MARKA 13
13
Tempul Siat Ding Leh Hun Tawp Thu
(Mat 22.23-33; Luk 20.27-40)
1Huan tempul a kipan apaikhiak lai in, anungzuite lak a mi khat in akiang ah, “Sinsakpa, en dih, suang leh innte athupi mahmah hi,” achi hi. 2Jesu'n, akiang ah, “Hiai inn thupitakte na mu maw? Hihchip louh a, suang kichiang hiai ah a-om kei ding,” achi hi.
Buaina Leh Sawinate
(Mat 24.3-14; Luk 21.7-19)
3Huan Olive tang a tempul zawn a atut lai in, Peter, Jakob, Johan leh Andrute'n akiang ah, 4“Huaite chikchiang in ahong om dia? Huai tengteng atun ding chiang in chiamtehna bang a-om dia, hon hilh in,” chi in asimdot uhi.
5Jesu'n akiang uah, “Kuamah in hon khemlouhna ding in pilvang un. 6Mi tampi, Khrist ka hi, chi in keimah min lou in ahong pai ding ua, mi tampi akhempuk ding uh. 7Huan kidou thu leh kidou thuthang na zak hun chiang un mangbang kei un; huaite hong tung ding him ahi uh. Himahleh atawpna zaw ahi nai tadih kei ding. 8Nam tuam leh nam tuam akidou ding ua, gam tuam leh gam tuam akidou ding ua; mun tuamtuam ah zin aling dia; kial ake ding hi. Hiaite nauvei kipatna ahi.
Soisakna Thupuan
9“Himahleh pilvang un; vaihawmte ahon mansak ding ua; sinagog ah ahon vo ding ua; keimah ziak in gamukte leh kumpipate ma ah theihpihna pe ding in na dingh ding uhi. 10Huan nam tengteng kiang a tanchinhoih hilh masak ding ahi. 11Huan hon pi a, ahon matsak hun chiang un, bang ka gen dia chi in ngaihtuah khawl kei un; ahuntak a theihsak a na om peuh uh, huai ngeingei gen zaw un; agen pen zaw noumau hilou in Kha Siangthou ahi zaw ding hi. 12Huan hihlup ding in unaupa leh unaupa akimansak ding ua, pa in atapa amansak ding a; tate'n leng anu leh pate uh adou ding ua, athatsak ding uhi. 13Keimah min ziak in mi tengteng huat na hi ding uh; himahleh atawp pha a thuak mualsuahmi, huai mi hotdam in a-om ding hi.
Hihmangbangpa Kihhuai
(Mat 24.15-28; Luk 21.20-24)
14“Himahleh zawlnei Daniel in agen bang a hihmangbangpa kihhuai adinlouhna ding a dingh na muh chiang un, asim peuh in a-omdan thei hen, huai hun chiang in Judia gam a omte tang sang ah taimang uhen; 15inn tung a om kum kei hen; a-insung a thil lakhe ding in lut sam kei hen. 16Huan lou a om apuansilh la ding in kik nawn kei hen. 17Huai ni in naupaite leh naunou pomte tung agik ding hi. 18Huaite phalbi a ahong tunlouhna ding in thum un. 19Huai nite bang a gimthuakna thupi Pathian siam leilung pian tung a kipan tutan in a-om ngei nai kei a, chik mah chiang in a-om ngei nawn kei ding hi. 20Huan Toupa'n huai nite hihtom keileh mihing dam in asuakta kei ding; himahleh, telte ziak in nite ahihtom hi.
21“Huai hun chiang in, kuapeuh in na kiang ua, ‘En dih uh; hiai ah Khrist a-om!’ ahihkeileh ‘En dih uh; huai ah a-om!’ hiam achih chiang un gingta kei un. 22Khrist takloute leh zawlnei takloute hong pawt ding ahi ngal ua, huaite'n chiamtehna leh thillamdang ahih ding uh; hi thei ngialleh telte nangawn akhemtheihna ding un. 23Nou zaw pilvang un, ngai dih uh, bangkim ka hon hilhkhol khinta ahi.
Mihing Tapa Hong Paina
(Mat 24.29-31; Luk 21.25-28)
24“Himahleh huai nite zoh in, huai gimthuakna khit in, ni hihmial in a-om ding a, kha avak nawn kei ding hi. 25Van a kipan aksite ahong ke ding ua, van a thilhihtheihna omte hihlin in a-om ding uhi. 26Huai hun chiang in Mihing Tapa, thilhihtheihna leh thupina lianpi toh meipi lak a hong pai amu ding uhi. 27Huai hun chiang in a-angelte asawlkhe dia, atelte lei ning li a pan lei tawp a kipan van tawp pha in apikhawm ding uhi.
Theipi Kung Gentehna
(Mat 24.32-35; Luk 21.29-33)
28“Huchi in theipi kung ah gentehna zil un; ahiang ahong nou a, anah ahong sel in nipi anaita chih na thei uhi. 29Huchi mah bang in, nou leng huaite hong tung na muh chiang un, amah ahong naita a, kongkhak bul mahmah ah a-om chih, thei un. 30Chihtaktak in ka hon hilh ahi, huai tengteng atunkim masiah hiai khang amang kei ding hi. 31Lei leh van amang dia, ka thu ahihleh amang kei ding hi.
Ahun Kuama'n Thei Lou
(Mat 24.36-44)
32“Himahleh huai ni leh dak Pa kia lou ngal kuamah in, van a angelte'n leng Tapa in leng athei kei uhi. 33Pilvang unla, kiging gige in thum un; ahun lah na thei ngal kei ua. 34Mi a-inn paisan a, asikhate thu neisak a, anasep ding uh pe chiat a, kongkhak veng leng kigin ding thu pe phot a, gamdang a va taam bang ahi. 35Huaiziak in kiging gige in om un, inn neipa hong pai ding hun, nitaklam in hia, zan in hia, ak khuan in hia, zing in hia chih lah na thei ngal kei ua. 36Huchi lou in zaw, hong pai guih kha taleh ihmu in ahon mu kha ding. 37Huan na kiang ua ka genmi tengteng kiang a ka gen ahi: Kiging gige in om un,” achi hi.
Currently Selected:
MARKA 13: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
