EZEKIEL 3
3
1Sunggigü le zo, “Silakehü temi gü, kethusü higü tyülo-o; gü Israel temi danka zoshülo.”
2Tsügenyu ale amün kvushü lo a-le kethusü pe ano tyülo. 3A-le zo, “Silakehü temi gü, ale pe nketsü kethusü gü tsü tyülo; tsü tyü pe ngin nyülo.” Ale tsü tyü, lo tsü le nnyü pe khuzü hontse.
4Tsüselo Sunggigü le zo, “Silakehü temi gü, Israel temi dan ka güo ale nno zolotse keshü zoshü lo. 5Ale nnipe sin rünyi khwen ketsen zo kehü senye ki shübin mvu, ai Israel temi ki shübin. 6Ale nnipe sin rünyi khwen ketsen nle shakemvu zokehü senye kecha dan ki shü yatselo, anyugun le nkhwe nyüti. 7Ai Israel temi nme-e nyü nyü kemvui; anyugun le akhwen-e nyü loho. Anyugun phu nyun rü lo tsen kethyü genyu. 8Ale nthyü pe anyugun hontse nyun tsen lo rü shü ti. 9Ale nthyü pe tsonye hontse tsü lo diamond hontse nko shüti; me nren kehü dan tsü nshvu nya.”
10Sunggigü le zo, “Silakehü temi gü, ale nka zokebin hi aphu nyü tsentsü lo-o rüchün lo. 11Tson-o ntemi dothyü kebin nyu ki güo Aphu sokekvu Npugü a higü le anyugun ka zokeshü jo tsü anyugun le nyüe nmvue pe anyugun ka zoshü lo.”
12Tsüselo Sunggigü kapu gü le apen solo, lo a siki thakhwen tetso sa tse zokeshü nyülo, “Tsang tesoki kebin Npugü zan kechwi gü tsü shwenlo!” 13Tsangneki nyukhu dan sekin kekhün kebin khwen, kerüpha khwen le tetso pe kazü kenu hontse shü. 14Npugü kekvu gü le kvusa tse age ryü, lo a-kapu le apvüo tin kethyü ka, anyunta lo anyunkhü lola. 15Tsügenyu ale Khebar züri khoka Tel Abib ki donyu le kebin bin ka ryü, lo ale kehyu lo kenyü dan genyu tsüka jon tsenyü bin tinla.
Npugü Le Ezekiel No Rikhun Nyu Thyükelo
(Eze 33:1-9)
16Jon tsenyü penkela siki Npugü le a nthon. 17“Silakehü temi gü, ale nkhipe Israel senye genyu rikhun thyü bin. Petsü mvulo keshvu ale pe nketsü tsü pe anyugun ka zolo. 18Sigü jüla sele tse zoshüo nle a-no a-tho kelulo-o kenilo kegwa zoshü mvu, lo a-le kemunyu sila yatselo a-kesi khvu gü tsü nno pvüti. 19Nle temi gwakemvu gü ka zoshüe a-le kemu thyüsin yatse lo a-le siti ai n we n nrho shüti.
20“Kegwa nyu nme le gwakemvu thyü solo ale a-lope gwün keshvu nyu shüla, lo nle a-ka zoshü kemvu we a-le si lati. A-le a-kemu genyu siti- a-tho kegwa dan tsü ale rüchün kemvui- ale a-kesi khvu gü tsü nno pvüti. 21Nle kegwa nyu zen shüo a-le nkhwen nyülo yatselo, a-le yhun bin ti, lo n keyhun ko nrho shüti.”
Ezekiel Le Jo Zolo Mvu Lati
22Ale Npugü le kehü kekvu shalo lo a-le aka kezo nyülo, “Solo-o ketejon ki gülo. Ale tsünyu n nthon ti.”
23Tsügenyu ale ketejon ki gü, lo ale tsünyu Khebar züri khoka kehyu hontse Npugü zan kechwi hyu, lo ale kazü nyu nkhün rün tinla, 24ai Sunggigü kapu gü le age bin lo-o asü soshü. Npugü le aka zo, “Kaki gun-o ka khinpvülo. 25Ron pe nphin lati, sila kehü temi gü, lo nle me dan nyu chwilo mvu lati. 26Ale n yi no nko lao me nren kehü temi hidan no petsülo lo tse nno zolo mvu lati. 27Tsüsiki ale n nthon nishü lo jo zolo kegwa kekvu pe ntsü yatselo nle Aphu sokekvu Npugü a higü le zokeshü jo dan pe anyugun ka zolo ti. Anyu peha le nyü ti, ai peha le nyü mvu ti,anyugun le me nren kehü senye genyu.”
Currently Selected:
EZEKIEL 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
