MATTHAI 12

Sabbath Ni Thu A Dotna

(Mar 2.23-28; Luk 6.1-5)

1Huchih lai in, Sabbath ni in buhlei kantan in Jesu apai hi. Nungzuite agilkial ua, nek ding in buhvuite akhiak uhi. 2Pharisaite'n huai amuh un, akiang ah, “En dih, na nungzuite'n Sabbath ni in hihsiang lou ahih uh,” achi uhi.

3Jesu'n akiang uah, “David in agilkial lai a alawmte toh athilhih uh na sim kei ua hia? 4Huchi a Pathian inn a alut a, amah leh alawmte'n nek siang louh, siampute kia nek siang tanghou koihtuam anek thu uh? 5Ahihkeileh Sabbath ni in tempul a siampu omte'n Sabbath ni abohsiat un leng siamtang in a-om uh chih Dan thu na sim kei ua hia? 6Huchi ahih ngalleh, tempul sang a thupizaw hiai ah a-om chih ka hon hilh ahi. 7Himahleh ‘kithoihna deih lou in, zahngaihna ka deih’ chih a-omdan na thei hi le uchin, mi siamtangte siam louh tangsak lou ding hi ve uchin. 8Mihing Tapa zaw Sabbath' Toupa ahi,” achi hi.

Khutzaw Hihdamna

(Mar 3.1-6; Luk 6.6-11)

9Huan huai a kipan apai a, asinagogte uah ava lut hi. 10Ngai dih, mi khat khutzaw ana om a, amah ahektheihna ding un, “Sabbath ni a hihdam asiang hia?” chi in Jesu adong uhi.

11Ama'n akiang uah, “Noute lak ah kuapeuh in belam khat nei unla, Sabbath ni in kokhuk ah ke taleh kua ahia len a kaikhe lou ding? 12Belam khat sang in mihing khat bangchi lel a manphazaw ahia? Huaiziak in Sabbath ni in hihhoih asiang hi,” achi hi. 13Huai zoh in, huai mi kiang ah, “Na khut zan in,” achi a, huchi in azan a, alangkhat bang in adamsiangta hi. 14Pharisaite bel apawt ua, amah ahihlup theihdan ding uh ngaihtuah in akihou uhi.

Pathian Sikha Tel

15Jesu'n huai thu atheih in huai mun a kipan in akihemmang hi. Himahleh mi tampi in amah azui ua, adamloute uh ana hihdam vek hi. 16Atanchin genthang het lou ding in akiang uah achi hi. 17Huai zawlnei Isai thugenkholh tangtunna ding ahi zaw hi;

18“En dih, ka sikha ka tel,

ka deihtak, ka lungsim in apahtak mahmah,

atung ah ka Kha ka koih dia, huchi in

Zentelte kiang ah dik a vaihawmna apuangkhe ding hi;

19Asel kei ding a, akikou sam kei ding,

kongzing ah kuamah in a-aw aza kei ding uh.

20Dik a vaihawmna avualzohsak mateng sialluang kigawpsa ahihtankhe kei ding a,

meivak kuang liakliak ahihmit sam kei ding hi.

21Amah min ah Zentelte'n lametna angah ding uh,” achi hi.

Setan Panpihna Hilou Pathian Nasep

(Mar 3.20-30; Luk 11.21-23)

22Huchih lai in dawimat mittaw pau thei lou khat akiang ah hon pi ua; ama'n ahihdam a, pau thei lou hong pau in, ahon mutheita hi. 23Huchi in mipi tengteng in lamdang asa mahmah ua, “Hiai mipa, David Tapa hilou ahi maw?” achi uhi. 24Himahleh Pharisaite'n huai azak phet un, “Hiai mi'n dawite kumpipa, Beelzibul ziak lou in dawite adelhkhe kei ding,” achi uhi. 25Jesu'n amaute ngaihtuahte athei a, akiang uah, “Koi gam leng amah kidou amangthang nak; koi khua hiam, inkuan khat leng amah kidou, akhosuak kei ding hi. 26Setan in Setan mah adelhkhiak in amah-le-amah kidou hi ding ahi a; agam bangchi in adingh dia le? 27Huan kei Beelzibul ziak a dawite delhkhia ka hihleh, na tate un kua ziak in ahia adelhkhiak uh? Huaiziak in amaute noute tung a thukhen mite ahi ding uhi. 28Himahleh, ke'n Pathian Kha ziak a dawite delhkhia ka na hihleh, Pathian lalgam na kiang uah hong tungta ahi ding hi.

