JEREMIAH 49
49
Npugü le Ammon gen Jokekera
1Higü hile Npugü le Ammon nyu rüla kezo: “Israel temi le dikipon binla? Nme-e anyugun kazü nopen kethyüi ndi ole? Nyuthyüo anyugun le Molech tero rüshvu kehünyu no Gad tsipwen lojvü nkhenlo-o tsünyu yhun tinla ola? 2Ai gwünkho nme le ryüjü, tsünyü anyugun nyida Rabbah nyu keyhun nyu no teri khwen nyüti, tsüno nkela lo a-rünyi dan ro lati. Tsüselo Israel nyu le anyugun kazü lokelo nyu ben nyu anyugun kazü khi nilo lati. 3Heshbon temi dan, nrashü! Ai rünyi le nke laso! Rabbah nyeginyu ju, chechülo! Ronphi benlo-o chechü lo. Kevükeben-o tinshü. Hagun tero Molech lope a-püshükeda ju lo a-rajanyu sin-o zengü dothyü lati. 4Nyuthyüo hagun joketsin zokemvunyu le ketekho hü nla? Nkekvu le ndi güjü laso. Nyuthyüo n npvü ntenyen-o temi nme-e pecheo hagun when kemvui letse hü nla? 5Ale lihizin kenshvu zen-o hagun gen ryüti. Hagun aphu tin lati. Nmeme tse a-keyhun genyu tinti. Lo temi nme-e hagun shüpahü ko kequen ni lomvu lati. 6“Ai ale kenkhin ki Ammon nyu no gwakenye niloti. Ale Npugü, tsü zo laso.”
Npugü le Edom gen jokekera
7Higü hile Kekvutsin Npugü le Edom rüla kezo: “Edom temi dan le kensü ndila ole? Anyugun dan nyu tharhinyu le anyugun no tha thyümvulo keshvu zo nilo kemvui sole? Anyugun kensü aphu nmhenla ole? 8Dedan temi dan, ranio tinlo! Kebulo! Ale Esau tsipwen nkela titse bin nyo, kechamvule ano shaja pe anyugun tsü nrün gwünkho le ryü laso. 9Mele vainsha lükethyü ka peha khela hü, lo kerühu nyu le kheje gwen ryülo anyugun le lokenyü gü nti khilo hü. 10Ai ale Esau tsipwen thyü pe kenben la lo anyugun kekebu bin le ndola, tson-o anyugun le kebulo kemvuiso. Edom temi aphu nke laso. Anyugun nme-e n senmvu. 11Hagun dan nyu tegonyu khe pe atenyenla, ale anyugun nuchalo lati. Hagun maginyu le ansüo yhunlo gwa.
12“Shaja thyü kü kemvu nyu ai shaja honpen gü tsümvulo hola yatselo, hagun le shaja thyümvuo bin logwa letse rüchün hüle? Nmvu, hagun le honpen gü tsümvulo shvu! 13Ale Bozra nyida pe kershvu kethyü lo kazü kesi nme thyüla titse swe la so; temi dan le tsü shwinyü lo a-zan zope shochün thyüti. Akho ryünyi aphu a-zintse nke bin ti. Ale Npugü, tsü zo laso.”
14Ale zoshü, “Edom, ale Npugü ki jolo nme le bin. A-le jolonyu nme nishüo senye dan no anyugun rihü kequenlo-o nwhen nrün genyu gwen ndo lotse bin. 15Npugü le nthyü pe kvumvula, lo nme-e nrühvu mvu lati. 16Nketekho le nsa laso. Nme-e nle rüchün kehü hontseo n-nshvu mvu laso. Nle kazüthun raki tso khin gen yhunhü; ai nle logi hontse tetsosa ki bin hü yatse-e Npugü le nsüshye lati, Npugü le zo laso.”
