2 THESSALONIANYU 2
2
Tejvü Zen Kemvu Temi Gü
1Lo apvünyu ju, n Npugü Jisu Khrista le nigunryü nrün lo ngun le gungü a-mhundyü nyu kequen nrün rüla pe hagun tesha bin nyo. 2Tsüle hagun no temi peha le Kapu nyu zo mvue peha le jünzo kethyü ka nmvue Npugü le ryüla sele tse kethyü ale lesü thu shü letseo hagun no hagun nyun keyhun kerun nnmvue hagun nyun kenjün thyüla mvulo nrün genyu le. 3Temi nme-e no hagun sala nya; tejvü gwün kerho lo serikemvu dan nkela nrün nyu le me yhühyu thyü chwiryü teri kemvu ka we jon tsügü le gunryü loho. 4A-le me ntsun lo a-npvü a-thyü ketetso pe teronyu letse kehü lihi-e lo mele rüshvu kehü aphu zen kenren ti, lo a-le Sunggigü letseo bin lo lati.
5Ale himhundyü hagun zen kebin ka hi rüla pe hagun ka zokeshü tsü rüchün mvula sele? 6Lo a-no a-gwünkho ki chwiryü nrün genyu nyu le ntsoka a-khin bin yo hagun-e shabin nyo. 7Lo serikemvu sha tilo keho tsügü tsüle a-tho thyü binla so, ai a-khin kebin gü tsü khinla kemvu ka we a-le dihontse shü tiyo tsü thyü shü loho. 8Tson-o tsüsikinyu serikemvu tsügü le me yhühyu thyü chwi ryü ti, ai Npugü le zankechwi thyüo me yhühyu thyü keryü ka a-mün nyu a-teshe gü lope tsügü dushvu lati, tson-o tsügü kemhenla ti. 9Serikemvu tsügüle Satan kekvu sen gunryüo ndun kethyü tho aphu lo tha zansü kenku lo tha ndun kethyü tho dan thyü ti. 10Serikemvu, me kesa shaseni sen ryüo nkela nrün nyu dan sati. Kechamvule tsüdan le ketsin gü so-o zenlo yatselo anyugun le kenilo ti tse kethyü jo gü zenlo mvu kela genyu. 11Tsügenyu Sunggigü le anyugun no kenku jo tenyenla nrün genyu tha rüchün zü sa kethyü nme nipe anyugun ge shüla. 12Tson-o ketsin gü tenyen mvule kemu nyu a-kenyü tin kelanyu aphu nmu lati.
Kenilo Titseo Kejülo Kela
13Ai Npugü keso kepvü apvünyu ju, Kapugü nyu hagun thyü kenshün lo-o hagun no ketsin gü tenyen kelo genyu Sunggigü le sokeri ka nyu hagun kejü pe kenikelo kipon shü kela genyu ale hagun genyu Sunggigü shwen zin bin hünyo. 14Hagun no n gun Npugü Jisu Khrista zankechwi kethyü hyulo titseo a-jolokegwa gü no hagun kolo laso. 15Tsügenyu a pvünyu ju, hagun tsekho tse binlo, lo hagun ajo-e lo a lesü nyu hagun senthyü keshü shakelo dan thyü lo zen binlo. 16Lo n Npugü Jisu Khrista-e lo n Pvügü Sunggigü le nso-o shwikenjün nyu kethonthen nyun kebwen pe ntsü lo sidyü kegwa khipe n ketsü gü no, 17hagun nyun thyü nbwen shü lo hagun nyun thyü pe no tha kegwa lo jo kegwa lihi-e thyülo.
Currently Selected:
2 THESSALONIANYU 2: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
