EZEKIEL 23
23
Kemu Tsasikezengi Hvu
1Npugü le aka zo, 2“Silakehü temi gü, gwüngwa tenunyu tsasikezen mihvu le bin hü. 3Au le lübwenyu thyüo Ijipt nyu yhun kehü ka yhun nshün mvu, keyüla chün ketyü nyu thyü tinla. 4Peshügi zan le Oholah (tsügi le Samaria sunka), lo nchegi le Oholibah (tsügi le Jerusalem sunka.) Ale au lolo, lo au le nyu zen pe atsü. 5Oholah le ahon, ai a-le keyüla chünketyü nyu thyü tinla, lo Assiria kipon a-sonyu dan zen thyümi kenyü thyünyü sahü. 6Tsü dan le phinya kemeren keben shüpahü nyu, kemeren keben kegwanyu lo kedanyu, tsü dan aphu zegwasa sa lo keru kezen nyu. 7Tsügi le Assiria kedanyu aphu zenkeso hü, lo a-kenyü yhüdyü dan le a-zen-o Assiria nyu teromen kezü rüshvuo a-nrhu la. 8A-le Ijipt nyu keyüla chünketyü nyu thyüso kela tho gü khemvu. A-le lü soryü ntsin pechenyu le a-zenzhü lo a-lope keyülachünketyü nyu nme hontse hü. 9Tsügenyu ale a-khipe Assiria nyu a-sonyu, a-le nnyüsa kehü dan tsüla. 10Tsü dan le a-phinya rholao a-nyu peche lo tenue tenlo-o zhethon lope a-dushvula. Tenunyu le lihikie a-rüla kerabin hü.
11“A-sikezengi Oholibah le tsü hyue Oholah nyeki gwamvu lo keyüla tho thyü kvu. 12A-ko Assiria nyu kegwanyu lo kedanyu nnyüri tsin- tsü dan le ben kethyü phinya kenme kepvünyu, kedanyu, keru kezen nyu, tsü dan aphu selo zegwasa kethyü nti. 13A-le serimvusa kela ale hyu, a-zikezengi-e a-tsa gwakemvu hontse.
14-15“Ale a-serikemvu nyu ntsun ketsintsin yüla. A-le Babilon kedanyu, phi pe anyugun senphin lo anyugun perün thyüo pvü kehü dan me pe kabon ge hen-o thazü nhonben kethyü pe nyen kenjü tsü a-kenyü sala. 16A-le tsü hyushü ntsin nnyü ritsin lao lilonyu nipe Babilon nyu tsü dan kishü. 17Babilon le a-zenzhü titse ryüla. Anyugun le a-zengwa lo a-nrhu salao kenkhin ki we a-le anyugun shwintsü lola. 18A-le a-khipe temi mhundyünyu ndo-o aphu no a-le keyüla chünketyü nyu letse shalo. Ale a-tsagi shwintsü kela hontse a-ko a-ntsüla. 19A-le lünyu ka Ijipt nyu keyüla kethyü hontse keyüla chünketyü tho thyüketsin sola. 20A-le serimvu pe gada nmvue keru cho hontse kethyü nnyü ritsin lola.” 21(Oholibah, nle nlü ka Ijipt nyu pechenyu no nnyüsü lo nphusen keyhun nrhu lao mu kehü tho tsü thyüni nyü hü nyo.)
A-sikezengi Ge Sunggigü Le Jünkera Kethyü
22“Tsügenyu, Oholibah, higi hile Aphu sokekvu Npugü ahigü la nka zobin nle. Nle nsonyu genyu nnyun tsemin laso, ai ale anyugun thyü pe nge nyunta lo tsü dan zenryüo nhun loti. 23Ale Babilon nyu, Chaldeanyu, Pekod, Shoa, Koa lo Assiria kipon temi aphu zenryü ti. Ale selo kezegwa, kegwa nyu lo kedanyu, keda zen kechwi dan lo keru kezen shüpahü kedanyu aphu kequen loti. 24Anyugun le teso kipon rihü danda, kerugari lo kanyü kepvü gari tse zenryüo nwhen ti. Anyugun le gida lo perün pvüo nhun ti. Ale nkhipe tsü dan ben nyu shü lati lo anyugun le anyugun tejvü nyu njo kerati. 25Ale nge anyunta kebin genyu, ale anyugun no nyunkenta pe hagun ge shüti. Tsü dan le nhikon lo nnyetin rülao nnyenyu boshvu ti. E, anyugun le nnyu peche lo tenu tenlo-o anyugun kerhün roti. 26Tsü dan le nphinya sürhen lo kontyü minketsen khilo lati. 27Ale nno nkenyü yhüdyü lo Ijipt ki nshün kemvu thyü gun keryü gü thyü mvu lati. Lo teromen kezü nrimvu nmvue Ijipt rüchün nimvu lati.”
