IBRINYU 10
10
1Lo tejvü gü we tha kegwa le gunryü nrün dan joja to mvule a-shye nme kethyü genyu chenkechwi pe ngun kershvu thyüzin kehü kershvu tsüdan tsü sen-o a-kho nni kehünyu thyü ngwa penlo nrün ndila. 2Keshanyu laka rüshvu kehü dan le anyugun kemu nyu nshün ketsin thyülo la yatse kethyü we, anyugun nyun le anyugun nmu mvu lati, tson-o kershvu thyü sinmvu lati. 3Ai kershvu tsüdan kethyü le meno chenkechwi a-npvü a-kemu rüchün nilo lotse kehü gwünzin. 4Kechamvule methutse lo tenyü dan zi le temi kemu sentinlo nrün ndi kela genyu.
5Tsügenyu a-le kazü nyu tsüryü kejü ka, a-le Sunggigü ka zo:
“Nle kershvu kethyü lo tha sen ryüo
kershvu-e nkendo mvula,
ai nle min nme ndo pe atsü laso.
6Tha rope rüshvu kethyü lo kemu genyu
rotho nyu nle nkenyü hü mvu.
7Tsontsin a-le, ‘Lesüsü gü nyu
arüla thu pe kenjün hontse,
O, hire, Sunggigü ale n kendo gü tsü
thyüshü tile tseo ryü la sele,’ ” tson. 8A-le keri dan tsü zokeshü ka, “Nle kershvu dan lo tha hope kershvu dan lo tha rope kershvu dan lo kemu genyu kershvu dan nkendo mvu nmvue nkenyüe mvu.” A-le zo tha hidan hile tejvü genyu pe rüshvu keshü gwünzin. 9Tsonshü njüo a-le zo, “Hire, ale nkendo gü tsü thyü shü ti tseo ryü la sele.” Tson-o Sunggigü le rope kershvu tho when gü aphu pe khe laso lo Khrista pe kershvu gü khipe tsü bin nyu shülo laso. 10Lo Sunggigü kendo tsügü genyu Jisu Khrista mingü pe aphu genyu gwüngwa phou kerho thyü kela genyu nthyü kenshünlo laso.
11Lo peshükeda lihigüe so-o khenyütsen nyü lotho thyüo kershvu tho kethyü si thyü nini bin hünyo, ai tsüle thame ka-e kemu dan sentinla loho. 12Ai Khrista we kemu dan genyu kethonthen genyu rotho nme thyüla njüo gungü Sunggigü njüzin bin tin laso. 13Tson-o a-shwikerüchün nyu ju no a-pha hensin binlo kemvuthen khwen bin tin laso. 14Kechamvule kershvu thyü gwa nti nyu nshünlo kela ju thyü pe kethonthen gwapen laso.
15Tsüntimvule Kenshün Kapu gü le a-jün zosin shü hünyo; a-le,
16“Npugü le zo-o, jon tsüdan siki ale
anyugun zen-o kejopen kejozen nrün gü le
higü hile:
Ale a tejvü dan khipe anyugun nyun nyu shüti,
lo ale tsüdan thu pe anyugun nyun ge shüti.” 17Lo a-le zosin-o, “Ale anyugun kemu dan lo anyugun serikemvu dan rüchün nimvu lati.” 18Lo kemu hidan jü kelo le binla yatselo, kemu genyu rotho nme-e thyü sinmvu lati so.
Ngun Sunggigü Khonnilo Tinu
19Tsügenyu apvünyu ju, nle Jisu zi genyu pecheo kenshün bingü nyu yülo gwa so. 20A-le phi süden pe khin kenjü, tsüle a-kon le a-thyümin tsünyu tson keshün kerhün tson nme khinshye shü laso. 21Lo nle Sunggigü ka kentsen n peshükeda le bin kelasi genyu. 22Ngun nyun ketsin thyü tenyen-o nnyun ki n nmu kehü dan tsü thyü kenshünla, lo zü kenshün tsin lope nmin-e sülao a-khonni gunlo tinu. 23Ngun sidyü nme zo kehü gü tsü tezen tsekho sen binlo nu, kechamvule tha zope ntsü kenjü gü le joketsin kethyü genyu. 24Lo ngun tsühontse khinyunyu thu keyhun pe keso lo thatho kegwa nyu shülo tiyo tsü rüchün lo nu. 25Peha nyu jvü hontse gungü kehun keteno kethyü gü tsü khela nya, ai tsangkeben jon gü le nkho nni kvu kebin hontse khinyunyu thu keyhun kvulo.
26Tson-o nle ketsin thakesha gü hyulo kela siki n npvü nshwen nron thyüo kemu thyülo, kemu rothyü keloi nmv-e bin sin mvu so. 27Ai n nmu nrün ketetsin kethyü gü khwen kebin gwünzin so, lo mah ketetsin kethyü tsüle shwikerüchün tsü ju roti. 28Temi lihigüe Mosa jvü gü gwünrho kethyü shahu mihvu mishen le bin yatselo shwi njün mvu tse no sila hü. 29Tson yatselo Sunggigü nyugü pe a-phabin thyü kedü, lo khipe a-thyü kenshün kelo kejopen kejozen kelo zigü pe tha lihi kemvu thyü, lo shwikenjün kapu gü nshwen tse kehü gü le tsünye ki a-shaja tsen kvu kethyü hyulo mvu ti ole! 30“Kechamvule khünkezo le ajün le, ale kethun ni ti,” tson kezo gü ngun le a-sha bin nyo. Lo zoni keshü le, “Npugü le a-temi dan ketso ti.” 31Rhün kehü gü Sunggigü ben nyu chetsü titse kethyü tsüle kenshvu nme le.
32Ai himhundyü hagun le keben hyu kelo sikikenjün kethyü kerü nyu-e nyhen bin kelo dan rüchün nishülo. 33Tsükatsü khika we süda mhundyü nyu meno hagun kemüni lo hagun nthyü nnyü, lo khika we mele n nshwen pe tsühontse kebin nyu zen-o dan me thyü hü. 34Kechamvule hagun le dothyü kebin nyu shwi pe hagun nyun kenjün thyü, bin zin hü nrün hagun kenya gwakvu kethyü nme le bin kela shao mele hagun hon nke nmhü-e hagun kenyü hü. 35Tsügenyu hagun kepeche pe shwenla nya, tsüle a-chün keda le bin nyo. 36Lo hagun Sunggigü kendo thyülo-o a-le tha zope bin kenjü gü hyulo nrün genyu hagun nyhenhi kethyü sen bin mvulo shvu. 37Kechamvule ketsinlesü le hontse zo hü,
“Thonsa mvu tse gunryü titse
kehü gü le ryü ti,
lo a-le ntsüla loho.
38Ai atemi kentsen gü le
a-ketenyen genyu rhün loti;
ai a-le tesen nila yatselo,
ale a-ge akenyü loho.” 39Ai ngun we tesen nilao nke kelanyu kemvu, ai tenyen bin-o kenilo nrün nyu le.
Currently Selected:
IBRINYU 10: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
