MARKA 5
5
Gerasin Mi Dawipai Hihdamna
(Mat 8.28-34; Luk 8.26-39)
1Huan dil gal, Gerasin mite gam ahong tung uhi. 2Long a kipan apawt nung in dawi nin pai khat, han a kipan a hong pawt in amah ana tuak pah hi. 3Hanmunte ah akhosa zel a, kuamah in sik khainiang nangawn a ahen theih louh uh ahi. 4Sikkol leh sik khainiang in ahen ua; himahleh sik khainiang abottat a, sikkol leng ahihtan zel a; kuamah in athuzoh zou kei uhi. 5Sun leh zan in han leh tang ah akikoukou a, suang in aki-at hi.
6Huan gamlatak a kipan Jesu amuhtak in atai a, amah abia hi. 7Huan aw ngaihtak a kikou in, “Jesu, Pathian Tungnungpen Tapa, kei leh nang bang ahia i kizolhna om? Hon gimsak lou ding in Pathian min in nget chihtak in ka hon ngen hi,” achi hi. 8Jesu'n akiang ah, “Nang, dawi nin pai, hiai mi sung a kipan pawt in,” ana chi hi. 9Huan ama'n, “Na min bang ahia?” chi in adong hi. Ama'n akiang ah, “Ka min nuai ahi, tampi ka hih ziak un,” achi hi. 10Huai gam a pan amau sawlkhe lou ding in Jesu kiang ah nakpi in angen hi.
11Huan huai lai a tang pang ah vokhon tampi ata uhi. 12Dawi ninte'n, “Vok sung ah hon sawl in, asung ua ka luttheihna ding un,” chi in akiang ah angen uhi. 13Ama'n thu apia a, huchi in dawi ninte apawt ua, vok sung ah alut ua; vokhonte sangnih phial ahi ua, ken ah ataisuk ua, tuipi ah atailut ua; tuipi ah tui hak in asita uhi.
14Huan vok an pete atai ua, khua leh lou ah agen ua, huai thil hong om bang ahia chih en ding in mite ahong taikhawm uhi. 15Jesu kiang ahong tung ua, dawimatpa, alungsim ngei pu leh puansilh a huai a tu amu ua, huchi in alauta uhi. 16Ama ua mute'n, dawimat tung a thiltundan leh vok tanchin amaute ana hilh uhi. 17Huan amau agam ua kipan a pawt ding in angenta uhi. 18Huan long a alut in dawi nin paipa'n amah kiang a omsak ding in angen hi. 19Himahleh Jesu'n aphal kei a, akiang ah, “Na inn a na lawmte kiang ah pai inla, Toupa'n nang a dia thil hon hihsak athupidan leh nang ahon lainatdan va hilh in,” achi zaw hi.
20Huan apai a, Dekapolis ah Jesu'n amah a dia thil ahihsak thupidan atangkoupihta hi. Huan mi tengteng in lamdang asa mahmah uhi.
Jaira Tanu Leh Numei Sipawt Hihdamna
(Mat 9.18-26; Luk 8.40-56)
21Jesu long a gal khat lam a ahong kai nawn in mipi tampitak akiang ah ahong paikhawm ua, amah tuipi gei ah a-om hi. 22Huchi in sinagog a vaihawmte lak a mi khat, amin Jaira, ahong a, Jesu amuhtak in akhebul ah abokkhup hi. 23“Ka tanu naupang chik asi dekdek a; hong dam a, ahintheihna ding in hong pai a atung a na khut koih ding in ka hon ngen hi,” chi in nakpi in athum hi. 24Huchi in Jesu akiang ah ava hoh a, mipi tampitak in zui in, amah aboh lutlut uhi. 25Huan numei khat kum sawm-le-nih sipawt a damlou a-om hi. 26Daktor tampi lak ah nakpitak a thuak in, aneih tengteng azangbei khinta a, phattuam nak sang in ase zosop hi. 27Huai mi'n Jesu tanchin ana za a, anung ah mipi lak ah ahong pai a, apuan mong akhoih hi. 28“Apuan mong kia khoih leng hihdam in ka om mai ding,” alungsim in achi hi. 29Huan thakhat in asipawt akam ngal a, anatna hihdam ahi chih asa ah akitheita hi. 30Jesu'n, asung a kipan thilhihtheihna apawt chih athei a, mi lak ah akihei vialvial a, “Kua ahia ka puan mong khoih?” achi hi. 31Anungzuite'n akiang ah, “Mipi'n ahon boh lutlut uh mu chin a, kua ahia hon khoih? Bangchidan a chi na hia?” achi uhi. 32Ama'n huai thilhihnu muh tum in a-en vialvial hi. 33Huchi in numei in atung a thil ahihsak thei in, lau leh ling kawm in ahong pai a, ama ah bokkhup in, akiang ah thudik ahilh vek hi. 34Ama'n akiang ah, “Tanu na ginna dampih na hi, khamuangtak in pai inla, na natna a kipan na damta in,” achi hi.
35Apau laitak in sinagog a vaihawmpa inn a kipan mi ahong pai ua, “Na tanu asita, sinsakpa hihbuai lailai ding na hiam?” achi uhi.
36Jesu'n athugen uh ngeingaih lou in, sinagog a vaihawmpa kiang ah, “Lau ke'n, gingta mai in,” achi hi. 37Peter, Jakob leh Jakob unau Johan chih louh ngal midang kuamah in amah azuih uh aphal kei hi. 38Huan sinagog vaihawmpa inn atung a, Jesu'n ana buai vengvung, kap vengvung leh mau vengvungte thawm aza hi. 39Ava lut a, akiang uah, “Bangziak a bil am zen a kap na hi ua? Naupang si lou ahi, ihmu ahi zaw,” achi hi.
40Huan amah anuihsan maimah uhi. Himahleh ama'n avek un apawtsak a, naupang omna ah ava lut hi. 41Huan naupang khut alen a, akiang ah, “Talitha kumi,” achi a, huai tuh “Nungaknou, thou in, ka hon chi,” chihna ahi.
42Huan numei naupang athou a, apai pah ngal a; amah kum sawm-le-nih mi ahi. Huan amau lamdang asa mahmah uh. 43Ama'n akiang uah, “Hiai kuamah in thei kei hen,” achi bilbel a, nek ding piak ding thu apia hi.
Currently Selected:
MARKA 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
