MALAKI 3
3
Hong Pai Ding Toupa Sawltak
1“Ngai in, ka sawltak ka sawl a, ama'n ka ma ah lampi abawlkhol ding a Toupa, na zon uh, atempul ah thakhat in ahong pai ding; na kipahna uh, thukhun sawltak, ngai un, ahong hi,” sepaihte' Toupa'n achi.
2Himahleh ahong paina ni kua'n athuakzou thei dia? Ahong lat chiang in kua adingzou dia? Amah hihsiangthou meikuang leh puansawptu sahbon bang ahi ngal a. 3Huchi in dangka hihsiangthoumi leh siangsakmi bang in atu ding a Levi tapate ahihsiang ding hi, dangka-eng leh dangka bang in amau akhuahsiang ding a, huchi in diktatna in Toupa kiang ah thillatte alan ding uhi. 4Huai chiang in Judah leh Jerusalem thillatte nidanglai bang leh tang a kumte bang in Toupa a ding in namtui ahi ding hi.
5“Huan vaihawmna ah aisan mite kalh in, angkawmte kalh in, zuau a kichiamte kalh in theihpihpa kin ka hi ding a, loh thu a migoih, meithai, pabei, nuaisiah, athuneihna a kipan mikhual kaiheipa, kei hon kihtaloute kalh in, na kiang uah ka hong ding sepaihte' Toupa'n achi.
Sawm-a-khat Piak Ding
6“Kei Toupa ka zulhzau kei a; huaiziak in Jakob tapate aw, haltum in na om kei uhi. 7Na pipute uh dam lai a kipan ka dan thupiakte na kilehheisan ua, na zui kei uhi. Ka kiang ah hong kik unla, na kiang uah ka hong kik ding, sepaihte' Toupa'n achi. Himahleh nou, koi ah i kik ding ua? na chi uhi. 8Mi'n Pathian alok diam? Hinapi in noute'n na hon lok uh. Himahleh bangchidan in ka hon lok ua eita? na chi uhi. Sawm-a-khatte ah leh thillatte ah. 9Hiai nam pumpi in, kei na hon loh ziak un hamsiatna a hamsiat na hi uhi. 10Ka insung a an ahong omtheihna ding in koihkhawmna inn ah sawm-a-khat avek in hon lalut unla, huai in kei hon entel un, sepaihte' Toupa'n achi. Akoihna ding dantan kiching om lou khop in van tohlette hong in, vualzawlna ka hon buakkhe kei na hiam! 11Huan negaimi pen nou ziak in ka sal ding a, na leigahte uh ahihse kei ding hi; na grepgui uh leng lou ah ahun tun ma in agah akesak kei ding hi, sepaihte' Toupa'n achi. 12Huchi in nam tengteng in nang nuamsa ahon chi ding ua; gam deihhuai na hih ding ziak un, sepaihte' Toupa'n achi.
Toupa Dem A Thugenna
13“Kei dem a na thute uh akhauh hi,” Toupa'n achi, “Nou koi ah nang dem in thu ka gen ua eita,” na chi uh. 14“Pathian nasep athawn ahi, athupiak i zuih ua, suunna puan silh a sepaihte' Toupa ma a i om uh bang ahia aphattuamna, na chi uh. 15Tu in kisatheite nuamsa chi in agitlouhna nasemte tunding in a-om uh; ahi; Pathian khemte hotkhiak in a-om uh,” i chi uhi.
16 Toupa kihtate akihoupih ua; huchi in Toupa'n angaikhia a, aza a, Toupa kihta a, amin ngaihtuahte ama ah, theihgigena laibuzial ah gelh ahi. 17“Huan amau kei a ahi ding ua, gou lamdangtak ka bawl ni chiang in,” sepaihte' Toupa'n achi. Mi'n ama nasem atapa ahawi bang in huchi in amau ka hawi ding hi. 18Huai hun chiang in na hong kihei ding ua, diktatte leh giloute, Pathian nasem leh ama nna semloute kal na khenchian thei ding uhi.
Currently Selected:
MALAKI 3: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
