EZEKIEL 21
21
Npugü Zhethon Gü
1Npugü le aka zo, 2“Silakehü temi gü, Jerusalem nkhin shü. Temi dan le rüshvu kehü bin dan nkhin shülo. Israel nyu kazü zen shüo 3Npugü ahigü le zobin letse shülo: Ale hagun kenrhinyu. Ale azhethon gü sütho-o hagun kegwa lo gwakemvu nyu metse aphu dushvu lati. 4Ale tesoki gü tesin keti azhethon gü sen-o nmeme tse nren ti. 5Temi aphu Npugü ahigü le azhethon sütho loso lope bin la loho letse shati.
6“Silakehü temi gü, n shekese nyu nnyun le kobin kela hontse nralo. Temi aphu no n hyulo kegwa bin nyu nyunkenjün thyüo nralo. 7Anyugun le nle nyugenyu nra bin yotse shünlo, jolo ryükejü gü genyu letse zoshü. Tsü le ryülo kenshvu le anyugun nyun sü lati, anyugun ben le nshela, kepeche ndila, lo anyugun kho le kvumvu lati. Gwünkho gü le ryü laso; tsü le hinyu bin.” Aphu sokekvu Npugü le zo laso.
8Npugü le aka zo, 9“Silakehü temi gü, sidyüjo zolo. Npugü ahigü le zokebin pe temi dan ka zolo:
Zhethon nme, zhethon nme yi thyü lo
shon nshwen laso.
10Tsüle me dushvu nrün genyu a-yi thyü lola,
tsangkechwü hontse kerü nrün genyu shon
nshwen la.
Nkenyü loho,
atemi dan le ketsun keshü lo shaja aphu
sümvu kela genyu.
11Zhethon shon nshwen bin,
tsü senlo kegwa thyü nrün genyu.
Tsü le a-yi thyüo shon nshwen laso,
pe me dukeshvu nyu ben nyu shüla nrün genyu.
12Silakehü temi gü, nyunkenjün thyüo chülo;
zhethon higü le atemi dan genyu
lo Israel sharhi aphu genyu.
Anyugun dushvu gü jü laso
atemi a-sen aphu kesin-o.
N shese-o nnyun jenlo!
13Ale atemi dan kegwakeshvu shwi bin nyo,
lo anyugun le nyunkelu nyü mvu yatselo,
hidan aphu anyugun ge thyüti.
14“Tsügenyu silakehü temi gü, sidyüjo zolo. Nben kekhülo, tsonlo zhethon gü le du lo du niti. Tsü le dushvu kehü zhethon gü, me kerüla kehü lo dushvukehü zhethon. 15Tsü le atemi dan thyü pe kepeche ndi lo pha nsüla hü. Ale zhethon nme tsangkechwü hontse kerülo me dushvu titse nda bin kehü lope anyugun nyida gü kedün bin. 16Zhethon yi kegwa gü, tegwa lo tejü du lo! Nle lihizin rani güe me du lolo. 17Ako aben kekhü ti, tson-o anyunkenta le ndi lati. Npugü ahigü le zo laso.”
Babilon Raja gü Zhethon gü
18Npugü le aka zo, 19“Silakehü temi gü, Babilon raja gü le a-zhethon sen-o ryü lo kegwa tson shahvu kejülo. Tsühvu nren tsipwen tsü gü nyu binzen ti. Tsoncho nyu shalo kegwa zensü pe shü. 20N mele raja gü no Amon nyu nyida Rabbah nyu kegü tson tsin shü, lo kecha gü le Juda chwida kenko nyida, Jerusalem ki kegü tson tsin shüti. 21Babilon raja gü le tsoncho nyu zensü thyü kenjü khoka bin loti. A-le gü nrün tson gü shalo nrün genyu tsontsin henshwio a-teromen dan ka shün; a-le nyukhu pe rüshvu kela thyüsen nri. 22A-ben tejüzin penso ‘Jerusalem,’ tsin shü kebin gü tezen lo! Tsü gü le a-no güo chwida vüren nrün dyüshwen penso, teri khwen thyülo, chwida vüren nrün dyüshwen gü tsü pe khinrun dan ka shülo, nnyon khü lo kü tso, tson nrün genyu a-ka zo. 23Jerusalem temi dan le higü tenyen kemvui, anyugun le gwatho kenjü gü genyu. Ai ryü nrün zo kenjü higü le anyugun no anyugun kemu dan shanilo, lo anyugun lolo la ma kebin shao-petsü binlo nrün genyu. 24Tsügenyu higü hile Aphu sokekvu Npugü ahigü le zokebin gü tsü le. Hagun kemu le ndo laso. Temi aphu hagun le dihontse thyüzü la yo shabin. Hagun tho aphu nyu hagun kemu pe me hi hü. Hagun le nmu kela nyu bin laso, lo ale hagun khipe hagun kenrhinyu tsü lati.
25“Serikemvu gü, Israel sokeda nshünkemvu gü, ngwünkho nshaja jon kenkhin gü le ryüjü so. 26Aphu sokekvu Npugü ahigü le zo laso. N rajaperün lo npekejwe khila lo. Thame ka-e kenme thyüni loho. Lihi kemvu nyu no kekvu senlo! Kekvu senkebin nyu süshela! 27Kenke! Kenke! Ele, ale nyida gü no nke lati. Ai ale kejülo-o shaja pe nyida gü tsü titse kebin gü le ryü kemvu ka tsü thyü loho. A-le ryülo ale pe tsü ti!
Zhethon lo Ammonnyu
28“Silakehü temi gü, sidyüjo zolo. Aphu sokekvu Npugü le Israel nyu nshwen kehü Amon nyu ka zokebin higü pe teshalo. Anyugun ka zolo:
‘Zhethon nme le tha nke titse nda bin;
dushvu titse shon nshwen la, tsangkechwü
hontse kerü nrün genyu.
29Nle tsemin ki kehyu tsü le ketsin kemvu, lo nle ryü kejü rüla kezo dan tsüe kenku. Hagun le serimvu lo gwamvuri lo hagun jon le ryüjü laso, tsü le shaja kenkhin gü jon, zhethon gü tsü le hagun gunda du gü zhü laso.
30“ ‘Zhethon gü pe bin la! Ale hagun nyhun keshü bin gü, hagun nnyun kelo kazü nyu hagun jünkera ti. 31Ale anyunkenta mah kenyü hontse hope hagun ge keshü ka hagun le tsü shati. Lo ale hagun khipe rigwakemvu temi dan lo tha nkesa kehü dan ben nyu shü lati. 32Mah pe hagun nke lati. Hagun zi le hagun kazü nyu tsun ti, lo temi nme-e hagun rüchün ni loho.’ ” Npugü le zo laso.
Currently Selected:
EZEKIEL 21: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
