2 KORINTHIANYU 11
11
1Ale kennu jo peha zo yatse-e hagun nyun gwamvu nyalo gwati; ai hagun le age ketsin thyü hagun kekheni kehü ale shabin nyo. 2Ale hagun shwi pe Sunggigü kipon nyun ketegi le bin nyo, kechamvule ale hagun khipe lünyu phousen kenshün pe a-nyepvünyu ki keshü hontse Khrista tsü titse hagun nkhen njü nyo. 3Ai peri gü le kelikelu-o Iv sa kela hontse hagun nyun ketsin thyü lo hagun nyun nshün-o Khrista rüshvu kebin nyu hagun kerüchün tson tsinzü kela nshvu bin nyo. 4Kechamvule temi peha le gunryüo ale nduka zope senthyü kemvu Jisu kecha zope senthyü, nmvue hagun le nduka hyulo kemvu kapu kecha nme hyulo, nmvue hagun le nduka lo kemvu jolokegwa kecha nme zope hagun hi yatselo tsüdan jo le hagun kenyüla tsentsü ti.
5Akerüchün le ako apostel keda tsin dan nyeki she letse rüchün bin mvu! 6Lo ale jo kezo do shamvu letse ai ale tha shamvu bin mvu, ale gwünkho aphu ka tha aphu nyu tsin nshün pe hagun no shalo laso.
7Lo ale hagun thyü nso shü titseo a npvü athyü nshelo-o Sunggig"ü jolokegwa gü kenrun nyu zope hagun senthyü keshü genyu ale kemu thyüla le? 8Ale hagun lothyü titseo kehun kecha dan ka akeche khilo-o anyugun hon nke laso. 9Lo ale himhundyü hagun dan nyu bin-o rhodyü kelo kae ale hagun nme kae keche hi-o hagun ketekhi mvu; kechamvule tsükatsü apvünyu peha le Makedonia ki keryü ka anyugun le ale rhodyü kebin dan khipe atsü keshü genyu. Lo tha lihikae agenyu hagun no khvü nsu ryü mvu lo siki ai khvü kensu thyüshü loho. 10Khrista ge chwikeryü ketsin gü le age kebin hontse, tsühontse a kekenyü gü hino thame kae khinla loho. 11Nyu genyu ola? Ale hagun sohü tse kethyü Sunggigü le shabin nyo.
12Lo ale nyuthyü bin yo ale hisiki-e tsüthyü bin ti; tson-o ale kemakin kehü tsühontse kemakin ti tseo ndo kehünyu no agenyu anyugun kekhelo ti. 13Lo temi tsühontse kethyü nyu le apostel kenku nyu le, mesa kehü tho thyü kehü dan, anyugun npvü Khrista Apostel rothyü kehü gwünzin. 14Tson-e tsüle ndun kethyü kon kemvu, Satan-e a-npvü a-thyü pe tsangge jolo keben nme rothyü hü nlaryü. 15Tsügenyu a-lo kethyünyu le kentsen nyu rothyü so yatse-e tsüle sha hü kemvu tho nme mvu; anyugun le dihontse thyü njü yo hisiki tsühontse hyulo ti.
Paul Le Apostel Nme Hontse Kenjün Kethyü
16Temi nme-e no ale kennunyu letse rüchün nyalo tse kethyü hagun ka zonishü bin nyo; ai hagun le tson hü yatse-e alope kennunyu letse lota, tson-o ako no keshanyu kemakinlo nrün genyu. 17Ale jo hidan hi zo kebin le Npugü le ano zolo tse kethyü genyu kemvu, ai kennunyu hontse ketekho-o zo bin nyo. 18Temi kechon le thyümin kipon kemakin kebin genyu ako kemakin ti. 19Kechamvule hagun le thakeshanyu thyüo hagun sherhün-o kennunyu ge-e a-keshathyü tse kehü genyu. 20Hagun le temi peha le hagun ten pe a-do thyü-e, nmvue nchwe gunryüo hagun jon-e, nmvue a-npvü a-rüchün ngon-e, nmvue hagun mhun nkhwen shüe a-keshathyü tse hünyo. 21Ale kejo a-me ale hünyo!
Ai temi ligühigüe kemakin ti yatselo ako kennunyu nme hontseo kemakin-o jozo ti. 22Tsüdan le Ibrinyu le? Ako le. Tsüdan le Israel nyu le? Ako le. Tsüdan le Abraham tsipwen le? Ako le. 23Tsüdan le Khrista lotho thyü kehünyu le? Ale kennunyu hontse zoti, ale anyugun nyeki a-lothyü chonkvu, do ai thyü chonkvu, meno akevü le swülo bu keho thyü, lo ntsoka tse sila kesasa le. 24Judanyu ben nyu gwünpvün ge avü kethyü swü kethyü le henzi pen kemvu le nme le pen mvu. 25Meno gwünshen ge terithün pe avü; lo gwüngwa tso pe ajon, run le gwamvulao ano gwüshen ge kenjün thyü sa, lo khejeme lo khenyüme tse ale zü kentsun nyu bin. 26A kenjwen tsen tse: züri nyue kenshvu, mehon seketyünyu ben nyu kenshvu, a npvü atemi ben nyue kenshvu, Judakemvunyu ben nyue kenshvu, rünyi nyida nyue kenshvu, tehen nyue kenshvu, züda nyue kenshvu, lo apvünyu kenkunyu dan ben nyue tse kenshvu teno sa hünyo. 27Tsüdan nyeki-e zhümvu tse kenjün thyüo tha thyü, nnyon lo teri, nmvue khün chonsa hünyo, nmvue sesiho lo a kenben bin hünyo. 28Lo thakecha zolo bu ho-e, kehun aphu genyu ale khenyü tsen anyun kenkhi thyüo akhvü nsu bin hünyo. 29Segü le kvumvu bin-o ale a-hontse kvumvu la mvu la? Segü le kemu nyu chelao ale anyun kenjün thyü mvula la?
30Ale kemakin mvulo shvu yatselo, ale kvumvu kela rüla dan zo-o kemakin ti. 31Ale jo hidan kezo ale nku mvu tsekethyü kethonthen teshwen kepvü gü Npugü Jisu Khrista a-pvü Sunggigü le shabin nyo. 32Damaska nyu rajagü Areta hensin nyu ahng gü le atenlo titseo Damaska rünyi nyida gü khwenlo la le. 33Ai mele rokhu nme nyu akhipe shülo-o pe chwida kepe nme ki hoshüo ano a-ben nyu tinchwilo le.
Currently Selected:
2 KORINTHIANYU 11: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
