MARKA 8
8
Mipi Sangli Vakna
(Mat 15.32-39)
1Huai nite in, mipi tampitak ahong om nawn ua, nek ding bangmah anei kei ua, ama'n anungzuite asam a, akiang uah, 2“Mipite tu in ka kiang ah ni thum a-omta ua, nek ding bangmah aneih louh ziak un ka lainat mahmah hi. 3An ngawl in a-inn uah paisak leng lamkal ah abah kha ding uh; khenkhatte houh ahong paina uh agamla mahmah ngal a,” achi hi.
4Anungzuite'n, “Mi'n hiai gamdai ah koi a tanghou in ahia hiai mite ahihvah theih ding uh?” chi in amah adawng uhi.
5Huan ama'n, “Tanghou phel bangzah na nei ua?” chi in amau adong a. Amau, “Phel sagih,” achi uhi.
6Huan mipite lei a tu ding in thu apia a; tanghou phel sagih ala a, kipahthu agen khit in abalkham a, ama ua lui ding in anungzuite kiang ah apia a; huchi in mipite ma ah aluita uhi. 7Ngasa tawmchik leng anei ua; ama'n avualzawl a, huaite leng ama ua lui ding in thu apia hi. 8Huchi in ane ua, akham chiat ua; bawm sagih dim in akhamval nen uh aluak uhi. 9Amau sangli vel ahi ua; ama'n amaute apaisakta hi. 10Amah bel anungzuite kiang ah long ah atuang pah a, huchi in Dalmanutha gam atung uhi.
Chiamtehna Ngetna
(Mat 12.38-42; 16.1-4)
11Pharisaite ahong pai ua, amah ze-etna ding in, amah a pan van a kipan a chiamtehna zong in amah ahong sel uhi. 12Huan amah alungsim in nakpi in anak kuaikuai a, “Bang achia hiai khangte'n chiamtehna zong uh ahia? Chihtaktak in ka hon hilh ahi, hiai khangte kiang ah chiamtehna himhim piak ahi kei ding,” achi hi.
13Huchi in amaute paisan in long ah atuang nawn a, gal khat lam ah apaisanta hi.
Pharisaite Leh Herod Silngou
(Mat 16.5-12)
14Huan anungzuite'n tanghou atawi mangngilh ua, tanghou phel khat kia lou ngal long ah tanghou dang himhim lah anei kei uhi. 15Huan ama'n akiang uah, “Pharisaite silngou leh Herod silngou lak ah kiveng unla, pilvang un,” achi hi.
16Amau, “Tanghou i neih louh ziak ei ve,” chi in akingaihtuah uhi.
17Jesu'n huai atheih in, akiang uah, “Bangziak a tanghou na neih louh ziak ua kingaihtuah na hi ua? Tu nangawn in na theisiam kei lai uh maw? Theisiam lou lai maw? Na lungtang uh na khauhsak ua hia? 18Mit nei napi in na mu kei ua hia? Bil nei napi in na za kei ua hia? Theigige lou uh maw? 19Sangnga lak a tanghou phel nga ka balkhap lai in anen bawm bangzah ahia na luahdim uh?” achi hi. Amau, “Sawm-le-nih,” achi uhi.
20Huan sangli a dia sagih ka balkhap lai in, anen bawm bangzah ahia na luahdim uh? achi a. Amau akiang ah, “Sagih,” achi uhi.
21Ama'n akiang uah, “Bangchidan a tu nangawn a theisiam lou lailai na hi ua?” achi hi.
Bethsaida A Mittaw Hihdamna
22Huai nung in Bethsaida ahong tung uhi. Huan akiang ah mittaw ahon pi ua, amah khoih ding in angen uhi. 23Ama'n mittaw khut alen a, khua a kipan apikhia hi; amit ah chil sia in atung a akhut akoih khit in, “Khua na mu thei hia?” chi in adong hi. 24Amah hong dakkhia a, “Mite ka mu; singkung pai bang in ka mu,” achi hi. 25Amit ah akhut akoih nawn a, ahong hakkhia a, ahong dam maimah a, bangkim chiantak in amutheita hi. 26Huan Jesu'n, khua ah leng lut ke'n chi in a-inn ah apaisakta hi.
Peter In Jesu Khrist Hihna Apuangkhia
(Mat 16.13-20; Luk 9.18-21)
27Huan Jesu leh anungzuite ahong pai zel ua, Kaisaria Philippi khuate ahong tung ua; huan pai kawm in anungzuite kiang ah, “Mite'n kei kua ka hi ahon chi ua?” chi in adong hi.
28Amau, “Baptispa Johan ahi, ahon chi ua; midang in Elijah ahi, ahon chi ua; khenkhat in bel, zawlnei kuahiam ahi, ahon chi uh,” achi uhi.
29Huan ama'n akiang uah, “Ahihleh nou kei kua ka hi na hon chi ua?” chi in adong hi. Peter in akiang ah, “Khrist na hi,” chi in adawng hi.
30Huan ama'n atanchin kuamah hilh louh ding in achi bikbek hi.
Jesu'n Asihna leh Athohnawnna Ding Agenkhol
(Mat 16.21-28; Luk 9.22-27)
31Huan Mihing Tapa in thil tampi athuak dingte, upate, siampu liante, laigelhmite deih louh a a-om ding, hihlup a a-om ding leh ni thum nung a athohnawn ding thute amau ahilh hi. 32Huai thute chiantak in agen hi. Huan Peter in amah apituam a, atai hi. 33Himahleh amah ahong kihei a, anungzuite muh in, Peter atai a, “Setan, ka nung ah pai in, Pathian thilte ngaihtuah lou in, mihing thilte na ngaihtuah zaw,” achi hi.
34Huan mipite, anungzuite toh asam a, akiang uah, “Kuapeuh in hon zuih a-utleh amah kingaihsak lou in, ama kros pua in hon zui hen. 35Kuapeuh ahinna humbit ut in atan ding a; kuapeuh keimah ziak leh tanchinhoih ziak a ahinna tan in ahumbit ding hi. 36Mi'n khovel apum in nei henla, ahinna tan taleh amah a ding in bang aphatuam dia? 37Mi'n ahinna tang in bang ape thei dia? 38Kuapeuh hiai khang a angkawm leh gilou chingte lak ah keimah leh ka thu zumpih, Mihing Tapa in, angel siangthoute toh a Pa thupina a kivan a ahong hun chiang in, huai mi ahon zumpih thuk sam ding,” achi hi.
Currently Selected:
MARKA 8: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
