ESTHER 3
3
Haman Le Judanyu Nkela Titse Rhikethyü
1Tsüsika raja Xerxes le Haman tse kethyü temi nme penso pe Ato Kilonser thyü shüla. Hammedatha nyugü Haman le Agag tsipwen. 2Raja gü le a-hensin kebin kedanyu aphu no khosen lo nkhün-o Haman kelu lotse ahza shüla. Mordekai le tson mvu letse kela gwünzin ame kechanyu we aphu tson hü. 3Raja gü lotho thyü kehü kedanyu kecha dan le a-le nyu genyu raja gü johokeshü then mvuyo tse ketsoshü; 4anyugun le khenyütsen a-kazoe a-le anyugun khwenyü mvula. A-le zo-o, “Ale Judanyu nme, tsügenyu ale Haman mhundyü nyu nkhünlo kemvui le,” tsonla. Tsüselo anyugun le MOrdekai jvü hi nyhenlo tile mvuyo tseo Haman ka zoshü. 5Mordekai le khosen nmvue nkhün tsügü a-kelu kemvui tse kethyü Haman le sha shüo nthünsa lola, 6a-le Mordekai le Judanyu nme le tse kethyü shalo-o Mordekai nti mvuo tsünye sin kethyü rhi lola. A-le Persia nyu raja kazü nyu Juda nyu apentha boshvu kela rhilo la.
7Raja Xerxes le keda thyü kelo chen tseryü kenyhun ka, shye kerigü, tsü le Nisan shye ka, Haman le a-le rhikebin gü thyü nrün genyu nyu shye nyu jon ka thyülo gwa tiyo henshwi lotse ahza shü (tsüle anyugun le “Purim” tse kohü.) Tson-o shye tseryü kenyhun gü, Adar shye jon ryü kenshen nyü ti tse rhilo.
8Tsüselo Haman le raja gü ka zoshü, “Tsipwen nme le n raja kazü, lo kazüsakethü aphu ka nrenru bin nyo. Anyugun jvü le temi kechanyu hontse mvu. Tsünyeki anyugun le raja kazü nyu tejvü gü zen hümvu laryü anyugun no kebin tsüle thame kechwi ndi le. 9Tsügenyu raja gü le a-kendo yatselo, anyugun no si lati tse ahza nme nishwi shülo. Tsonshü yatselo ale raja kazü ketsen lo nrün genyu rakagi kilogram 340,000 khipe raja kenya kequen khin nyu shüshü logwa tse zoshwi shü bin nle.”
10Tsontsin raja gü le a-benkhin tho pe Juda nyu shwikerüchün gü Hammedatha nyugü Haman, Agag tsipwen gü tsüla. 11Raja gü le a-ka zoshü, “Temi dan lo anyugun pisa le nhon le; nle anyugun pe nyuthyü nyüyo thyülo.”
12Tson-o shye kerigü jonryü kenshen nyü Haman le raja gü kethu nyu koshüo no johokeshü dan thu kela pe raja kazü nyu sen kehÜ khwe aphu nyu shü pe kekvu kesen nyu, ahng nyu, lo kedanyu aphu tsüshü lo tseo zoshü. Tsüle raja Xerxes zan nyu thuo a-benkhin pe jen la. 13Lesü hidan pfü gü raja kazü nyu kazüsakethü aphu ka kenjün shüla. Tsünyu thu kebin le Adar shye jonryü nyü, Juda nyu nche peshü lo peche tenu aphu khenyüme jon thyü boshvu bu lalo. Anyugun shwinjün nyao dushvula lo anyugun hon khilo lalo. 14Nyu thu shüyo tsü pe kazüsakethü aphu nyu temi aphu no shabin lo, tson-o jon gü le ryülo ligü higü no nda binlo nrün genyu.
15Raja gü le johokeshü hontse ahza gütsü pe Susa nyida nyu temi aphu ka zoshü, lo lesü kepfü nyu le jolo gü sen gü kazüsakethü kishü. Susa nyida gü le kevü keben kebin ka raja gü lo Haman au le zu tsü bin.
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.