AMOS 7
7
Tsemin ki Tsekhvu Kehyu
1Ale Aphusokekvu Npugü kipon tsemin nme hyu. Tsemin tsünyu rajagü jün low gvulolao tehen senni chwiryü kejü gwenkho Npugü le tsekhvu dan nyhun keshü hyu. 2Tsemin ki tsü ale tsekhvu dan le tsünyu tehen tyü kela hyu, tsüselo ale zo, “Aphusokekvu Npugü, n temi kemu jüshüta! Anyugun le dihontse yhunlo tila? Anyugun le shen lo kvumvusa le!”
3Npugü le a-kerüchün sünio zo, “Nle kehyu gü tsü thyü mvula tiso.”
Tsemin Ka Mah Kehyu
4Ale Aphusokekvu Npugü kipon tsemin kecha nme hyu. Tsemin ki tsü a-le mah pe a-temi ro titse kebin ale hyu. Mah tsügü le kazü hensin züda keda gütsü rola, lo kazü ro sojüla. 5Tsü selo ale zo, “Thyünya gwenlo, Npugü Sunggigü! N temi dan le dihontse yhunlo mon? Anyugun le shen lo Kvumvu sale!”
6Npugü le a-kerüchün sünio zo, “Higü hi thyü mvula tiso.”
Tsemin ki Kendaron Kehyu
7Ale Npugü kipon tsemin kecha nme hyu. Tsü kitsü a-le kendaron pe ndo-o tsokhwen kenjü nme khoka sokebin hyu, lo a-ben ka kendaron nme bin. 8A-le aka shün, “Amos, nle nyu hyu bin nla?”
Ale zo, “Kendaron le.”
Tsüselo a-le zo, “Ale higü sen-o a temi dan le kendaron nye rüche kebin tsokhwen hontse letse pe hi bin nyo. Ale shaja pe anyugun tsü nrün nyu a-kerüchün süni loho so. 9Isaac tsipwen le rüshvu kehübin dan nke lati. Israel nyu genyu kenshünbin dan no nke lati. Ale Raja Jeroboam kedatsi no ndi lati.”
Amos Lo Amaziah
10Bethel nyu Peshükedagü, Amaziah le zotesha nipe Israel raja Jeroboam ki shü: “Amos le temi dan nyu tedo rhipe n ntsun bin. A-jodan le temi dan kecha lati. 11A-le hihontse zohü: ‘Jeroboam le terinyu silao Israel temi dan le anyugun kazü nken-o tin lati.’ ”
12Amaziah le Amos ka zo, “Tsüle gwaso, sidyükeshagü! Juda kazü ki güo tsüki senthyülo. Anyugun no tsügenyu nshün thyülo. 13Bethel hinyu sidyüjo zoni nyagwen. Higü hile raja le rüshvu kehü bin, senye gü kerüshvuka le.”
14Amos le zo, “Ale sidyüjo zo-o ashün lokehü nyu kemvu le. Ale senru kekhwen nyule, lo ale kherobin ntsen kehü güle. 15Ai Npugü le ale tanyü kekhwenyu thyükehü ka ano güo a-temi Israel nyu ka sidyüjo zo lotse akhilo le. 16Tsügenyu Npugü le zo kebin hi nyü shülo. Nle ano sidyüjo zonya, lo jo zope Israel nkhin nya lotse bin. 17Tsügenyu, Amaziah, Npugü le nka zohü nyo, ‘Nnu le tsonda nyu keyülachünketyünyu thyü tinla, lo nnyenyu le teri nyu anyugun ga lati. N kazü kenjün pe kecha nyu tsüla, lo nle Sunggigü shakemvu kazü nyu silati. Lo Israel temi mele anyugun kazü nyu anyugun zen-o dothyü tinla tsentsüti.’ ”
Currently Selected:
AMOS 7: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
