun gonyu, hagun jonshe nyu, tesin hagun dan nyu yhun kehü dan, 7hagun senru lo hagun low nyu kehü tehen thyü dan-e tsüti. Tsünyu yhun chwi keryü lihie tyü logwa.
Rani A-binka Ryükela Chen
8Chentsenyü gwen tsenyü swüshülo, kesin le chen henzio tekü. 9Tson-o shye tsenyü jonryü, rora kethyü jon gü nyü temi nme nipe no kazü apentha ka shu khun shü. 10Hihontse hagun le chen henpvün gü pe kecha thyüo kazü günyu keyhun nyu aphu ka hoshü kela zo senshülo. Higü chen hi jwe kela dan aphu ranio a-kerika a-hon thyü kebin gü nmvue a-tsipwen ka gü lati, lo do jwe kela nyue rani a-kami ki gü lati. 11Hagun le hagun low nyu ntsishü, nmvue a-npfü yhun chwikeryü gvü nmvue ketsükela kemvu vain sha lü kequen nya. 12Chen tsügü apentha hagun genyu nshün: hagun le low gü le a-npfü yhun keshü nti tyüti. 13Higü chen jwe kela hon aphu ranio a-keri ka a-npunyu benyu gü lati. 14Tsügenyu hagun le kazü pe hagun Israel nyu ka jwe nmvue hei-e a-zükemvu thyünya. 15Kazü gü ranilo la nrün mhundyü chen dikho kazü gü le nsha shülo gwayo tsü rüchün-o a-minthoti. 16Chen kechon bin yatselo a-min chon, ai chen chonmvu yatselo a-min rho kvuti, jwe kebin gü tsüle kazü güle gwendikho nsha shü logwayo tsü genyu. 17Israel nyu npfü Israel nyu sa nya, ai Npugü hagun Sunggigü jozen lo.
Chen Tsenyü Gü Ketekhile Kebin
18Kenshvu ndio kazü günyu yhunlo nrün genyu Npugü tejvu lo johokeshü dan aphu zenlo. 19Tson yatselo kazü güle nsha shüti, lo hagun le tyümvulo keshvu aphu hyulo-o kenshvu ndi tse yhun loti.
20Ai peha le ntsishümvu lo lü kequen mvu lalo chen tsenyü gü ka nyu tyü mon tson ketso logwa. 21Npugü le chen tsero gü ka jochü pe kazü gü ge shüo tsüle chen hvu genyu ketyüketsü senbukeho khishü lati. 22Chen tetse chen hagun le hagun lonyu ntsi shü kebin gwenkho tsüle chen tsero gü ka gvü kelo tyübin ti, lo tsü chen shü keshü gvü lo kemvu then hagun le tyübukeho le bin ti.
Hagun Hon Ranilokela
23Kethonthen genyu hagun kazü jwe lanya, tsü le hagun hon kemvu genyu, tsüle Sunggigü hon, hagun no tesin hontse tsü senkebin gwenzin.
24Kazü jwe kethyü ka, ka zü npugü le hei nilo kegwa a-kenjü le kebin tsü sha mvuloshvu. 25Israel nyu nme le tha ndio a-kazü jwe mvuloshvu la yatselo a-shvunye a-khokeni tsin güle tsü hei loti. 26A-shvunye tsü heini kelo temi kendinyu nmele siki nnyakenye lo-o a-npugü tsü hei nilo kegwa thyü logwa. 27Tsonlo ryü kejü ranilo kela chen genyu a-le a-mi thyüpe hei kelo gü tsü mvuloshvu; a-le a-kazü lonilo nrün gwenkho ka. 28Ai a-le kazü gü hei nilo kegwa pisa ndiyatselo, tsüle ryükejü ranilo kela chen keti heilo kela gü ben ka bin ti. Tson-o tsü chen ranio a-kerika kazü npugü ki nigü lati.
