MATTHAI 10

Sawltak Sawm-le-nihte

(Mar 3.13-19; Luk 6.12-16)

1Huai zoh in anungzui sawm-le-nihte akiang ah asamkhawm a, akiang uah khaninte tung leh amau hawlkhe ding, damlouhna chiteng leh natna chiteng hihdam ding in athuneihna apia hi. 2Huai sawltak sawm-le-nihte min hiaite ahi: Amasapen in Simon Peter leh a-unau Andru; Zebedai tapa Jakob leh a-unau Johan, 3Philip leh Bartholomai; Thomas leh siahkhon Matthai; Alphai tapa Jakob leh Thaddai; 4Kanaan mi Simon leh zuausan a mansakpa Judas Iskariot.

Sawltak Sawm-le-nihte Sep Dingte

(Mar 6.7-13; Luk 9.1-6)

5Hiai sawm-le-nihte Jesu'n asawlkhia a, akiang uah huchi in thu apia hi. “Zentelte lam ah pai kei unla, Samari mite khua ah leng lut kei un. 6Himahleh Israel inkuan belam mangte kiang ah pai zaw un. 7Huan na pai un, van-gam anaita, chi in thu gen zel un. 8Damloute hihdam unla, misite kaithou unla, phakte hihsiangthou unla; dawite hawlkhia un, athawn in na mu ua, athawn in pia un. 9Na kawnggak uah dangka-eng hiam, dangka hiam, dal dangka hiam vom kei un. 10Zinna a ding in kawlzal hiam, puanak nih hiam, khedap hiam, chiangkhun hiam tawi sam kei un; nasemmi nek ding mu tak ahi.

11“Huan kholian hi in khoneu hitaleh na lutna peuh uah nou hon tungsaktak mi zongkhia unla, na pawt nawn mateng uh huai inn ah tung den un. 12A-inn ua na lut peuh chiang un, chibai buk un. 13Huai inn a mite chibai buktak ahih ualeh atung uah na khamuanna uh atung dia; atak kei ualeh nou tung ah akhamuanna uh hong kik nawn ding hi. 14Kuapeuh nou hon kipahpih lou a, na thu uh leng angaihkhiak keileh, huai inn a kipan leh huai khua a kipan na pawt chiang un, na khepek ua leivui tatkhia un. 15Chihtaktak in ka hon hilh ahi, thukhen ni chiang in huai khua sang in Sodom leh Gomorrah gam thuak ding adan a-omzaw ding hi.

Gawtna Hong Tung Dingte

(Mar 13.9-13; Luk 21.12-17)

16“Ngai dih ua, ngia lak a belam om bang in ka hon sawlkhia hi; gul bang a pil in, vakhu bang a poi khoih lou in om un. 17Himahleh mihing lak ah pilvang un; vaihawmte ahon mansak ding uh; sinagogte a hon vuak ding ziak un. 18Keimah ziak in gamukte leh kumpipate ma ah amaute leh Zentelte theihsakna ding in hon pi ding uhi. 19Himahleh ahon matsak chiang un, bang chih ding ahia, bang thu ka gen dia? chi in lungkham kei un; ahuntak in na gen ding uh ahon theisak ding hi. 20Agenpa noumau na hi kei ding ua, na Pa uh Kha in noumau ah agen zaw ding hi.

21“Huan hihlup ding in unaupa leh unaupa akimansak ding ua, pa'n leng ata amansak ding; tate'n leng anu leh apate uh adou ding uh, ahihlumsak ding uh. 22Ka min ziak in mi tengteng huat na hi ding ua; himahleh atawp pha a thuak ngap peuhmah hotdam in a-om ding hi. 23Huchi in hiai khua ahon gawt chiang un, kho dang ah taisan un; chihtaktak in ka hon hilh ahi, Mihing Tapa hong pai ma in Israel gam a khopite na siksuak kei ding uhi.

24“Nungzui aheutu tung ah a-om kei; sikha leng apu tung ah a-om kei hi. 25Nungzui aheutu bang a a-om leh sikha apu bang a a-om ahun lel hi. Inn neipa bawn Beelzibul achih uleh, a-inkuanpihte nak chih na tel un chia!

Kuahiam Lauh Ding

(Luk 12.2-7)

26“Huaiziak in amaute kihta kei un; lang lou ding a sel bangmah a-om kei, theih louh ding a iim bangmah a-om kei hi. 27Mial a nou ka hon hilh vak ah na gen ding ua; bilbul ana zak uh intung a tuang in tangkoupih un. 28Huan pumpi that a kha that theiloute kihta kei unla; Gehenna a kha leh pumpi hihmang theipa kihta zaw un. 29Kawlgit nih dal dangka khat in azuak zel uh hilou hiam? Himahleh alak ua khat leng na Pa uh theih louh in lei ah ake kei ding hi. 30Na samzangte uh nangawn leng sim vek ahi. 31Huaiziak in lau kei un; kawlgit tampi sang in na manphazaw uhi.

Khrist Min Gupna

(Luk 12.8-9)

32“Huchi in mite ma a hon gum peuhmah, ka Pa van a om ma ah ka gum sam ding hi. 33Himahleh kuapeuh mite ma a hon kitheihmohbawl, ka Pa van a om ma ah ka kitheihmohbawl sam ding.

Lemna Hilou, Namsau

(Luk 12.51-53; 14.26-27)

34“Leitung a lemna lengsak ding a hong pai hon sa kei un; lemna lengsak ding hilou in namsau lengsak ding a hong pai ka hi zaw. 35Mi apa dousak ding in, tanu anu dousak ding in, mou anu dousak ding a hong pai ka hi. 36Mi amelma amah inkuanpihte lak a mi mah ahi ding hi.

37“Kuapeuh anu hiam, apa hiam, kei sang a itzaw tuh ka mi hi tak ahi kei; kuapeuh atanu hiam atapa hiam kei sang a itzaw leng, ka mi hi tak ahi kei. 38Kuapeuh ama kros pua a hon zui lou ka mi hi tak ahi kei. 39Kuapeuh ahinna mu in amansuah ding a, keimah ziak a ahinna mansuah in amu ding.

Pahtakmante

(Mar 9.41)

40“Kuapeuh nou hon kipahpih in kei hon kipahpih ahi a, kuapeuh kei hon kipahpih ahon sawlpa kipahpih ahi. 41Zawlnei kuahiam, zawlnei ahih ziak a kipahpih in zawlnei pahtakman angah ding a; kuapeuh midiktat kuahiam midiktat ahih ziak a kipahpih in midiktat pahtakman angah ding hi. 42Huan kuapeuh hiai mineuchikte lak a khat kiang a, nungzui ahih ziak a tuisik nou khat kia pia leng, chihtaktak in ka hon hilh ahi, ama pahtakman amansuah kei hial ding,” achi hi.

Currently Selected:

MATTHAI 10: PAITBSI

Highlight

Copy