LEVINYU 22
22
Kerüshvudan Kenshün
1Npugü le Mosa ka zoshü 2pe Aaron lo a-nyudan ka zoshü lotse, “Hagun azan kechen la mvu nrün genyu Israel nyu le khikho pe aketsü kenshün kerüshvu hon dan rühvulo. Ale Npugü. 3N tsipwen nme le a-le nshünmvu kebin ka Israel nyu le khikho pe a ketsü kenshün kerüshvu dan kho nniryü yatselo, a-le kershvubin ka lothyü nilo nrün ndi. Hile ryükejü gwenkho aphu nyu honti. Ale Npugü.
4“Aaron tsipwen nme nyu le tyü nmvue a-ge tsun chwiryü kehü güle nshün lokemvu kawe kerüshvu hon kenshün dan tyülo nrün ndi. Püshükeda nyu lihigü simin kesüo nshün mvula nmvue a-phouzü tsunla, 5nmvue nyukhu nshünkemvu nmvue temi kesüla yatselo. 6Püshükeda ligü higü nshünmvu kela güle nshünmvu bin-o ngwün gü titi, lo a-le zülu la kemvuthen kerüshvu hon kenshün dan tyülo nrün ndi. 7Yhüko keche siki a-le nshün laso, lo kerüshvu hon kenshün dan tyü logwa tsüle a-chvü. 8A-le nyukhu a-npfü kesi nmvue ntün thyü tyü loho; tsüle a-nrhu la logwa; Ale Npugü.
9“Püshükedanyu aphu ale khikeshü tejvu gü thenti. Kemvu we, anyugun le a tejvu kenshün gü then mvutse mu lao si lati. Ale Npugü anyugun thyü kenshün keshü gü.
10“Püshükedagü kaminyu nti a-me, temi kecha püshükeda gü zen kebin nyu nmvue a-le zonshe zenkehü nyu le kerüshvu hon kenshün dan tyü loho. 11Ai Püshükeda güle a-raka pe heikelo a-do, nmvue a-kanyu nnyunkelo nyu le püshükeda güle hyukelo chvü gü tyü logwa. 12Püshükedagü nyugi le püshükedanyu kemvu ki kalu layatselo a-le kerüshvu hon kenshün dan nme tyü loho. 13Ai püshükedagü nyugi nme a-nyenyu ndio magi nmvue a-nyepfü le a-kheo rani ryü a-pvü kanyu bin hü yatselo a-pvü le hyukelo chvütsü tyü logwa. Püshükeda nyu kami nti tsü lihie tyülo kegwa gwen zin.
14“Püshükeda kami kemvu nmele shamvuo kerüshvu hon kenshün tyüla yatselo, a-le tsümin lo tsünyeki tsi ka jün nki sin pe Püshükedagü tsüla mvuloshvu. 15Püshükeda nyu le kerüshvu hon kenshün dan nrhu lanya 16tyülo tseshü kemvu nyu no tyüo; hile kemu lo shaja senryü temi tsühontse kethyü nyu ge shü logwa. Ale Npugü ale kerüshvu thyü kenshün shü kehü gü.”
17Npugü le Mosa ka zoshü 18tejvu hipe Aaron lo a-nyenyu dan lo Israel nyu temi aphu tsü shülo. Israel nyu nmvue tesin Israel nyu dan nyu yhun kebin ligü higü, a-le zoshwishü kenjü nmvue a-kendo thyüo rope kerüshvu hoshü yatselo, senru gü tsü no a-ge tetsin kendi mvuloshvu. 19Lolo nrün genyu tsüno tse a-ge tetsin nme kendi mvuloshvu. 20Hagun le senru lihie tetsin kepfü khishü yatselo Npugü le tsü lo loho. 21Ligü higü a-le zoshwishü kenjü nmvue a-kenyü ka kepvüshe kerüshvu khipe Npugü ketsüka no lotiyatselo tsü no tetsin nme kendi mvuloshvu. 22Senru lihie a-yhükepo, kenyho, a-pha a-bu ketü, kethyüshvu kepfü nmvue kenkhü pe Npugü tsünya. Senru tsühontse kethyü nme pe ketyüketsü kerüshvu thyüo kershvubin ge shü nya. 23Nle nkenyü nyu rüshvu kethyü ka senru gonri nmvue penmvu kethyü khishülo gwa, ai zoshwi kenjü thyüpen kethyü nyu we tsü lo loho. 24Senru lihie a-züshe boshwe, duthü, boketa nmvue borhen kela pe Npugü tsünya. Hagun kazü nyu hihontse thyü loho.
25Tesin ki senkeryü senru lihie pe ketyüketsü pe kerüshvu thyünya. Senru tson kethyü tsüle tetsin kepfü, tsü lo kemvui.
26-27Methu, tanyü nmvue tenyü nme le nchelo yatselo jon tsenyü a-pvü zenbin mvuloshvu, ai tsü siki we pe ketyüketsü kerüshvu kethyü loti. 28Methu nmvue tanyü nmvue tenyü metse khenyü me jon nyü a-pvü a-nyu dushvu kesin nya. 29Chenkeno kerüshvu pe Npugü ketsü ka a-no lolo nrün genyu tejvu dan thenlo; 30tsü jon nyü tsü tyülo, tsü nsen bin-o lonyü gü tinya.
31Npugü le zo, “Ajo hokeshü zenlo; Ale Npugü. 32Azan kenshün bo nrhu nya; Ale nshün, Israel temi aphu sha mvulo shvu. Ale Npugü lo ale hagun thyü nshün shü kehü gü; 33lo Ale hagun Sunggigü thyü titseo Ijipt nyu hagun zen chwiryü kela gü. Ale Npugü.”
Currently Selected:
LEVINYU 22: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
