JOHAN 4
4
Jisu Le Samarianyu Tenunyu Nme Zenkenthon Kethyü
1Lo Jisu le Johan nyeki meno senthyükelo thyü chonlo njüo baptaiz thyükelo Farisinyu le shala kethyü Npugü le shalo. 2Tson-e Jisu le a-npvü me baptaiz thyü mvule a-sikethen nyu dan le thyüshü hü. 3Lo a-le Judia khela njüo Galil lojvü ki ni gunla titse bin. 4Lo a-le Samarianyu lojvü pvüthü gun mvuloshvu bin.
5Tson-o a-le gü nduka Jakob le lobu nme pe a-nyu gü Josef tsükeshü khoka Sikar tsekethyü Samarianyu rünyi nyida nme tilo. 6Lo tsünyu Jakob zülvu le bin, tsüka Jisu le tsonchüo a-tson rüzi lao gü zülvu khoka binlo, lo tsügwünkho ka tsüle nhennyu hokho ka.
7Tsüka Samarianyu tenunyu nme le zülü ryü; tsüselo Jisu le a-ka, “Zü pe ano tsü ta.” 8Lo tsükatsü Jisu le a-senthyükelonyu dan we ketyüketsü hei titseo rünyi nyida gü nyu chwila.
9Tsüselo Samaria nyu tenugi le a-ka, “Nle Judanyu lo ale Samarianyu tsele nyu tsethyüo aka zü hi hü nla?” (Kechamvule Judanyu le Samarianyu zen-o thame tyütsü hü kemvu genyu.)
10Jisu le a-ka, “Tenugi, nle Sunggigü tha zansü, lo nka, zü pe ano tsüta, tsonkeshü gü sha kethyü we,nle aka tha hiti, lo ale kerhün zü pe ntsüti atale.”
11Tenugi le a-ka, “Kedagü, nle thame pe zü thyülo nrün ndi, lo zülvu le ntsun. Tsonlo nle dikipon kerhün zü hyulo tila? 12Nle zülvu khipe agun ketsü apvü Jakob nyeki gon ole? Jakob-e lo a-nyenyu lo a-senru dan-e nduka hinyu zü tsü ryü?”
13Jisu le a-ka, “Temi lihigüe zü higü ketsü gü we teri nila ti. 14Ai temi lihigüe ale zü lope a-tsüshüo tsükelo gü we thame kae teri nilo ho; tsüntimvule ale zü pe a-tsüshü titse kebin gü we a-nyun ki zü le penchwi keryü zülvu thyüo gü kethonthen kerhün ti loti.”
15Tenu tsügi le a-ka, “Kedagü, ano terimvulo nrün genyu, lo ryüo hithen laki zü lü mvulo nrün genyu nle zü tsügü lope atsüshü ta.”
16Jisu le tenugi ka, “Nle gü nnyepvü kozen ryü chi.”
17Tenugi le a-ka, “Anyepvü ndi.”
Jisu le a-ka, “Nle anyepvü ndi, tson kezo tsüle zo tsentsü shü laso. 18Nnyepvü le mipvün thyü laso, lo ntsoka nzen kebin gü tsüle nnyepvü kemvu. Njo hile a-ketsin zoshü laso.”
19Tenugi le Jisu ka, “Kedagü, nle sidyükeshanyu nme tsekethyü ale shalo laso. 20Agun pepvünyu le nduka kazüthun higü ge hi rüshvu hü, ai hagun we temi no gü rüshvu kehü kazü Jerusalem nyu bin letse hünyo.”
21Jisu le a-ka, “Tenugi, ajo tenyelo chi, gwüngwa nme ka hagun le kazüthun hige hi, nmvue Jerusalem nyue Apvü rüshvu mvula nrün gwünkho le ryü zhü nyo. 22Hagun we a-rüshvu kehü gü sha hümvu; awe ale rüshvu kehü gü shao rüshvu hü; Kechamvule kenikelo tsüle Judanyu ge chwiryü binla kethyü si genyu. 23Ai ketsin thyüo rüshvu kehünyu le Kapu lo ketsin nyu rüshvu kelo gwünkho le ryüzhü, lo ntsokae ryü bin laso, kechamvule Ngun Pvü le ngun no shao a-kerüshvunyu thyü titse fü kehü genyu. 24Sunggigü tsüle Kapu gü lo a-rüshvu kehünyu le Kapu lo ketsin nyu rüshvu mvuloshvu.”
25Tenugi le a-ka, “Mesia Khrista, tse kehügü le ryü zhü tse kethyü ale shabin nyo, a-le ryülo tha phu zo pe me hiti.”
26Lo Jisu le a-ka, “Nzen kenthon kebin gü hile tsügü tsü le.”