29“Huchi ahih kei ngal in, mi'n mihat agak masak phot keileh bangchi in ahia mihat inn alut a, asum alaksak theih ding? Huai nung in a-inn alok mai ding hi.

30“Kuapeuh kei lam a pang lou, hon dou ahi; kuapeuh hon lakkhawmpih lou in athehzak ahi. 31Huaiziak in ka hon hilh ahi, mi akhelhna chiteng uah leh Pathian agensiatna chiteng uh ngaihdam ahi ding ua; Kha hilhial agensiatna ngaihdamsak ahi kei ding hi. 32Kuapeuh Mihing Tapa kalh, akalhna uh ngaihdamsak ahi ding; kuapeuh Kha Siangthou hilhial kalh zaw huai akalhna uh, tu damsung leh hun hong tung ding ah leng, ngaihdam ahi kei ding,” achi hi.

Sing Leh Agah

(Luk 6.43-45)

33“Sing hoih agah leng ahoih na chih kei ngal uleh, sing sia agah leng asia, chi vanglak un; sing agah a akitheih ziak in. 34Nou gul suante aw, nou gilou napi in bangchi in ahia thuhoih na gen theih ding uh? Lungtang a dim val kam in agen zel hi. 35Mihoih in agoubawm hoih a kipan thil hoihte alakhia a, migilou in agoubawm hoih lou a kipan thil hoih lou alakhe zel hi.

36“Huan ka hon hilh ahi. Mite'n thugina lou agen peuhmah uh huai thu tanchin mah vaihawm ni chiang in agen ding uhi. 37Na thu in siam ahon tangsak ding a, na thu mah in siam louh ahon tangsak ding hi,” achi hi.

Chiamtehna Ngetna

(Mar 8.11-12; Luk 11.29-32)

38Huai lai in laigelhmite leh Pharisaite lak a mi kuate hiam in amah ahoupih ua akiang ah, “Heutupa, nang a kipan chiamtehna muh ka ut uh,” achi uhi. 39Ama'n akiang uah, “Khang gilou leh angkawmte'n chiamtehna azong ua, himahleh zawlnei Jonah chiamtehna lou ngal akiang uah chiamtehna piak ahi kei ding hi. 40Ngapi gilsung a Jonah ni thum leh zan thum a-om bang in, Mihing Tapa ni thum leh zan thum lei gilsung ah a-om sam ding hi. 41Nineveh khomite thukhen ni chiang in hiai khangte kiang ah adingh sam ding ua, siam louh atangsak ding uh. Jonah thugen ziak in akisik ua; ngai dih ua, Jonah sang a thupizaw hiai ah a-om hi. 42Thukhen ni chiang in hiai khangte kiang ah simlam kumpinu athou ding a, siam louh atangsak ding hi, Solomon pilna ngaikhe ding in kawlmong a kipan ahong pai ngal a; ngai dih ua, hiai ah Solomon sang a thupizaw a-om hi!

Akim Lou A Kibawl Lauhuaina

(Luk 11.24-26)

43“Huan mihing sung a kipan a dawi nin pawt in, khawlna zong in tui omlouhna mun ah avakvak a, amu kei hi. 44Huan ‘ka pawtna inn mah ah ka kik nawn mai ding,’ achi a; ava tunleh ahawm a zephoihsa in ava mu hi. 45Huaitak in ava pai a, amah sang a gilouzaw dawi dang sagih ahon pi a, huai mi sung ah alut ua, atengta uhi; huai mihing omdan nanung amasa sang in ahong hoih kei zaw hi. Tua bang mah in, hiai khang giloutakte tung ah ahong om ding,” chi in adawng hi.

Jesu Nu Leh Asanggamte

(Mar 3.31-35; Luk 8.19-21)

46Mipite kiang a thu agen lai in ngai dih, amah houpih tum in inpua ah anu leh a-unaute adingh uhi. 47Mi khat in akiang ah, “Ngai dih, na nu leh na unaute nang hon houpih tum in inpua ah adingh nilouh uh,” achi hi.

48Ama'n ahilhpa kiang ah, “Ka nu kua ahia? Ka unaute leng kuate ahi ua?” chi in adawng hi. 49Huan nungzuite lam a akhut zan in, “En un, ka nu leh ka unaute; 50kuapeuh ka Pa van a om deihlam hih phot ka unaupa leh ka unaunu leh ka nu ahi uh,” achi hi.

Currently Selected:

MATTHAI 12: PAITBSI

Highlight

Copy