2 TIMOTHI 4
4
1Ale Sunggigü lo kerhün nyu lo kesinyu aphu ketso nrün gü Khrista Jisu mhundyü nyu n kesin shü bin nyo; kechamvule a-le ryü kezhü lo keda thyü nrün genyu ale nno jünzo binlo lotse zoshü le. 2Gwünkho toka metse lo gwünkho kemvu ka metse nyhenthyü zo binlo; meno ketsin letse shalo, kesülo, lo thu keyhunlo, nnyun thon-o senthyü binlo. 3Kechamvule temi le senkethyü jo nyünyü kemvu gwünkho nme le ryü jü nyo; tson-o anyugun le anyugun nyetin kenjün thyüo anyugun le nyu nyülo nyü bin yo tsü senkethyü fü kequen loti. 4Lo anyugun le ketsin gü nyu anyugun nyetin pvü kerü sen-o ketsin kemvu kipon güla ti. 5Ao nwe tha lihi nyue nnyun tsentsü binlo; kenjün thyüe nyhen binlo, jolokegwa zope me senkethyü tho thyü binlo, nle lotho thyü titse kebin gü tsü thü penlo.
6Kechamvule awe aphou hoshüla titse ndo binla so, ale tinla nrün gwünkho gü le ryüzhü laso. 7Ale kenren kethyü gü nyu kenren penlo laso, ale tin kehü kethyü nyu tin gü tinlo laso, ale ketenyen gü ntsen sen tilo laso. 8Nthu gerho nyu kentsen perün khipe atsü titse akhwen bin laso; Npugü, jo ketsin nyu me jün kera nrün güle a-npvü tsangkeben jon keda tsünyu tsü khipe atsüti, lo a npvü mvule a-le nikeryü le a-kenyü kehünyu aphu tsüti.
Paul Le Timothi Ka Kezo Jo
9Nle nshwe aki ryü titse kethyü nyhen thyü binlo. 10Dema le kazü higü hon keso genyu akhelao Thessalonika ki gun laso, Kresken le Galatia ki gun laso, lo Tita ko Dalmatia ki gun laso. 11Lo Luk nti azen kebin gwünzin so; nle Mark ko zen ryülo; a-le lotho nyu akeche salo kehü genyu. 12Ale Tukika nipe Efesa ki shü laso. 13Nle keryü ka ale phi khipe Troa nyu Karpo ben nyu shü kenjü gü tsü lo lesü dan nyu lesüsü dan nchon-o sen ryülo.
14Lazo cha kehü gü Alekjender le age a-zü kemvu thyü sa la le, a-tho hontse NPugü le a-jün ketun ti. 15Nko a-genyu petsü binlo nye, kechamvule a-le n gun jo hi ntsun sa kehü genyu.
16Ale a npvü arüla zo kerigü ka temi nme-e ano pen shü mvu, ai akhe küla le, Npugü no tsü lope anyugun nmu nyalo tse nda. 17Ai tsükatsü Npugü le akhoka bin-o athyü nkoshü le, tson-o ale jo gü zo bu pe Juda kemvunyu ju aphu no nyü külo; lo tson-o shünyho gü mün nyu asi kenilo le. 18Npugü le tha gwa kemvu lihi nyue akenilo ti; tson-o akeni zen gungü tsangge keda nyu shülo ti. A-no kethonthen zankechwi gü thyülo! Amen
Kelukeshü Kekhin Tsingü
19Priskila lo Aquila hvu, lo Onesifora nyu kaminyu kelu shü le. 20Erasta le Korinth nyu bin nyo, ai Trofima we halo lao ale a-khe pe Meleta nyu shü laso. 21Tsangse mhundyü ryü titse n yhen thyü bin ta.
Eubulu, Poden, Lino, Klaudia lo npvünyu ju aphu nkelushü le nye.
22Npugü no n kapu zen bin kelo gü thyülo.
Shwikenjün gü no hagun aphu zen bin kelo gü thyülo.
Currently Selected:
2 TIMOTHI 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
