EFESANYU 3
3
Juda kemvunyu Genyu Paul Lotho
1Higühi genyu ale Paul, hagun Juda kemvunyu phin tsü rüchün-o Khrista Jisu dothyü hünyo. 2Hagun genyu Sunggigü le nshwikenjün lotho gü khipe atsüla kethyü hagun ko no shabin nda, ale n ngü ka jo keshanyu thu shüla se atale. 3Tsügü tsü le Khrista le a-npvü jo kentsun tsin pe ahishü laso. 4Hagun kotsü swüshü yatselo, ale Khrista rüla jo kentsun tsügü kesha tsü hagun ko shalo ti. 5A-le kenshün apostelnyu dan lo sidyükeshanyu dan ka Kapugü genyu ntsoka tsin kebin hihontse nmhundyü keyhun temi nyu danka we tsü tsinpe hi kentsen thyü shü mvu. 6Jo kentsuntsüle a-konle jolokegwa gü genyu Juda kemvunyu ko Judanyu zen-o kenya kerhün, lo kengüo min nme ge lo zanketho kecha kethyü dan, lo Khrista Jisu genyu zokenjü gü kenjün lo nrün dan laso.
7Ano Sunggigü le a-kekvu no thyülo kehü a-le me shwikenjün lotho atsü kela gü kenrun nyu tsügü lothyü hünyo. 8Kenshün nyu dan nyu keshen tsin nyu aphu dannyu keshen tsin gü ahi no, Khrista kenya sha tilo keho zope Juda kemvunyu hishü lotse. 9Lo temi aphu no tha aphu thyü keshü gü Sunggigü ge nduka nyu le kebu kenjü jo kentsun gü le nyuyo tsekethyü sha tsentsülo nrün genyu shwikenjün higü hi khipe aka shüshü. 10Tson-o ntsoka tsangge lokethyü keda ju lo kekvunyu dan no kehun ge Sunggigü do aphu shalo nrün genyu. 11Tsügü tsü le Npugü Jisu Khrista genyu a-le rhi pe kethonthen thyü titse kehü gü tsüle. 12Khrista tsügü genyu ngun le a-tenyen-o a-zen kesha kelo genyu peche-o a-ki gükelo gwünzin.
Khrista Le Nkesogü
13Tsügenyu ale hagun phin kegwa rüchün-o kenjünthyü kelo ale hagun no tsü rüchün pe hagun tsonrüzi nya lotse bin nyo; tsü aphu hagun genyu kegwa le. 14Higenyu ale Pvügü mhundyü nyu khosen hünyo. 15A-kanyu tsangge-e kazü nyue kami zantho kechacha kethyü hyulo. 16Kechamvule a-no a-kenya kegwa khipe hagun tsüo A-kapugü no kekvu pe hagun nyun ki kehü kapugü thyü nkvu shü. 17Ketenyen nyu Khrista no hagun nyun ki binlo,hagun no hagun mentsen yügü kesonyu binlo-o 18kenshün nyu aphu zen-o nne sha gungü tilo keho 19Khrista nkeso a-kethonkeda, a-ketetso lo a-kentsun, dikhoyo rüchün tilo kegwa thyülo, tson-o Sunggigü no hagun kesü thyülo letse nda. 20Lo a-kekvu tsü no nnyun nyu nle hi rüchün kehü aphu so-e thyü shülo kegwa gü. 21A-no nthen teyhün nyu ki-e kethonthen kehun nyu lo Khrista nyu zan kechwigü thyülo. Amen.
Currently Selected:
EFESANYU 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