28Higü hile Aphu sokekvu Npugü le zo, “Ale nkhipe ntsü lo shwi nyuntsemin kela nyu ben nyushü lati. 29Lo anyugun le n ntsü kehü genyu nle thyü kenjü aphu sentin lao n kenyhün khi pe keyüla chünketyü nyu hontse ndo lati. N yhüdyükenyü lo nkeyüla chünketyü 30higü hi senryüo n ge shü laso. Nle senye dan genyu keyüla chünketyü nyu thyü lo anyugun teromen kezü pe nthyü nrhu laso. 31Nle ntsagi phanyu then gü laso, tsügenyu ale shaja honpen kenme kethyü pe hai no tsüti.”
32Aphu sokekvu Npugü le zo,
“Nle ntsagi honpen ka tsüti;
tsü le gon lo tetso.
Temi aphu nshwinyüo nnshwen ti;
honpen gü le sü laso.
33Tsü le nthyü pe nyungwamvu lo nyun
kenjün kethyü nyu shüti,
kenshvu lo kenke honpen gü tsü le
tsü le ntsagi Samaria honpen.
34Nle tsü tsü lo keyhü nsin lati,
lo honpen gü bokekho dan
tsü le n nyü hvu rhen lati.
Aphu sokekvu Npugü a higü le zo laso.”
35Hile Aphu sokekvu Npugü le zobin nyo: “Nle a nmhinlao akipon rani tinkela genyu, nle nkenyü yhüdyü lo nkeyüla chünketyü genyu kenjün thyüti.”
Tsasikezengi Hvu Ge Sunggigü Jünkekera
36Npugü le aka zo, “Silakehü temi gü, nle Oholah lo Oholibah au jünkera nrün nda bin le? Au le kentsükenchen tho kethyü genyu nkhin shülo. 37Au le keyüla lo dukeshvu tho thyü laso- teromen kezü tho zen-o keyüla lo au le nnyu pe aketsü pechenyu dan dukeshvu genyu. Au le anyu dan lope au teromen kezü rüshvula. 38Au tho aphu le tsü nti mvu. Au le a Kershvuka nrhu lo ale binzen keshü Sabbath tsüe gwünrhola. 39Au le anyenyu boshvu pe teromen kezü rüshvu kethyü nyü tsü a Kershvuka nyu ryü lo tsü nrhula!
40“Au le nithen ki temi no ryü lotse jolo nipe tsüni ni, lo temi le ryü. Tsasikezengi hvu le züluo yhütyü kenyen-i pe nyen lo ronye thyü. 41Au le no gwasa kethyü ge dun, lo au mhundyü ka miz pe shüo phi kegwa pe la, lo pe tharünkenyi lo oliv terzü ale pe au tsü keshüe pe sin. 42Nyunkhi kemvu temi dan me khwen nyü logwa, tsü dan le kazükesi kipon zenryü. Tsü dan le benkhin pe tenugi hvu npvü lo rajaperün gwasa kethyü pe au pe ge shü. 43Lo a npvü a nthon-o anyugun le tenu nme keyüla genyu a-boren kela lope keyüla chünketyünyu hontse zenbin letse bin. 44Anyugun le keyüla chünketyü hvu ka kegü si günini. Anyugun le tenunyu serikemvu hvu Oholah lo Oholibah ki nigü. 45Kentsen nyu we au le keyüla tho thyü lo me bokeshvu genyu au nmu lati, kechamvule au le keyüla tho thyü lo au ben le tezi pe nyen pvü bin.”
46Hile Aphu sokekvu Npugü le zo, “Temi dan me zenryüo au thyü kecha lo nke lalo. 47Danda gü no tso lope au jon lo zhethon sen-o au when, au nyenyu boshvu lo au ka ro lalo. 48Ale kazü tsü gü aphu nyu temi jvü gwakemvu dan khin lati tenunyu aphu no a-keyüla tha hontse thyü mvula nrün genyu. 49Lo tsasikezengi hvu- ale hai jvü gwakemvu lo teromen kezü rüshvu kela kemu dan genyu shaja pe hai tsü ti. Tsüsiki hai le ale Aphu sokekvu Npugü le tse sha loti.”
Currently Selected:
EZEKIEL 23: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