29Temi nmele chwida le kebin nyida nyu ka jwe yatselo a-le jwe kela chen gü nyu tsü hei nilo kegwa a-kenjü le bin nyo. 30Ai a-le chen me jaka hei nilo mvula yatselo tsüle kethonthen hei kelo gü lo a-tsipwen hon thyü lati; Jubilee chen tsü rani loho. 31Ai chwida kendi rünyi nyu ka dan we pe lobu hon tse ti; a-kerika npugü le hei nilo kegwa a-kenjü le bin lo Jubilee chen rani shü lati. 32Tson-e, Levi nyu dan we pe anyugun ketsü nyida nyu tsü lihi gwenkho ka-e anyu hon heini logwa. 33Levinyu nme le nyida nyu a-ka nme jwe lao hei nilo mvu yatselo Jubilee chen tsü rani shü la mvuloshvu, nyida nyu Levinyu ka tsüle Israel nyu dan nyu kethonthen anyugun hon genyu. 34Ai Levinyu nyida kehun tehenyhun kebin kazü dan we jwe lo nrün ndi, tsüle kethonthen anyugun hon.
Thape Kendinyu Ketepu
35Nkhoka yhunkebin npfünyu Israel nyu nmele tha ndi, a-npfü a-gin pen loho bin yatselo nle zonshe nyu zen kehü hontse a-genyu mvulokeshvu pe tsümvu loshvu, a-no nkhoka yhun hü nrün genyu. 36A-ge a-kechwi lonya, ai Sunggigü nshvuo Israel nyu güno nkhoka yhunlo. 37Nle pisa pe a-tepuo a-kechwi lo nmvue ketyüketsü pe a-ka jwe-o kechwi lonya. 38Hile Npugü n Sunggigü, Kanan kazü pe ntsü lo n Sunggigü thyü titseo Ijipt nyu nzenchwi keryü gü ahza le.
Do Hokeshü
39Nkhoka yhunkebin npfü gü Israel nyu nmele tha ndi shü lao a-npfü a-jwe pe ndo hontse laya tselo, nle a-no do tho hontse thyü nya. 40A-le zonshe nyu nme hontse nzen bin-o tsüsi gü Jubilee chen titi. 41Tsügwenkho ka a-nyenyu lo a-ko nkheo rani a-kaminyu lo a-pvübon hon ki gü lati. 42Israel nyu le Npugü do, a-le Ijipt ki a-nyugun zen chwiryü; tsügenyu anyugun jwe pe do thyülo nrün ndi. 43Anyugun ge njvu gwamvu nya, ai n Sunggigü jozen lo. 44Nle do zenmvulo shvuyatselo tsipwen nhunpfü kebin dan hei logwa. 45Hagun le tesin hagun zen yhunkebin dan nyenyue hei logwa. Hagun kazü nyu nnyun kelo nyu dan pe hagun hon thyü logwa, 46lo khepe hagun nyu tsüo anyugun le rhün kebin then no pe a-lothyü logwa. Ai hagun pfünyu Israel nyu ge we hagun jvu gwamvu nya.
47Hagun zen yhunkebin tesin nmele nnya lola lo npfü gü Israel nyu nmele tha ndio a-npfü a-jwe pe tesin tsügü nmvue a-kaminyu nme do thyüla. 48A-jwe kela siki-e a-hei nilo kegwa a-le a-kenjü bin nyo. A-tsasikezen nme 49nmvue a-nyo, a-da, a-shvunye kecha le a-heini logwa; nmvue a-le nnya lo lo a-npfü a-hei logwa. 50A-le a-hei kelo gü zen-o a-jwe keshü güka ryükejü Jubilee chen keti swüo zonshenyu chün katsü a-min thao a-hoshü ti. 51-52Chen binzun kethyü dan tsü rüchün-o a-heikelo mi peha rani mvuloshvu, 53chen meme genyu a-zonshe zen kebin hontseo. A-npugü le a-ge a-jvu gwamvu nya. 54Hihontse kethyü nyu a-hoshü mvubin lo Jubilee chen a-nyenyu lo a-ko hoshü lamvu loshvu. 55Israel nyu le Npugü do genyu kethonthen me do thyülo nrün ndi. A-le Ijipt nyu a-nyugun zen chwiryü; A-le Npugü anyugun Sunggigü.
Currently Selected:
LEVINYU 25: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
