LEVINYU 10
10
Nadab lo Abihu le Mukela
1Aaron nyu Nadab lo Abihu au le mah kepen khun kentsenlo-o magi rokebin lo tharün kegwa pe shü sen-o Npugü ki gü. Ai Npugü le au no mah senryü lotse johoshü kemvu genyu tsü le nshün mvu. 2Npugü le whütse mah nishüo tsüka Npugü mhundyü nyu au ro shvula. 3Tsontsin Mosa le Aaron ka zoshü, “Npugü le, ‘A lothyü kebin nyu aphu akenshün rühvu mvuloshvu; ale a-zankechwi pe atemi dan hiti tsezokebin tsü le hile,’ ” tsonshü. Ai Aaron le nramvula.
4Mosa le Aaron a-nyo Uzziel nyu hvu Mishael lo Elzafan koshüo zoshü, “Hika ryüo kenshün phika ka hai tsasikezen hvu mi pen gü kensenbin tegwen ki shü lalo.” 5Tson-o au le Mosa le zokeshü hontse ryü kesi hvu phinya sülo njüo pen chwigü kensenbin tegwen ki shüla. 6Tsüselo Mosa le Aaron lo a-nyu Eleazar lo Ithamar tseka zoshü, “Hagun le chechü kebin zansü hagun pe sümvu nmvue phi sürhen pe mehi nya. Hagun le tson shülo silati, lo Npugü nyunkenta le temi apentha ge ryüti. Ai hagun Israel nyu aphu no Npugü le mah nipe roshvu kela hvu chechü logwa. 7Hagun le sila loshvu laryü phika gü khenpvü nken nya, yün kehü Npugü terzü gü pe hagun thyü kenshün lo kela genyu.” Tsügenyu anyugun le Mosa le kezo hontse thyü lo.
Püshükedanyu Le Then Nrün Tejvu
8Npugü le Aaron ka zoshü, 9“Nle lo nnyudan le zu nmvue beer tsüpfüo ale kehü phika günyu yü nya, tsonya tselo hagun le siti. Hile ntsipwen dan aphu then nrün tejvu nme. 10Hagun le nyu le Sunggigü hon lo nyu le kedukeru ka sen tiyo, nyu le nshün lo nyu le nshün mvuyo shakekho mvuloshvu. 11Lo hagun le ale Mosa no pe hagun tsükeshü tejvu dan aphu pe Israel temi senthyü mvuloshvu.”
12Mosa le Aaron lo a-nyu hvu Eleazar lo Ithamar ka zoshü, “Ketyüketsü kerüshvu thyüpe Npugü ketsü ka nsen kebin shyeni pe kerüshvu tsü khi pe kebu shükemvu tensü tsen lo-o kershvubin gü khoka tsü tyülo, kerüshvu higü le nshün sa kethyü genyu. 13Bin kenshün nme ka tsü tyülo; tsüle ketyüketsü pe Npugü kerüshvu ka nle lo nnyu dan jün le. Npugü le aka tsü hontse zo shü le. 14Ai a-nyü lo a-pha tsü le nle lo nkaminyu le tyülo gwa, tsüle püshükedanyu genyu jwe kerüche thyü pe Npugü tsükela hon. Hagun le bin kenshün ka tsü tyü logwa. Hile Israel nyu le kepvüshe kerüshvu ka khipe nle lo nnyenyu dan tsükela hagun jün. 15Ketyüketsü kerüshvu thyü pe Npugü ketsü hontse anyugun le thyü keshvu khi keshü gwenkho ka a-pha lo a-nyü senryüti. Npugü le johokeshü hontse hidan hile kethonthen nle lo nnyenyu dan hon thyüti.”
16Mosa le kemu rora genyu tenyü gü rüla ketsoshü laryü tsü pe rola le tse shalo. Hi genyu a-le Eleazar lo Ithamar au ge a-nyunta-o au ka, 17“Nyuthyüo hai le kemu rora hon tsü kenshün bin nme ka tyü mvula? Tsüle nshünsa, Npugü le temi dan kemu sentinla nrün genyu tsü pe hai tsüshü. 18Tezi tsügü sen phika kenshün günyu ryümvukela sigenyu, ale johokeshü hontse hagun le tsüka rora hon tsügü tyüla zü.”
19Aaron le zoni, “Ale nthu kemu rora hvu tyü lalo Npugü le a-kendo ti ole? Temi dan le nthu anyugun kemu rora thyü pe Npugü tsü lo rope kerüshvu sen ryü, ai ntsokhin age hihontse kenrin hidan thyü bin nle.” 20Mosa le hi nyülo njüo rünyula.
Currently Selected:
LEVINYU 10: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
