MARKA 10
10
Kimak Thu A Dotna
(Mat 19.1-12; Luk 16.18)
1Huan adingh a, huai a kipan Judia gam ah leh Jordan gal ah apaita hi. Akiang ah mipite ahong kikhawm ua; huchi in ahih ngeidan in amaute thu ahilh nawn hi.
2Pharisai khenkhat akiang ah ahong pai ua, amah ze-etna ding in, “Mi'n zi amak asiang hia?” chi in ahong dong uhi.
3Ama'n akiang uah, “Mosi in bangchi in thu ahon pia a?” chi in adawng a. 4Amau, “Mosi in kimakna laigelh a mak aphal,” achi uhi.
5Himahleh Jesu'n akiang uah, “Na lungtang khauh ziak un ahi huai thupiak nou a dia ahon gelhsak. 6Himahleh leitung pian tung a kipan, Pathian in amaute numei leh pasal asiam hi. 7Huai thu ziak in pasal in anu leh apa apaisan ding a, azi alen tinten ding; 8huchi in anih un sa khat ahong hita ding ua; nih ahi nawnta kei ua, sa khat ahong hi zawta ding uh. 9Huaiziak in Pathian in agawmsa mihing in khen kei hen,” achi hi.
10Huan inn ah anungzuite'n huai thu amah adong nawn uhi. 11Ama'n akiang uah, “Kuapeuh azi ma a, midang nei in azi ang akawmsan hi; 12ama'n leng apasal khen a, midang aneihleh angkawm ahi,” achi hi.
Jesu'n Naupang Neute Avualzawl
(Mat 19.13-15; Luk 18.15-17)
13Mite'n akhoih ding in naupang neute ahon pi ua; huan nungzuite'n huai mite ana tai uhi. 14Himahleh Jesu'n huai amuh in alung hi kei mahmah a, nungzuite kiang ah, “Naupang neute ka kiang ah hon paisak unla, kham kei un; Pathian lalgam hichibang mite a ahi ngal a,” achi hi. 15Chihtaktak in ka hon hilh ahi, “Kuapeuh naupang neute'n akipahpih bang a Pathian lalgam kipahpih lou asung ah alut kei hial ding,” achi hi. 16Huan amau pom in, atung uah akhut akoih a, avualzawlta hi.
Mihausa Leh Hauhna In Lam Akhak
(Mat 19.16-30; Luk 18.18-30)
17Huan pai ding a apawt lai in mi khat amah lam ah ahong tai a, ama ah akhukdin a, akiang ah, “Sinsakpa hoih, tangtawn hinna ka neihtheihna ding in bang ka hih dia?” chi in adong hi.
18Jesu'n akiang ah, “Bangziak a hoih hon chi na hia? Mi khat kia lou ngal kuamah hoih a-om kei uh, huai Pathian ahi. 19Thupiakte na thei vo oi; tual that ke'n, angkawm ke'n, gu ke'n, hek ke'n, khem ke'n, na nu leh na pa zahtak in, chihte,” achi hi. 20Ama'n akiang ah, “Sinsakpa, huai tengteng ka naupan lai a kipan ka zuita,” achi hi. 21Jesu'n amah a-en a, a-it a, akiang ah, “Hih ding khat nei lai chia; pai inla, na neih peuhmah zuak inla, tagahte kiang ah pia in, huchi in van ah gou na nei ding; huan hong pai inla, hon zui in,” achi hi. 22Himahleh, huai thu ah amel ahong mual a, lungkhamtak in apaimangta; mihausa ahih ziak in.
23Jesu'n a-en vialvial a, anungzuite kiang ah, “Mihausate ding in Pathian lalgam lut haksat tuak hi na mai e,” achi hi.
24Nungzuite'n athugen lamdang asa mahmah uhi. Jesu'n akiang uah, “Naute aw, hauhna muangte a ding in Pathian lalgam a lut ahaksa ngei e. 25Pathian lalgam a mihausa alut sang in sangawngsau phim bilvang a lut paisuak abaihlamzaw,” achi hi.
26Amau lamdang asa mahmah ua, akiang ah, “Ahihleh, kua hotdam ahi thei dia?” achi uhi. 27Jesu'n amau a-en a, “Huai zaw mihing a ding in hih vual ahi kei, Pathian a ding in bel hih vual louh a-om kei; Pathian a ding in bangkim hihtheih ahi ngal a,” achi hi.
