CHWEKETIN 33
33
Npugü Le Israelnyu No Sinai Kazüthun Nken Lalo tse Ahza Khikeshü
1Npugü le Mosa ka zoshü , “Nle lo Ijipt nyu nle zenchwi keryü temi dan no bin higü khe lao ale zope Abraham, Isak Jakob lo anyugun tsipwe dan tsü keshü kazü günyu gunlo 2Ale ajolonyu nipe hagun tsontsin lo no kanannyu, Amornyu, Hitnyu, Periznyu, Hivtnyu lo Jebusnyu dan hü lati. 3Hagun le kenya kazü kebwe nyu gun jü nyo. Ai hagun le temi a-nyunkerü dan me genyu ale tson nyu hagun nke lalo shvu laryü ale hagun zen gun loho.”
4Temi dan le jo higü nyü kelo ka nyu gwamvuo kontyü senni mvula. 5Npugü le Mosa no anyugun ka zoshü lotse ahza khishü, “Hagun le temi nyunkerü dan me; Ale gwenkho keshanyu ka-e hagun zen gunlo, hagun nkeshü kelai. Ntsoka hagun kontyü dan shwüshü lo ale hagun pe nyuthyü tiyo rhi loti.” 6Tson-o Israel nyu temi le Sinai nken kela siki kontyü sen sin mvula.
Npugü Kehü Phika Gü
7Lihika-e Israel nyu le kensenbin thyülo lo, Mosa le kenshün phika gü sen gü kensenbin nye ntsen ki sükhun shü hü. Tsü lope Npugü kehü Phika gü tse ko-o lihigü Npugü nthon kenyü gü le chwio tsüki gü hü. 8Lihi gwenkho ka-e Mosa le tsüki gülo temi dan le anyugun khenpvü ka so-o a-le tsünyu yüla kemvuthen nribin hü. 9Mosa le yülo lo nmhu chwe gü le ryü phika gü khenpvü ka bin lo-o Npugü le nmhu gü nyu Mosa nthon shü hü. 10Lo temi dan le phika khenpvü günyu n mhu chwe gü hyushü nyemhun nkhün tsü gü rüshvu hü. 11Temi le a-pfünyu zen kekenthon hontse Npugü le Mosa zen kemhun hyu-o kenthon hü. Mosa le kensenbin ki raniryü la. Ai a-lothyü kehü ponyu gü, Nun nyugü Joshua we Phika gü ka günyu bin hü.
Npugü le A-temi Dan Zen Hü Titse Johokeshü
12Mosa le Npugü ka zoshü, “Nle temi hidan tsonri zen-o kazü ligü ki gun ti tse aka zoshüla ketsin, ai nle senyu nipe azen gü tiyo zoshü mvu. Nle a shabin lo ashwi nkenyü le tse zoshü. 13Tsonyatselo, ano nlothyü lo nkenyü thyüzin binlo nrün genyu nkendo dan pe aka zoshüta. Nle tsipwe higü pe n npfü nhon thyü titse kejü lo kela rüchün lo.”
14Tsontsin Npugü le zoshü, “Ale hagun zen gü ti, lo ale kvukelo pe hagun tsüti.”
15Mosa le a-jokenio, “Nle agun zen gümvu yatse kethyü we, agun no bin higü nken nya. 16Nle agun zen gü mvuya tselo segü le nle ntemi dan lo ashwi nkenyü hü tse shalo tila? Nle agun zen kehü tsüle kazü nyu temi kecha aphu nyeki agun le kecha shü tse tsin shüti.”
17Npugü le Mosa ka zoshü, “Nle hikeshü hontse ale thyü shüti, ale nshabin lo nshwi akenyü kebin genyu.”
18Tsontsin Mosa le ale nka hi hü nle, “Nle kehü zankechwi keben gü ano hyu shülo.”
19Npugü le a-jokenishü, “Ale akeben aphu pe nmhundyü nyu gü shüti lo ale azan kenshün zoshüti. Ale Npugü, lo ale kejü lo kelanyu so lo njün kehü tsin shüti. 20Ale nno amhun hyu loha, temi nme amhun hyu-o rhünlo kemvui genyu, 21ai nle tsonye nme a-ge solo kegwa bin nme le hika akhoka bin nyo. 22A zankechwi keben gü le n nken kegü ka, ale nkhipe tsonye gü he nme nyu shüo ale güla kemvuthen aben pe nkebu lo lati. 23Tson-o ale aben khilo lalo nle asizin hyuti ai amhun hyu loho.”
Currently Selected:
CHWEKETIN 33: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.