EZEKIEL 45
45
Tsipwen Günyu Npugü Jün
1Kazü kenjün pe tsipwen dan jün thyülo, jün nme senkho pe Npugü ki shüti. Kethon le kilometer tseryü kenyhun-o peha lo a-kegon le kilometer tseryü. Tsü aphu nshün lati. 2Higü nyuki Kershvuka bin genyu meter 250 kethon-keda ketun küti, lo bin kenrun meter nkipvün no tsü hun ti. 3Bin higü peha kilometer tseryü kenyhun-o peha lo kilometer pvün ndo loti, hinyu Kershvuka Bin aphu nyeki Kenshüntsin thyü ti. 4Hile kenshün bin kecha, Npugü Kershvuka nyu a-lothyü kehü Püshükedanyu genyu senkho ti. Kazü hinyu peha pe püshükedanyu ka thyü lo peha pe Kershvuka bin thyü ti. 5Peha lope Kershvuka nyu lothyü kehü Levinyu jün thyü ti. Tsünyu anyugun no yhun nrün rünyi keda le bin ti.
6Bin Kenshün nyeka kilometer tseryü kenyhun-o peha kethon lo kilometer kenyhun-o peha nmhun kethyü khikho pe Israel nyu lihigüe yhunlo kegwa nyida nme thyüti.
Rajagü Genyu Kazü
7Kekvu senkebin Raja gü genyu kazü senkho ti. Kazü kenshün terhi nkhünzin kagü Mediterranean Zida titi; lo npho zin terhi le gü kazü gü npho terhi keti güti, tson-o a-kethon no pe Israel tsipwen tsükeshü bin gü zen ketun nrün genyu. 8Kekvu senkebin raja gü jün higü hile Israel kazü nyu bin ti, tson-o a-no temi dan nshwe mvuo kazü kecha dan no Israel tsipwen hon thyü nrün genyu.
Raja gü Genyu Tejvü
9Aphu sokekvu Npugü le zo, “Israel kekvu kesen nyu, hagun le kemu thyü thonsa laso. Hagun gwakemvu lo me kenshwen tsü khe lalo. Kenjün lo joketsin gü thyülo. Hagun le atemi hü pe anyugun kazü nken ni nya. Aphu Sokekvu Npugü ahigü le hilo pe hagun ka zobin.
10“Lihigüe joketsin nyu tha ndo lo sülo mvulo shvu:
11“Epha pe tha kesin ndo kethyü lope bath pe zü ndo kethyü ketun ti. Homer sen-o tha ndo ti. Tha ndo kethyü le hihontse ti.
homer 1 = epha 10 = bath 10
12“Hagun kensu kesü le hihontse ti:
gera 20 = shekel 1
shekel 60 = mina 1
13-15“Nle hihontseo tha hoshü ti:
Thoshe: nle gvükelo kenjün pe
hentsero ka nme (1/60)
Barley: n low gvükelo jün
hentsero ka nme (1/60)
Oliv ter: nsenbin ge lükelo jün
tsi ka nme (1/100) (bath sen-o nda ti: bath 10 = homer 1 = kor 1.)
Tanyü: tsihvu ka nme. Israel nyu shaipvü ka hyukelo
“Hagun le shyeni pe kerüshvu senryü ti, senru apentha ro nrün genyu, lo kepvüshe kerüshvu genyu senru senryüti, tson-o hagun kemu jülo nrün genyu. Aphu sokekvu Npugü, ahigü le tsü thyü lotse johoshü laso.
16“Kazü tsü gü nyu temi aphu kerüshvu hidan senryüo Israel so kekvu sen kebin gü tsüti. 17A-le senru apentha pe ro nrün, shyeni pe kerüshvu, lo shye Keshün nga, Sabbath lo nga kecha dan, vain zu pe senye gü aphu genyu kerüshvu kethyü le a-tho. A-le kemu ro kethyü, shyeni pe kerüshvu, apentha ro nrün kerüshvu, lo kepvüshe kerüshvu, Israel nyu kemu sentin la nrün genyu hidan aphu khishü mvu loshvu.”
Nga dan
(Chw 12:1-20; Lev 23:33-43)
18Aphu sokekvu Npugü le zo, “Shye kerigü jon keri nyü hagun le methutse tetsin nme-e kendi nme pe kerüshvu thyüo Kershvuka gü thyü kenshün ti. 19Püshükeda gü le kemu genyu kerüshvu kethyü zi peha khilo-o pe Kershvuka khenpvü kekho, kershvubin ngwenzin dan, lo kamhun a-nyuzin gü ki keyü chonrha kachon dan ge shüti. 20Shye tsügü jon tsenyü nyü ko hagun ronchvü tse kemvu kemu nmvue shamvuo mukela nyu lihigü genyu-e tsü hontse ti. Hihontseo hagun Kershvuka gü ntsen kenshün bin ti.
21“Shye kerigü jon ryüpezi nyü hagun le Nkenkelo Nga gü tsü zen so ti. Jon tsenyü temi dan le kebu pe shü kemvu tensü tyü ti. 22Nga jon kerinyü kekvu sen kebin raja gü le methu tse nme pe a npvü a-kemu lo temi aphu kemu genyu kerüshvu thyü ti. 23Jon tsenyü Nga kethyü ka khenyütsen tetsin nme kendi methutse tsenyü lo tenyütse tsenyü apentha pe ro-o Npugü kerüshvu thyüti. A-le khenyütsen tenyü tse ko nmeme pe kemu genyu kerüshvu thyü ti. 24Methutse lo tenyütse pe rüshvu kethyü nmeme genyu kedasha epha nme lo oliv terzü liter kenshen pe rüshvu ti.
25“Then ka kebin Nga, shye tsenyü gü jon tseryüpvün nyü nga so kehü gü yatselo, raja gü le jon tsenyü ka tsü khenyütsen kemu genyu kerüshvu, apentha rope kerüshvu lo kedasha lo oliv terzü pe kerüshvu kenme me pe rüshvu ti.”
Currently Selected:
EZEKIEL 45: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
