EZEKIEL 47
47
Rinyu Le Kershvuka Nyu Tsunchwi Kebin
1Temi gü le a zen-o Kershvuka nyu keyü tson nyu rani gü. Zü le keyü tson gü hensin tsunchwi ryüo nphozin Kershvuka le ntsun kebin denzin gü bin. Tsüle Kershvuka tejüzin hensin tsun sen-o kershvubin tesinzin nshe bin. 2Temi gü le Kershvuka bin tsünyu azen-o chonrha tesozin tson kipon chwi lo azen-o hun gü npho ntsun kebin chonrha ki gü. Rinyu keshe nme zü le chonrha tsü gü tesinzin tsun chwiryü bin. 3Temi gü le a-kendovü lope nphozin meter tsipvün ndolo nsheo ano rinyu nyu tsü yülo tse zo. Laryü zü le aphagun gerho. 4Tsüsika a-le meter tsipvün ndo nilo, lo zü le akho ki kü ryü. Kecha ko meter tsipvün ndo ni nshe, tsü le asen keti la. 5A-le meter tsipvün ndo ni, laryü rinyu gü le ntsunsalao ale gülo mvula. Ntsunri kela genyu züvü kemvu we pvüthü lomvu la. 6A-le aka zo, “Silakehü temi gü, hi aphu thu petsü salo.”
Tsüsiki temi gü le azen-o züri seka nigü, 7ale tsüki gü kethyü ka senbin kechon le a-se lihizin kebin hyu. 8A-le aka zo, “Hile tsun kazü higü pvüthü sen-o npho ki Jordan ketejon Kesi Zida ki tsübin. Tsü le tsun-o Kesi Zida ki yü lo, tsü le zü kenshün lope zi tsügü nyu zükeshen sun thyüla hü. 9Rinyu tsü gü le tsun kegü bin nyu nyukhu lo tsehü kechacha aphu bin loti. Rinyu tsü le Kesi Zida zü gü thyü nshün lati, lo tsü le gü kethyü bin ki kerhün sen ryü ti. 10Engedi zü kebin bin nyu gü Eneglaim zü kebin keti aphu tsehü keten nyu le zida gü seka bin ti, lo anyugun le joh pe tsünyu ren-o pho nsin ti. Mediterranean zida nyu hontse tsünyu tsehü kecha cha kechon le bin ti. 11Ai a-seki dü lo zükentsun dan le nshün loho. Tsüdan le bin-o zükeshen khishü ti. 12Rinyu gü se lihizin senbin kecha cha aphu bin-o nsha tyü ti. A-nyü dan le rügu loho, lo a-sha nshamvula loho. Tsü dan le shekechwi terasha keshün nshati, kechamvule Kershvuka gü nyu tsun chwiryü kebin rinyu gü le tsü dan ntsen kebin genyu. Senbin dan le chvü khishü, lo a-nyü dan sen-o temi dan thyü ngwa ti.”
Kazü Gü Rhidan
13Aphu sokekvu Npugü le zo, “Kazü rhi hidan hile kazü pe tsipwen tseryü kenyhun dan nyu kenjün-o Josef le jünhvu lo nrün terhi. 14Ale swe-o kazü hilo pe hagun bon nyu hon thyü loti tse zo njü, tsügenyu tsü lope hagun dan nyu kenjün ketun kü lolo.
15“Tesozin terhi le nphozin Mediterranean zida ka gü Hethlon nyida, gü Hamath Pass, gü Zedad nyida ti, 16gü Berothah lo Sibraim nyida dan (tsü dan le Damaska rajaphen lo Hamath rajaphen hvu jaka), lo Tikon nyida keti (Hauron rajaphen keti.) 17Tsügenyu tesozin terhi le Mediterranean nphozin gü Enon nyida Damaska teki kebin nyu lo Hamath ka gü tsü tesozin keti.
18“Nphozin terhi le Damaska kazü lo Hauron au jaka tse sen-o tesinzin nshe bin, Jordan züri nzen-o terhi thyü, tson-o Israel no nkhün lo Gilead no nphozin gü Kesi Zida Tamar keti.
19“Tesinzin terhi le Tamar ka gü Kadesh Meribah zü kebin keti, tson-o nkhün tesozin Ijipt terhi ka gü Mediterranean zida keti.
20“Nkhünzin terhi le Mediterranean pe thyü lo-o tesozin nsin gü Hamath Pass nkhünzin keti.
21“Kazü higü lope hagun tsipwen dan nyu kenjün lo; 22tsü lope kethonthen hagun hon thyü hüti. Sinrünyi hagun dan nyu yhun-o a-nyenyu le bin kelanyu ko hagun le kazü kenjün kethyü ka anyugun jün hyu loti. Anyugun lope Israel phenyü nyu ketsin hontse ti lo Israel nyu tsipwen dan kentsin-o kazü anyugun jün hyulo nrün genyu henkeshwi thyü ti, 23sinrünyi nyu tsipwen lihigüe a-le yhun kebin dan nyu a-jün hyu kü loti. Aphu sokekvu Npugü, ahigü le zo laso.”
Currently Selected:
EZEKIEL 47: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