28Peter in akiang ah, “Ngai dih, kou bangkim paisan in ka hon zui ua,” chi in agen pan a. 29Jesu'n, “Chihtaktak in ka hon hilh ahi, kuapeuh keimah ziak leh tanchinhoih ziak a inn, unaupate, unaunute, nu, pa, tate leh gamte paisan, 30tu damsung mahmah in, innte, unaupate, sanggamnute, nute, tate, gamte aleh za in, sawinate toh, hun hong tung ding a tangtawn hinna toh mu lou ding mahmah a-om kei hi. 31Himahleh mi tampi masapen a omte nanungpen ahong hi ding ua, nanungpente leng masapen ahong hi ding uh,” achi hi.
Jesu'n Asih Ding Thumvei Agenkholhna
(Mat 20.17-19; Luk 18.31-34)
32Huan Jerusalem a hohtou ding in lampi ah a-om ua; Jesu'n ama uh akai hi. Amau lamdang asa mahmah ua; ahon zuite'n alau uhi. Ama'n sawm-le-nihte apituam nawn a, atung a tung dingte ahilh hi. 33“Ngai dih ua, Jerusalem a hohtou ding i hi ua; Mihing Tapa siampu liante leh laigelhmite khut ah matsak in a-om ding; amau si ding in atung ah thu ahihpuk ding ua, Zentelte kiang ah ape ding uh. 34Amau nuihza bawlna in anei ding ua, chil asiatkhum ding ua, avo ding ua, athat ding uh; himahleh ni thum nung in athounawn ding,” chi in atung a thil tung dingte amaute ahilh hi.
Jakob Leh Johan Ngetna
(Mat 20.20-28)
35Huan Zebedai tapa Jakob leh Johan in amah ahong naih ua, akiang ah, “Sinsakpa na kiang a ka hon nget peuh uh na hon hihsak ka ut uh,” achi uhi.
36Ama'n akiang uah, “Nou a ding in bang hon hihsak leng na ut ua?” achi hi.
37Amau akiang ah, “Na thupina ah na taklam ah khat, na veilam ah khat hon tusak in,” achi uhi.
38Jesu'n akiang uah, “Na nget uh na thei kei ua ahi. Ka nou dawn ding na dawn thei ding ua hia? Ka baptisma tan ding leng na tang thei ding ua hia?” achi hi.
39Amau akiang ah, “Hihthei e,” achi uhi. Jesu'n akiang uah, “Ka nou dawn ding na dawn ding ua, ka baptisma tan ding leng na tang ding uh; 40himahleh ka taklam leh ka veilam a tut ding thu zaw kei piak ding ahi kei a, abawlsakte uh a ding ahi zaw,” achi hi.
41Huan sawmte'n huai azak un, Jakob leh Johan tung ah alungkim kei uhi. 42Jesu'n amau asam a, akiang uah, “Zentelte tung a vaihawm dia asehte uh atung uah alian mahmah ua, amiliante un atung uah thu anei mahmah uh chih na thei uhi. 43Himahleh noute lak ah zaw huchibang ahi kei ding; kuapeuh na lak ua milian hih ut nasemtu in apang zaw ding ahi. 44Kuapeuh na lak ua masapen hih utmi tengteng sikha a apan ding ahi. 45Mihing Tapa hial leng nna sepsak a om ding in ahong pai kei a, nasem ding leh mi tampi tatna dia ahinna pe ding a hong pai ahi zaw hi,” achi hi.
Mittaw Bartimai Hihdamna
(Mat 20.29-34; Luk 18.35-43)
46Huan Jeriko khua ahong tung uhi; huchi in Jesu, Jeriko a kipan anungzuite leh mipi tampitak toh apawt lai un khutdoh mittaw, Timai tapa Bartimai lam gei ah ana tu hi. 47Huan Nazaret Jesu ahi chih azaktak in, “Jesu, David Tapa, ka tung ah zahngai in,” chi in akikou hi.
48Mi tampi in dai ding in akhou ua; himahleh ama'n, “David Tapa, ka tung ah zahngai in,” chi in akinak kou semsem hi.
49Jesu adingh a, “Amah hon sam dih ua,” achi hi. Huan mittaw asam ua akiang ah, “Khamuangtak in om in. Thou in; ahon sam,” achi uhi.
50Huan apuan paikhia in adingh a, Jesu kiang ah ahohta hi.
51Jesu'n amah ahoupih a, “Na tung ah bang hon hihsak leng na ut a?” achi hi. Mittaw in akiang ah, “Heutupa, muh theih ka ut,” achi hi.
52Jesu'n, akiang ah, “Paita in, na ginna dampih hi teh,” achi a, huchi in amu thei pahta a, lampi ah Jesu azuita hi.
Currently Selected:
MARKA 10: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