17Npugü le zoshü, “Kenke Edom gen ryükejü gü tsüle ketetsin thyüti, lo temi lihigüe tsü nken kegü nyu le a-kerü lo dunthyü lati. 18Sodom lo Gomora lo au kho rünyi dan nkekela tsü hontse Edom gen ko thyü shüti. Temi nme-e tsünyu yhun nikemvui. Ale Npugü, tsü zo laso. 19Jordan züri kerhon chün kentsun nyu shünyho le shai kenjvü gü ka chwikeryü hontse, ale ryüo Edom temi dan no whütse anyugun kazü mhundyü tinti. Tsüselo ale kejü kelo sharhi gü le senye tsügü so gonti. Segü lope azen kendyü logwa la? Segü le pecheo akhen loti la? Kekvukesen segü le a ntsunlo tila? 20Tsügenyu ale tedo rhipe Edom temi ntsun titse kebin, lo Teman nyida temi dan ge ale nyu thyü nyü bin yo nyülo. Anyugun nyenyudan-e süzen tinla, lo aphu kershvu lati. 21Edom le chela lo a-khwen le kazü apenthae nnila nrün hontse shü, lo anyugun kenshvu kechü khwen le gungü Aqaba kenchon keti nyü loti. 22Kenrhigü le logi le a-sekin sükhun pvüo tsükeryü hontse Bozra whenti. Tsü jon nyü Edom shüpahü dan le nshvu pe nyeginyu nyukezen kenjün kethyü hontse lati.”
Npugü le Damaska gen jokekera
23Higü hile Npugü le Damaska rüla zokeshü: “Hamath lo Arpad nyida hvu nyu temi dan le jolo gwakemvu nyükelo genyu nyun kenjün thyülo kevü bin laso. Keyhunkerun kethyü le zida kentyü hontse anyu ge binlao matse binlo mvu laso. 24Damaska temi dan le kvukemvu genyu nshvuo tinla. Anyugun le kenjün thyü lo rhodyü pe nyeginyu le kenjün thyükebin hontsela. 25Zankechwi nyida a-kenyüsa kehü gü le keleshü laso. 26Tsüjon nyü tsonda dan ka a-nyenyu selo dan boshvu lo anyugun shüpahü aphu nke lati. 27Ale mah pe Damaska chwida kehun gen shü lo Raja Benhadad kedabin dan rolati. Ale Kekvutsin Npugü, tsü zo laso.”
Kedar tsipwen lo Hazar nyida gen jokekera
28Higü hile Npugü le Kedar lo Hazor le sen kebin kazü dan Babilon rajagü Nebuchadnezzar le lolo kela dan rüla Npugü le kezo, “Kedar temi whenlo, lo npho kipon temi dan nkelalo! 29Anyugun phika lo senru dan, phika kesun lo anyugun phika nyu kebin aphu khilo. Anyugun Ut dan sülo-o temi dan ka zolo, ‘Kenshvu le hagun hun laso!’ ”
30“Hazor temi dan, Ale Npugü, hagun no nithen ki tin-o kebulo tse hünyo. Babilon rajagü Nebuchadnezzar le tedo rhipe n ntsun-o zobin: 31‘Ryülo! Ngun le temi anyunkhin mvu lo nshvumvu kebin dan tsü when tile! Anyugun nyida le khinrun nmvue khincha ndi lo a-kehun ndi shüle.’
32“Anyugun Ut dan lo senru aphu seü lola! Ale temi a-pe thu pe zükela dan tsü hükezen pe tson aphu nyu shü, lo bin aphu nyu kenjün kethyü zen ryüo anyugun gen shüti. 33Hazor no kethonthen kazü kesin thyüo mesükerun nti no kehü bin thyüti. Temi nme-e tsünyu yhun nimvu lati. Ale Npugü, tsü zo laso.”
Npugü le Elam gen jokekera
34Zedekiah le Juda raja thyülo ntsin, Kekvutsin Npugü le Elam kazü genyu aka zo. 35A-le zoshü, “Ale Elam thyü nko keshü levükepennyu aphu dushvu lati. 36Ale lihizin, tsangkenbu no nbu pe Elam whün, tson-o a-temi no kazü nme kae gükemvu ndi la kemvuthen hükezen shüti. 37Ale Elam temi no anyugun dushvula titse kebin, anyugun kenrhinyu nshvu lati. Ale anyuntasa kethyü nyu Elam temi nkela lo anyugun nkebula kemvuthen rihü nipe anyugun hüti. 38Ale anyugun raja lo sharhidan nkelao, tsünyu a kedakhün penso lati. 39Ai kenkhin gwenki ale Elam temi no gwakenye ni loti. Ale Npugü, tsü zo laso.”
Currently Selected:
JEREMIAH 49: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
