AMOS 5
5
Nyunkelulo Lotse Keshü
1Israel temi dan, ale hagun gen nyu kesi gen keronlü thyü kebin higü nyü shülo:
2Phousengi Israel le chelaso,
Ni solo mvuso!
Kazü gen a-khe laso,
Lo temi nme-e a-penso mvu laso.
3Aphusokekvu Npugü le zo, “Israel nyu nyida nmele shüpahü ye nme nishwi, ai tsi nme nti le rani ryü; nyida kecha nme le tsi nishü, ai tseryü nti le raniryü.”
4Npugü le Israel temi dan ka zo, “Aki ryülo, tsonlo hagun le rhün loti. 5Beersheba ki rüshvu titse günya. Bethel nyu ahyulo nrün ndanya-- Bethel le lihikemvu nme thyü lati. Gilgal ki günya a-temi dan le me kazü ki tinla tiso.”
6Npugü ki gülo, tsonlo hagun le rhün loti. Hagun le gümvu yatselo, a-le mah hontseo Israel temi dan gen sho tsüryüti. Mah le Bethel temi dan rolati, tsonlo temi nme-e tsübo kemhü lo mvu lati. 7Temidan kenjü kekhün lao anyugun sakehü dan, hagun le thyülo binso!
8Npugü le shyenyüdan rheshü,
Pleiades lo Orion shyenyü.
A-le tsangkezen kelupe tsangkeben thyüla hü,
lo nhenyu thyüpe kheje thyü lati.
A-le zida nyu zü dan koshü
tson-o tsüdan ja pe kazü gen shü hü.
A-zan le Npugü
9A-le kenke zenryüo kekvu nyu lo anyugun
chwida kenko gen shühü.
10Hagun le mele joketsin zo-o ketsinkemvu nkhin kehünyu shwinyü mvuhü. 11Hagun le rhokedyünyu nshwen-o anyugun shyeni khilo hü. Tsügenyu hagun le thyükeshü tsoka kezegwa nyu yhun loho lo hagun le senkeshü vainlow kegwa nyu vainzu tsü loho. 12Ale hagun kemu ketesin dan lo hagun le dikho thyü zü layo shabin. Hagun le temi kegwanyu nchün ndyü, jvujwe lo, lo rhokedyü nyu le jokerabin nyu a-kenjü le kebin khinla hü. 13Tsügenyu gwenkho gwakemvu tsühontse kethyü ka matse bintin kela le thyükezü nme!
14Rhünlo nrün genyu gwakemvu gü mvule kenjü gü thyü titse rüchünlo. Tson yatselo nle a-le bin letse zokethyü genyu, Kekvutsin Npugü Sunggigü le nzenhü tsentsüti. 15gwakemvu ntsü, lo kenjü gü solo, tson-o jokerabin nyu joketsin gü le kvulo nrün nrilo. Npugü le senye hinyu yhunkebin shwinjün shüe lo gwale.
16Tsügenyu Kekvutsin Npugü le zo, “Nyida gü tsonda nyu che kechü lo nyunkenjün thyüo kenra khwen nyüti. Lowketsünyue me no kesi chechü lotse a-min pe tsükenjü nyu zen-o chechü lotse koti. 17Vain low aphu nyu chekechü le binti. Ale shaja pe hagun tsü titse ryükejü genyu hidan aphu thyüti.” Npugü le zo laso.
18Hagun Npugü jon nnyükehü nyu genyu tsüle dihontse kekerü nme thyü tiyo! Jon tsügü le hagun ka nyu kegwa thyü mon? Tsüle hagun genyu tsangkezen jon thyüti, keben thyüloho. 19Tsü jon tsüle temi nme le shünyho mhundyü tingü thyügwen tenokelo hontseti! Nmvue tsü jon tsüle nmele kaki ryüo a-ben pe kabon gen shüo peri no ndu keshü hontse ti! 20Npugü jon gü le kezen a-me keben senryü loho; tsüle keben ndishü kethyü kezen jon thyüti.
21Npugü le zo, “Ale hagun ketsenyü jon dan ntsü hünyo; ale tsüdan nhen loha! 22Hagun le rope kerüshvu kanyü lo shyeni pe kerüshvu sen-o aki ryüe ale tsüdan lo loho; hagun le arüshvu nrün genyu senru nrhu kenjü dan-e lo loho. 23Hagun lü thyü nra nya gwen; ale hagun le harp kevü khwen nyü nyümvu laso. 24Tson kethyü gümvu le, joketsin no sinla hükemvu züri hontselo.
25“Israel temi dan, ale Ijipt nyu hagun zen chwiryüo chen henzi kazü kesi nyu hüketse ka hagun gen kerüshvu lo tha hokeshü thame himvu. 26Ai ntsoka we hagun le Sakkuth, hagun tero raja, lo Kaiwan shyenyü tero men dan rüshvukela genyu 27ale hagun zen-o Damaska nyeki kazü nme nyu gü kethyü ka teromen tsüdan pvüo tsünyu gü mvuloshvu.” Npugü, a-zan le Kekvutsin Sunggigü tsüle zo.
Currently Selected:
AMOS 5: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