27Tson kebin ka a-le senthyükelonyu dan le ryüo a-le tenunyu zen kenthon kebin hyu shüo anyugun dun thyüla; ai temi nme-e tsügi ka, “Nle nyu shanyü ola?” nmvue a-ka, “Nle segü zen kenthon bin nla?” tson kethyüe shün shü mvu.
28Lo tsükatsü tenugi le a-laki khela njüo rünyi nyida gü ki chwigü meka zoshü. 29“Hagun chwiryüo temi nme nrishü re! A-le ale thyükela aphu pe aka zoshü. A-le Khrista gü tsü ole nyu tsethyü yono?” 30Lo anyugun le nyida gü nyu tin-o Jisu ki chwiryü.
31Lo tsükatsü senthyükelonyu dan le Jisu ka, “Senkethyü gü, chvü tyü lota.”
32Ai Jisu le anyugun ka, “Ale hagun le sha hü kemvu ketyüketsü nme le bin nyo.”
33Tsügenyu senthyükelonyu dan le khinyunyu ka, “Peha le ketyüketsü pe a-tsüshü ole?”
34Lo Jisu le anyugun ka, “A ketyüketsü tsüle a nikeshü gü kenyü thyü titse lo a-tho thyü titse kethyü genyu. 35Hagun le logvü ti nrün le shyezi le bin zun, tson hü mvu ole? Hire, ale hagun ka zoshü ti, hagun nyiso gü low nrishü shwi; tsüle chon pe gvülo gwa laso. 36Gvü kehünyu le a-chün hyulo hünyo, lo a-sha fü pe kethonthen kerhün nyu shülo hünyo, tson-o ntsi kegwün gü lo gvü kehü gü le kengüo a-sherhün bin hünyo. 37Lo nme le gwün hü, lo kechanyu le gvü hü, lo tsonkethyü tsü rüchün keso le a-ketsin. 38Ale hagun nipe hagun le kenjünthyü shü kemvu ki gvülo tse hünyo; me kechanyu le kenjün thyüshülo hagun no tsüdan tho nyu keyü gwünzin.”
39Lo tenu tsügi le, “Ale thyükela aphu a-le aka zoshü,” tson-o a-rüla zokeshü genyu nyida tsünyu Samarianyu kechon le Jisu tenyenlo. 40Tson-o Samaria nyu le a-ki ryüo a-no anyugun zen binlo tseo a-ka hi. Lo a-le jonhvu anyugun zen bin.
41Lo a-jo genyu temi kechon le tenyen sinlo. 42Tson-o anyugun le tenugi ka, “Agun le ntsoka we njo nti genyu tenyen lo mvu; kechamvule agun le a nyetin pe nyülo laso; lo higü hile kazü kenikelo gü ketsin tsekethyü shalo kela genyu.”
Jisu Le Peshünyu Nmenyu Thyü Ngwakeshü
43Lo Jonhvu sika a-le tsünyu tin sen-o Galil nyu gunla. 44Sidyükeshanyu le a-rünyi nyu we teshwen kepvü ndi letse kethyü Jisu le zoshü. 45Tson-o a-le Galil nyu gunryü kelo ka a-le Jerusalem nyu nga ka tha thyükeshü kehyu genyu Galilnyu ko a-zenlo. Kechamvule anyugun ko nga tsünyu gun kethyü genyu.
46Tson-o a-le zü lope vain zü thyü keshü Galil lojvü Kana rünyi nyu niryülo. Tsükatsü Kapernaum nyu thakeshanyu nme le a-nyu pechenyu nme le ho bin. 47A-le Jisu le Judia lojvü ki tsonchü sen-o Galil lojvü nyu ryü kelo ka, a-le Jisu ki gun-o a-no gü a-nyu thyü ngwashü lotseo hi, a nyu le si güzhü kela genyu.
48Jisu le a-ka, “Hagun we tha zansü lo nduntho hyu kemvu we thame kae tenyen hümvu.”
49Peshünyu tsü gü le a-ka, “Kedagü, nle anyu le kesi mhundyü ryülo.”
50Jisu le a-ka, “Nle gunla, nnyu le rhünlo ti!”
Temi tsügü le Jisu le a-ka kezo jo tenyenlo njüo gunla. 51Tson-o a-le gun kezhü ka a-gonyu le ryüo a-zen ketenolo njüo a-ka, “Nnyu le rhünlo laso!” tse zoshü.
52Tsontsin a-le anyugun ka, “A-le di gwünkho ka rhün soryü la?” tsonkethyü ketsoshü. Lo anyugun le a-ka, “Ndu tegi nme kevü gwünkho ka a-le rüka mvula.” 53Tsontsin ntsenyu gü a-pvü le, Jisu le tsügwünkho ka, “N nyu le rhünlo ti,” tsonshü kethyü shalo njüo a-ko lo a-kaminyu aphu tenyenlo.
54Tsügü ka tsüle Jisu le Galil lojvü nyu tha zansü thyükeshü kenyhun gü.
Currently Selected:
JOHAN 4: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.